କାନପୁର: ପ୍ରତିବର୍ଷ ଦଶହରାରେ ରାବଣ ଦହନର ପରମ୍ପରା ରହିଛି। କାରଣ ଦଶମୀ ତିଥିରେ ରାବଣଙ୍କୁ ବଧ କରାଯାଇଥିଲା। ଏଥିଯୋଗୁ ଏହି ଦିନକୁ ବିଜୟା ଦଶମୀ ଭାବେ ମଧ୍ୟ ପାଳନ କରାଯାଉଛି। ହେଲେ ଜାଣି ଆଶ୍ଚର୍ଯ୍ୟ ହେବେ କିଛି ସ୍ଥାନରେ ରାବଣଙ୍କ ପୂଜା କରାଯାଇଥାଏ। ଏହା ସମ୍ପୂର୍ଣ୍ଣ ଭାବେ ସତ।
ଉତ୍ତରପ୍ରଦେଶର କାନପୁରରେ ଏଭଳି ଏକ ମନ୍ଦିର ରହିଛି ଯେଉଁଠାରେ ରାବଣଙ୍କୁ ପୂଜା କରାଯାଏ। ଏହି ମନ୍ଦିର ଦଶହରାରେ ଖୋଲିଥାଏ। କେବଳ ଏତିକି ନୁହେଁ ରାବଣ ଦହନ ପରେ ମନ୍ଦିରକୁ ବନ୍ଦ କରିଦିଆଯାଇଥାଏ। କାନପୁରର ଶିବାଲା ରୋଡ୍ରେ ଥିବା ମନ୍ଦିରର ନାଁ ହେଉଛି ‘ଦଶାନନ ମନ୍ଦିର’। ୧୮୯୦ରେ ଗୁରୁ ପ୍ରସାଦ ଶୁକ୍ଳ ମନ୍ଦିରର ସ୍ଥାପନା କରିଥିଲେ। ରାବଣ ଏକ ମହାନ ବିଦ୍ୱାନ ଥିଲେ, ଏଥିପାଇଁ ରାବଣଙ୍କୁ ପୂଜା କରି ଆଶୀର୍ବାଦ ଭିକ୍ଷା କରୁଥିବା ଲୋକମାନେ କୁହନ୍ତି। ଏପରିକିି ରାବଣଙ୍କ ଆଳତୀ କରିବା ପରେ ସେମାନଙ୍କ ଇଚ୍ଛା ପୂରଣ ହୁଏ ବୋଲି ମଧ୍ୟ ବିଶ୍ୱାସ ରହିଛି।
ଦଶହରା ଦିନ ଶ୍ରଦ୍ଧାଳୁ ରାବଣଙ୍କ ମୂର୍ତ୍ତିକୁ ଫୁଲରେ ସଜାଇଥାନ୍ତି। ପରେ ସେମାନେ ଏକତ୍ରିତ ହୋଇ ଭୋଗରାଗ ଏବଂ ଦୀପଦାନ କରିଥାନ୍ତି। ଏହାଛଡ଼ା ଦେଶର ଅନ୍ୟ କିଛି ମନ୍ଦିରରେ ରାବଣଙ୍କୁ ପୂଜା କରାଯାଇଆସୁଛି। ବିଶେଷଭାବେ ଦକ୍ଷିଣ ଭାରତର ଲୋକ ରାବଣକୁ ବହୁତ ମାନିଥାନ୍ତି।
