କେନ୍ଦୁଝର,୬।୧୨(ସ୍ବ.ପ୍ର.) କେନ୍ଦୁଝର ଜିଲା ଆନନ୍ଦପୁର ବ୍ଲକ ଅଧୀନ କୋଳିମାଟି ପଞ୍ଚାୟତର ସିଂହନାଳୀ ନିକଟରେ ଥିବା ପ୍ରାକୃତିକ ସୌନ୍ଦର୍ଯ୍ୟପୂର୍ଣ୍ଣ ଦରଗଡ଼ିଶୀଳା ଅଞ୍ଚଳକୁ ପର୍ଯ୍ୟଟନ କେନ୍ଦ୍ରର ମାନ୍ୟତା ମିଳୁ ନ ଥିବାରୁ ଅସନ୍ତୋଷ ପ୍ରକାଶ ପାଇଛି। ଏହା ନିକଟରେ ରହିଛି ଜିଲାର ପ୍ରଥମ ଜଳ ବିଦ୍ୟୁତ୍(ହାଇଡେଲ୍ ପ୍ରୋଜେକ୍ଟ)। ବୈତରଣୀ ନଦୀର ପାଣିକୁ ଟନେଲ ଦ୍ୱାରା ଟରବାଇନରେ ପକାଇ ଏଠାରେ ବିଦ୍ୟୁତ୍ ଉତ୍ପାଦନ ପାଇଁ ନିର୍ମାଣ କରାଯାଇଥିବା ବ୍ୟାରେଜ୍ ଅନ୍ୟତମ ଆକର୍ଷଣର ପାଲଟିଛି କେନ୍ଦ୍ର ପାଲଟିଛି। ଏହି ଅଞ୍ଚଳର ବିକାଶ ସହ ପର୍ଯ୍ୟଟନ କେନ୍ଦ୍ରର ମାନ୍ୟତା ମିଳିଲେ ସ୍ଥାନୀୟ ଆଦିବାସୀଙ୍କ ଅର୍ଥନୈତିକ ଓ ସାମାଜିକ ବିକାଶ ହୋଇ ପାରିବ ବୋଲି ମତ ପ୍ରକାଶ ପାଉଛି।
ପ୍ରାକୃତିକ ସୌନ୍ଦର୍ଯପୂର୍ଣ୍ଣ ଏହି ସ୍ଥାନଟି ଶାନ୍ତ ପରିବେଶ ମଧ୍ୟରେ ଅବସ୍ଥିତ। ଆନନ୍ଦପୁରରୁ ୨୦ନଂ.ଏନ୍ଏଚ୍ରେ ଘଟଗଁା ଅଭିମୁଖେ ଯିବା ବାଟରେ କୋଳିମାଟି ନିକଟରୁ ପ୍ରାୟ ୧୫ କି.ମି. ଜଙ୍ଗଲାଞ୍ଚଳ ଦେଇ ଗଲେ ଏହି ସ୍ଥାନରେ ପହଞ୍ଚି ହେବ। ବାଟରେ ଯିବା ସମୟରେ ଝୁଲନ୍ତା ପୋଲ ଏବଂ ଉଭୟ ପାର୍ଶ୍ୱର ସବୁଜିମା ବନାନୀ ସମସ୍ତଙ୍କୁ ମନମୁଗ୍ଧ କରିବ। ଆଦିବାସୀ ଅଞ୍ଚଳ ହୋଇଥିବାରୁ ଗଁାର ଅନୁଭୂତି ଏବଂ କ୍ଷେତବାଡ଼ି ଦେଖିବାକୁ ମିଳିବ। ଉକ୍ତ ସ୍ଥାନରେ ପ୍ରବାହିତ ବୈତରଣୀ ନଦୀର ପ୍ରଶସ୍ତ ବକ୍ଷ ଏକ ନିଆରା ପରିବେଶ ସୃଷ୍ଟି କରୁଛି। ଏହା କଡ଼ରେ ଥିବା ଜଙ୍ଗଲ ଓ ପାହାଡ଼ର ଦୃଶ୍ୟ ଅତ୍ୟନ୍ତ ମନୋରମ। ବୈତରଣୀ ନଦୀ ଅଗଭୀର ଥିବାରୁ ଏଥିରେ ଗାଧୋଇବା, ବିଦ୍ୟୁତ୍ ଉପତ୍ାଦନ ପ୍ରକଳ୍ପ ବୁଲିବା ଏବଂ ଏହାର କୂଳରେ ଭୋଜିଭାତ କରି ଦିନଟିଏ କାଟିବା ନିଆରା।
ଅନ୍ୟତମ ପର୍ଯ୍ୟଟନସ୍ଥଳ ଭୀମକୁଣ୍ଡଠାରେ ବୈତରଣୀ ନଦୀ ପାହାଡିଆ ବାଟ ଦେଇ ପ୍ରବାହିତ ହୋଇ ସେଠାରୁ ପ୍ରାୟ ୧୦ କିମି ଦୂରରେ ରହିଛି ଦରଗଡ଼ିଶିଳା। ଏହି ସ୍ଥାନରେ ବୋଟିଂ, ରାଫ୍ଟିଂ ଆଦି ବ୍ୟବସ୍ଥା କରାଗଲେ ଏବଂ ଗୋଟିଏ ପାର୍ଶ୍ୱରୁ ଅପର ପାର୍ଶ୍ୱକୁ ଯିବା ପାଇଁ କେବୁଲ କାର ବା ଝୁଲନ୍ତା ପୋଲ ଆଦି ନିର୍ମାଣ କରାଗଲେ ଏହା ଜାତୀୟ ସ୍ତରୀୟ ପର୍ଯ୍ୟଟନ କେନ୍ଦ୍ର ହୋଇ ପାରନ୍ତା ବୋଲି ପର୍ଯ୍ୟଟନ ପ୍ରେମୀମାନେ ମତବ୍ୟକ୍ତ କରୁଛନ୍ତି। ଏଠାରେ ଜଳପତ୍ତନ ଭୀମକୁଣ୍ଡ ଅପେକ୍ଷା କମ୍ ଥିବାରୁ ବିପଦ କମ୍ ରହିଛି। ଏଣୁ ଶହ ଶହ ସଂଖ୍ୟାରେ ପର୍ଯ୍ୟଟକ ଆସିବେ ଏବଂ ଏହା ସହିତ ନିକଟରେ ଥିବା ଘଟଗଁା ମା’ ତାରିଣୀ ପୀଠ, ଗୁଣ୍ଡିଚାଘାଗୀ ଜଳପ୍ରପାତ, ସୀତାବିଞ୍ଝ ଆଦି ପର୍ଯ୍ୟଟନ କେନ୍ଦ୍ର ବୁଲିବା ସୁଯୋଗ ପାଇବେ ବୋଲି ପ୍ରକୃତି ପ୍ରେମୀ ପ୍ରଦୀପ ରାଉତ କୁହନ୍ତି ା ଏହା ଏକ ଭଲ ଟୁରିଷ୍ଟ ସର୍କିଟ ହୋଇ ପାରିବ ବୋଲି ମତ ପ୍ରକାଶ ପାଉଛିା ପର୍ଯ୍ୟଟନ ଅଧିକାରୀ ରମେଶ ଚନ୍ଦ୍ର ନାୟକ କହିଛନ୍ତି, ଏହି ସ୍ଥାନକୁ ପର୍ଯ୍ୟଟନ କେନ୍ଦ୍ରର ମାନ୍ୟତା ଦେବା ପାଇଁ ପଦକ୍ଷେପ ନିଆଯାଉଛି।