କଲମ୍ବୋ,୩୦।୭: ସ୍ଥାନୀୟ ଆର୍ ପ୍ରେମଦାସା ଷ୍ଟାଡିୟମରେ ଗୁରୁବାର ଅନୁଷ୍ଠିତ ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ରେ ଶ୍ରୀଲଙ୍କା ୭ ଉଇକେଟରେ ଭ୍ରମଣକାରୀ ଭାରତକୁ ପରାସ୍ତ କରିଛି। ଦଳ ୮୨ରନ୍ର ଲକ୍ଷ୍ୟର ପିଛା କରି ତିନି ଉଇକେଟ ହରାଇ ବିଜେତା ହୋଇଥିଲା। ତେବେ ମ୍ୟାଚ୍ ପରେ ଶ୍ରୀଲଙ୍କାର ଅଧିନାୟକ ଦସୁନ ସନକା ନିଜର ବୟାନ ଦେଇ ଭାରତୀୟ ପ୍ରଶଂସକଙ୍କ ହୃଦୟ ଜିତିଛନ୍ତି।
ମ୍ୟାଚ୍ ପରେ ସନାକା କହିଥିଲେ, ଚିନ୍ତାଜନକ ପରିସ୍ଥିତିରେ ସିରିଜ୍ ଖେଳିଥିବାରୁ ମୁଁ ସର୍ବପ୍ରଥମେ ବିସିସିଆଇ ଧନ୍ୟବାଦ ଦେବାକୁ ଚାହୁଁଛି। ଏଥିସହ ରାହୁଲ ଦ୍ରାବିଡ ଏବଂ ଶିଖର ଧାଓ୍ବନଙ୍କୁ ମଧ୍ୟ ଧନ୍ୟବାଦ। ତେବେ ଦଳ ନେଇ ସେ କହିଛନ୍ତି, ଟିମ୍ର ପ୍ରତିଟି ସଦସ୍ୟ ଫିଟ୍ନେସ୍ ଉପରେ କଠିନ ପରିଶ୍ରମ କରୁଛନ୍ତି। ମୋ ପାଖରେ ବୋଲିଂ ପାଇଁ ବିକଳ୍ପ ରହିଥିଲା। କେବଳ ମୁଁ ନୁହେଁ ସମସ୍ତ କ୍ରିକେଟର ନିଜ ଫିଟ୍ନେସ୍ ଉପରେ ପରିଶ୍ରମ କରିଛନ୍ତି। ସେମାନେ ବିଶ୍ୱସ୍ତରୀୟ ଖେଳାଳି ହେବାକୁ ଚାହୁଁଛନ୍ତି ବୋଲି ସେ କହିଥିଲେ।
ପ୍ରତିକ୍ରିୟାରେ ଭାରତୀୟ ଟିମ୍କୁ ଧନ୍ୟବାଦ ଦେଇଥିବାରୁ ଭାରତୀୟ ପ୍ରଶଂସକମାନେ ଖୁସି ହୋଇଥିଲେ। କେହି କେହି ଏତକ କହି ଆପଣ ହୃଦୟ ଜିତିଲେ ବୋଲି ସୋସିଆଲ ମିଡିଆରେ ମନ୍ତବ୍ୟ ମଧ୍ୟ ରଖିଛନ୍ତି।