କ୍ୱିଟୋ: ବିବର୍ତ୍ତନବାଦର ଜନକ ଚାର୍ଲସ ଡାରଓ୍ବିନଙ୍କ ନାମରେ ନାମିତ ‘ଡାରଓ୍ବିନ ଆର୍କ’ ଏବେ ଇତିହାସ। ସମୁଦ୍ର ଲହଡ଼ି ସହିତ ଦୀର୍ଘଦିନର ସଂଘର୍ଷ ପରେ ଏହି ଐତିହାସିକ ସ୍ମାରକୀ ଭୁଶୁଡ଼ି ପଡ଼ିଛି। ଇକ୍ୱେଡର ପର୍ଯ୍ୟଟନ ମନ୍ତ୍ରଣାଳୟ ପକ୍ଷରୁ ଏହି ସୂଚନା ଜାରି କରାଯାଇଛି। ଏ ସମ୍ପର୍କିତ ଫଟୋସମୂହ ସୋସିଆଲ ମିଡିଆରେ ପୋଷ୍ଟ ହେବା ପରେ ପର୍ଯ୍ୟଟନପ୍ରେମୀଙ୍କ ମନରେ ଗଭୀର ରେଖାପାତ କରିଛି।
ଗାଲାବାଗୋସ୍ ଦ୍ୱୀପର ଉତ୍ତର ପାର୍ଶ୍ୱରେ ଅବସ୍ଥିତ ‘ଡାରଓ୍ବିନ୍ ଆର୍କ’ ସ୍କୁବା ଡାଇଭ୍ ଏବଂ ଦୁଃସାହସିକ ଯାତ୍ରା ପାଇଁ ପ୍ରସିଦ୍ଧି ଅର୍ଜନ କରିଥିଲା। ୪୩ ମିଟର ଉଚ୍ଚତା ବିଶିଷ୍ଟ ଏହି କୀର୍ତ୍ତିରାଜି ୟୁନେସ୍କୋ ପକ୍ଷରୁ ବିଶ୍ୱ ଐତିହ୍ୟ ତାଲିକାଭୁକ୍ତ ହୋଇଥିଲା। ଲଗାତର ସମୁଦ୍ର ଲହଡ଼ି ମାଡ଼ ସହି ଆସୁଥିବା ଏହି ପ୍ରାକୃତିକ ଐତିହାସିକ ସ୍ମାରକୀ ଦୁର୍ବଳ ହୋଇପଡ଼ିଥିଲା। ଫଳରେ ଏହା ଭୁଶୁଡ଼ି ପଡ଼ିଛି। ଏବେ ଏହା କେବଳ ଦୁଇଟି ଖମ୍ବ ମଧ୍ୟରେ ସୀମିତ ରହିଯାଇଛି। ଡାରଓ୍ବିନ୍ ଆର୍କର ଭଗ୍ନାବଶେଷ ଏହି ସ୍ମାରକୀର ଏକ କି.ମି. ପରିଧି ମଧ୍ୟରେ ଠାବ କରାଯାଇଥିବା ଇକ୍ୱେଡର ପର୍ଯ୍ୟଟନ ବିଭାଗ କହିଛି।
ବିଲୁପ୍ତପ୍ରାୟ ହାମାରହେଡ୍ ଶାର୍କଙ୍କ ପ୍ରାକୃତିକ ଆବାସସ୍ଥଳୀ ଭାବେ ପରିଚିତ ଡାରଓ୍ବିନ୍ ଦ୍ୱୀପର ଅଂଶବିଶେଷ ଥିଲା ‘ଡାରଓ୍ବିନ୍ ଆର୍କ’। ଦ୍ୱୀପରେ ବିଲୁପ୍ତ ଶ୍ରେଣୀଭୁକ୍ତ ଅନେକ ଜୀବଜନ୍ତୁ, ଗଛଲତା ଦେଖିବାକୁ ମିଳେ। ଦୀର୍ଘଦିନରୁ ଏହା ପର୍ଯ୍ୟଟକ ଏବଂ ସମୁଦ୍ର ବୁଡାଳିଙ୍କ ପାଇଁ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲା। ଏଠାରେ ବହୁ ଫିଲ୍ମ ମଧ୍ୟ ଶୁଟିଂ ହୋଇଛି। ହେଲେ ସମୟର ଆହ୍ବାନକୁ ସ୍ବୀକାର କରିବାକୁ ପଡ଼ିବ ବୋଲି ଗାଲାବାଗୋସ୍ ଦ୍ୱୀପ ସଂରକ୍ଷଣ ପ୍ରକଳ୍ପର ନିର୍ଦ୍ଦେଶକ ଓ୍ବାଶିଂଟନ ଟାପିଆ କହିଛନ୍ତି। ଟୁର୍ କମ୍ପାନୀ ‘ଏଗ୍ରେସର ଆଡ୍ଭେଞ୍ଚର’ ଫେସ୍ବୁକ୍ ପୃଷ୍ଠାରେ ଘଟଣାର ବିବରଣୀ ଉଲ୍ଲେଖ କରିଛି। ଟୁର୍ କମ୍ପାନୀର କେତେଜଣ ସଦସ୍ୟ ଏହାର ମୂକସାକ୍ଷୀ। ‘ପିଲର୍ସ ଅଫ୍ ଇଭାଲ୍ୟୁଏଶନ’ ନାମରେ ପରିଚିତ ‘ଡାରଓ୍ବିନ ଆର୍କ’କୁ ସବୁବେଳେ ମନେ ପଡ଼ିବ ବୋଲି ଏଥିରେ ଦର୍ଶାଯାଇଛି।
