କୋରୁକୋଣ୍ଡା,୧୧ା୩(ଡି.ଏନ୍.ଏ.): ରାଜ୍ୟ ସରକାର ଜନସାଧାରଣଙ୍କ ହିତ ପାଇଁ ବିଦ୍ୟୁତ୍ ବିଭାଗକୁ ଘରୋଇକରଣ କରି ଟାଟା ପାଓ୍ବାରକୁ ହସ୍ତାନ୍ତର କରିଛନ୍ତି। କିନ୍ତୁ ସୁବିଧା ବଦଳରେ ବହୁ ସମସ୍ୟାର ସମ୍ମୁଖୀନ ହେଉଥିବା ନେଇ ଅନେକ ସମୟରେ ଜିଲାର ଅନେକ ଅଞ୍ଚଳରୁ ନାନା ଖବର ଆସୁଥିବାର ନଜିର ରହିଛି । ସେହିଭଳି ଏକ ଘଟଣା ମାଲକାନଗିରି ଜିଲା କୋରୁକୋଣ୍ଡା ବ୍ଲକ ଡୁଡାମେଟା ପଞ୍ଚାୟତ ସଦରରେ ଦେଖିବାକୁ ମିଳିଛି।
ସୂଚନାଯୋଗ୍ୟ, ଡୁଡାମେଟା ପଞ୍ଚାୟତ ସଦରରେ ପ୍ରାୟ ୪୭ପରିବାର, ପଞ୍ଚାୟତ ଅଫିସ,ପୋଷ୍ଟ ଅଫିସ, ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ରହିଛି। ବିଦ୍ୟାଳୟ ପରିସରରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରୀମାନେ ରହି ପାଠ ପଢିବା ପାଇଁ ୧୧୦ ଶଯ୍ୟାବିଶିଷ୍ଟ ଏକ ଛାତ୍ରୀନିବାସ ମଧ୍ୟ ରହିଛି। ଯେଉଁଥିରେ ବର୍ତ୍ତମାନ ୭୫ରୁ ଅଧିକ ଛାତ୍ରୀ ରହୁଛନ୍ତି। ପରିତାପର ବିଷୟ ଉକ୍ତ ଛାତ୍ରୀନିବାସରୁ ପ୍ରାୟ ୩ ଦିନ ହେଲାଣି ବିଭାଗ ପକ୍ଷରୁ ବିଦ୍ୟୁତ୍ ସଂଯୋଗ କାଟି ଦିଆଯିବାରୁ ଛାତ୍ରୀମାନେ ନାହିଁ ନ ଥିବା ଅସୁବିଧା ଭୋଗୁଛନ୍ତି। ଗ୍ରାମ ଶେଷ ଭାଗରେ ବିଦ୍ୟାଳୟଟି ହୋଇଥିବାରୁ ରାତିରେ ଅନ୍ଧାର ହେତୁ ପଦାକୁ ବାହାରିବାକୁ ଭୟ କରୁଥିବା ବେଳେ ନିଜର ନିତ୍ୟକର୍ମ ସମେତ ପିଇବା ପାଣି ପାଇଁ ବହୁ ଅସୁବିଧା ଭୋଗୁଥିବା କହିଛନ୍ତି ଛାତ୍ରୀନିବାସ ଦାୟିତ୍ୱରେ ଥିବା ପରିଚାଳିକା ମଣି ମାଢି । ଏନେଇ ବିଦ୍ୟାଳୟର ପ୍ରଧାନଶିକ୍ଷକ ସନାତନ ମହାରଣାଙ୍କୁ ପଚାରିବାରୁ ଉପରସ୍ଥ ଅଧିକାରୀଙ୍କୁ ସେ ଜଣାଇ ଦେଇଥିବା କହିଥିଲେ । ଉକ୍ତ ଖବର ସମ୍ପର୍କରେ ବ୍ଲକ ଡବ୍ଲ୍ୟୁଇଓ ପ୍ରଶାନ୍ତ କୁମାର ବାଉରୀଙ୍କୁ ପଚାରିବାରୁ ସେ କହିଛନ୍ତି, ସେ ନିଜେ ସେହିଦିନ ବିଦ୍ୟୁତ୍ ବିଭାଗ ଅଧିକାରୀଙ୍କ ସହ ଆଲୋଚନା କରିଥିଲେ କିନ୍ତୁ ବିଦ୍ୟୁତ ବିଭାଗ ଅଧିକାରୀଙ୍କ କହିବା ଅନୁସାରେ ଡୁଡାମେଟା ଗ୍ରାମରେ ପ୍ରାୟ ଅଧିକାଂଶ ପରିବାର ବିଦ୍ୟୁତ୍ ବିଲ୍ ପଇଠ ନ କରିବାରୁ ସେ ସଂଯୋଗ କାଟିବାକୁ ବାଧ୍ୟ ହେଲେ। ଯେଉ ଦିନ ଉକ୍ତ ଗ୍ରାମବାସୀ ବକେୟା ବିଲ ପଇଠ କରିବେ ସେହିଦିନ ବିଦ୍ୟୁତ୍ ସଂଯୋଗ କରାଯିବ। ଏନେଇ ବିଦ୍ୟୁତ ବିଭାଗ ଯନ୍ତ୍ରୀ ପ୍ରଶାନ୍ତ ନାୟକଙ୍କୁ ପଚାରିବାରୁ ସେ କହିଛନ୍ତି, ଉକ୍ତ ଗ୍ରାମ ସମେତ ବିଦ୍ୟାଳୟ ଓ ଛାତ୍ରୀନିବାସର ମଧ୍ୟ ବହୁ ମାତ୍ରାରେ ବିଦ୍ୟୁତ୍ ବିଲ୍ ବକେୟା ରହିଛି। ଫଳରେ ଏପରି ନିଷ୍ପତ୍ତି ନେବାକୁ ଆମେ ବାଧ୍ୟହେଲୁ। ଏନେଇ ଗ୍ରାମବାସୀଙ୍କ ସହିତ ଆଲୋଚନା କରି ବକେୟା ବିଲ୍ ପଇଠ କରିବାକୁ କହିଥିଲେ। ଗ୍ରାମବାସୀ ବକେୟା ବିଲ ପଇଠ ନ କରିବା ପର୍ଯ୍ୟନ୍ତ ବିଦ୍ୟୁତ ଦେଇ ହେବନି ବୋଲି କହିଥିଲେ ବିଭାଗୀୟ ଯନ୍ତ୍ରୀ। ଏଠି ସ୍ପଷ୍ଟ ଭାବେ ଜଣା ପଡୁଛି ଗ୍ରାମବାସୀ, ପ୍ରଶାସନ ଏବଂ ବିଦ୍ୟୁତ୍ ବିଭାଗର ଖେଳରେ ଛନ୍ଦି ହେଉଛନ୍ତି ନିରୀହ ଛାତ୍ରୀ। ଏବେ ପରୀକ୍ଷା ଚାଲିଥିବାରୁ ଛାତ୍ରୀମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
