ପୁରୀ ଅଫିସ,୨୩ା୧୨: ଦୀର୍ଘ ୯ମାସର ପ୍ରତୀକ୍ଷା ପରେ ବୁଧବାର ଶ୍ରୀମନ୍ଦିର ଖୋଲିବ। କରୋନା କଟକଣା ଭିତରେ ଦାରୁଦିଅଁଙ୍କ ଦର୍ଶନ ମିଳିବ। ପୁରୀ ଜିଲା ପ୍ରଶାସନ ପକ୍ଷରୁ ଜାରି ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ଅନୁଯାୟୀ ୨୩ରୁ ୨୫ ତାରିଖ ପର୍ଯ୍ୟନ୍ତ କେବଳ ସେବାୟତ ପରିବାରର ସଦସ୍ୟଙ୍କୁ ବଡଦେଉଳ ପ୍ରବେଶ ଲାଗି ଅନୁମତି ଦିଆଯିବ। ଏହାପରେ ୨୬ରୁ ୩୧ ତାରିଖ ପର୍ଯ୍ୟନ୍ତ ପୁରୀ ସହରବାସୀ ଏବଂ ଜାନୁୟାରୀ ୩ରୁ ସର୍ବସାଧାରଣଙ୍କ ଲାଗି ଦର୍ଶନ ବ୍ୟବସ୍ଥା ହେବ। ସ୍ଥାନୀୟ ଲୋକଙ୍କ ନିମନ୍ତେ ଟୋକନ୍ ବ୍ୟବସ୍ଥା କରାଯାଇଛି। ଦିନକୁ ୩ଟି ପର୍ଯ୍ୟାୟରେ ଦର୍ଶନ ବ୍ୟବସ୍ଥା ହେବ। ଏହି କ୍ରମରେ ମଙ୍ଗଳବାର ୱାର୍ଡଓ୍ବାରି ଦର୍ଶନ ତାଲିକା ପ୍ରକାଶିତ ହୋଇଛି।
ଏ ସମ୍ପର୍କରେ ଜିଲାପାଳ ବଲୱନ୍ତ ସିଂ ସୂଚନା ଦେଇ କହିଛନ୍ତି, ଦିନକୁ ୩ଟି ପର୍ଯ୍ୟାୟରେ ଦର୍ଶନ ବ୍ୟବସ୍ଥା ହେବ। ପ୍ରଥମ ପର୍ଯ୍ୟାୟ ଦର୍ଶନ ସକାଳ ୭ଟା ୩୦ରୁ ପୂର୍ବାହ୍ନ ୧୧ଟା ୩୦, ଦ୍ୱିତୀୟ ଦର୍ଶନ ମଧ୍ୟାହ୍ନ ୧୨ଟାରୁ ଅପରାହ୍ନ ୪ଟା ଏବଂ ତୃତୀୟ ତଥା ଶେଷ ପର୍ଯ୍ୟାୟ ଦର୍ଶନ ଅପରାହ୍ନ ୪.୩୦ରୁ ରାତି ୯ଟା ପର୍ଯ୍ୟନ୍ତ ଧାର୍ଯ୍ୟ ହୋଇଛି। ୬ ଓ ୯ ନମ୍ବର ୱାର୍ଡର ଲୋକେ ୨୬ ତାରିଖ ସକାଳ ଶିଫ୍ଟରେ ମନ୍ଦିର ଯିବେ। ମଧ୍ୟାହ୍ନ ଶିଫ୍ଟରେ ୧୨ ଓ ୧୫ ନମ୍ବର ୱାର୍ଡ ଓ ସନ୍ଧ୍ୟା ଶିଫ୍ଟରେ ୨, ୩ ଓ ୧୧ ନମ୍ବର ୱାର୍ଡର ଲୋକଙ୍କୁ ଅନୁମତି ମିଳିଛି। ୨୭ ତାରିଖ ସକାଳ ଶିଫ୍ଟରେ ୧୩ ନଂ. ୱାର୍ଡ, ଅପରାହ୍ନ ଶିିଫ୍ଟରେ ୧୬ ଓ ୧୮ ନଂ. ୱାର୍ଡ ଓ ସନ୍ଧ୍ୟା ଶିିଫ୍ଟରେ ୧୭, ୪ ଓ ୨୦ ନମ୍ବର ୱାର୍ଡବାସିନ୍ଦା ଶ୍ରୀମନ୍ଦିରକୁ ଯାଇ ପାରିବେ। ୨୮ ତାରିଖ ସକାଳ ଶିଫ୍ଟରେ ୧୦ ଓ ୧୯ ନଂ. ୱାର୍ଡ, ଅପରାହ୍ନ ଶିଫ୍ଟରେ ୮ ଓ ୨୧ ନଂ. ୱାର୍ଡ ଓ ସନ୍ଧ୍ୟା ଶିଫ୍ଟରେ ୫ ନମ୍ବର ୱାର୍ଡ ଲୋକେ ଦର୍ଶନ କରିପାରିବେ। ସେହିଭଳି ୨୯ ତାରିଖ ସକାଳ ଶିିଫ୍ଟରେ ୧୪ ଓ ୩୨ ନଂ. ୱାର୍ଡ, ଅପରାହ୍ନ ଶିଫ୍ଟରେ ୨୨ ଓ ୨୬ ନଂ. ୱାର୍ଡ ଏବଂ ସନ୍ଧ୍ୟା ଶିଫ୍ଟରେ ୧ ନମ୍ବର ୱାର୍ଡ ଲୋକଙ୍କ ପାଇଁ ଦର୍ଶନ ସୁବିଧା ଉପଲବ୍ଧ ରହିବ। ୩୦ ତାରିଖ ସକାଳ ବେଳା ୨୩ ଓ ୨୪ ନଂ. ୱାର୍ଡ, ଅପରାହ୍ନ ଶିଫ୍ଟରେ ୨୫ ଓ ୩୦ ଏବଂ ସନ୍ଧ୍ୟା ଶିଫ୍ଟରେ ୭ ଓ ୨୭ ନଂ. ୱାର୍ଡ ଲୋକଙ୍କ ପାଇଁ ଶ୍ରୀମନ୍ଦିର ପ୍ରବେଶ ଅନୁମତି ରହିଛି। ଶେଷଦିନ ଅର୍ଥାତ୍ ୩୧ ତାରିଖ ସକାଳ ଶିଫ୍ଟରେ ୨୮ ନଂ. ୱାର୍ଡ, ଅପରାହ୍ନରେ ୨୯ ଓ ୩୧ ନଂ. ୱାର୍ଡ ବାସିନ୍ଦା ଦର୍ଶନ କରିବେ। ନିର୍ଦ୍ଧାରିତ ସମୟରେ ଶ୍ରଦ୍ଧାଳୁ ପହଞ୍ଚିପାରିଲେ ଦର୍ଶନରେ କୌଣସି ସମସ୍ୟା ହେବ ନାହିଁ। ମନ୍ଦିର ଭିତରେ ଶୃଙ୍ଖଳିତ ଭାବେ ଦର୍ଶନ ବ୍ୟବସ୍ଥା ପାଇଁ ୧୫ଜଣ ସ୍ବେଚ୍ଛାସେବୀ ପ୍ରତିହାରୀଙ୍କୁ ଦାୟିତ୍ୱ ଦିଆଯାଇଛି। ମନ୍ଦିରରେ ଶ୍ରଦ୍ଧାଳୁମାନେ କିପରି ସୁରକ୍ଷିତ ଓ ଶୃଙ୍ଖଳିତ ଭାବେ ଦର୍ଶନ କରିବେ ତାହା ଉପରେ ସମ୍ପୃୃକ୍ତ ପ୍ରତିହାରୀ ସେବକମାନେ ନଜର ରଖିବେ। ସମ୍ପୃୃକ୍ତ ପ୍ରତିହାରୀ ସେବକମାନେ ସେବାୟତମାନଙ୍କୁ ଚିହ୍ନଟ କରିବେ। ଦର୍ଶନ ପାଇଁ ଆସିଥିବା ସ୍ଥାନୀୟ ଲୋକଙ୍କ ପଞ୍ଜୀକରଣ କରାଇବା ପାଇଁ ପ୍ରଶାସନ ସମସ୍ତଙ୍କ ଫଟୋ ଉଠାଇବ। ୨୬ ତାରିଖ ସୁଦ୍ଧା କାଉଣ୍ଟର ଓ ପଞ୍ଜୀକରଣ ସମେତ ସମସ୍ତ ପ୍ରସ୍ତୁତି ଶେଷ ହୋଇଯିବ ବୋଲି ଜିଲାପାଳ କହିଛନ୍ତି। ଏସବୁ ପ୍ରସଙ୍ଗରେ ଆଲୋଚନା ପାଇଁ ଶ୍ରୀଜଗନ୍ନାଥ କାର୍ଯ୍ୟାଳୟରେ ଜିଲା ପ୍ରଶାସନର ଦୁଇଟି ବୈଠକ ହୋଇଥିଲା। ଗୋଟିଏ ବୈଠକ ପ୍ରତିହାରୀ ନିଯୋଗ ସହ ହୋଇଥିବା ବେଳେ ଅନ୍ୟଟିରେ ଶ୍ରୀମନ୍ଦିର ପ୍ରଶାସନର କର୍ମକର୍ତ୍ତାମାନେ ଉପସ୍ଥିତ ଥିଲେ।