ଜୟପୁର, ୨୪।୮: ଖୁବ୍ ଶୀଘ୍ର ଭିକାରୀମୁକ୍ତ ହେବାକୁ ଯାଉଛି ରାଜସ୍ଥାନର ରାଜଧାନୀ ଜୟପୁର। ନିକଟରେ ଭିକାରୀଙ୍କ ଥଇଥାନ ଲାଗି ଜୟପୁର କମିସନରେଟ୍ ପୋଲିସ ଥାନାସ୍ତରରେ ସର୍ଭେ ଆରମ୍ଭ ହୋଇଛି। ଯେଉଁଥିରେ ସେମାନଙ୍କ ସମ୍ପର୍କରେ ସମ୍ପୂର୍ଣ୍ଣ ତଥ୍ୟ ସଂଗ୍ରହ କରାଯାଉଛି। ଏହି ସର୍ଭେରେ ଭିକାରୀ କେଉଁଠାରୁ ଆସିଛି, ଜୟପୁରରେ କେବେଠାରୁ ରହୁଛି ଆଦି ସମ୍ପୂର୍ଣ୍ଣ ତଥ୍ୟ ପୋଲିସ ଫଟୋ ସହିତ ସଂଗ୍ରହ କରୁଛି।
ସର୍ଭେ ଅବସରରେ ଏକ ଚକିତ କଲାଭଳି ତଥ୍ୟ ସାମ୍ନାକୁ ଆସିଛି। ଜୟପୁରରେ ମୋଟ୍ ୧୧୬୨ ଜଣ ଭିକାରୀଙ୍କ ମଧ୍ୟରୁ ୫ ଜଣ ପୋଷ୍ଟ ଗ୍ରାଜୁଏଶନ କରିଛନ୍ତି। ସେହିଭଳି ୧୯୩ ଜଣ ଯୁକ୍ତ ୨ ପର୍ଯ୍ୟନ୍ତ ପଢ଼ିଥିବାବେଳେ ୯୦୩ ଜଣ ପାଠ ପଢ଼ିନାହାନ୍ତି। ୩୯ ଜଣ ସ୍ବାକ୍ଷର ଅଟନ୍ତି। ସେହିଭଳି ୨୭ ଜଣ ଭିକାରୀ ପାଠ ମଧ୍ୟ ପଢ଼ିବାକୁ ଆଗ୍ରହୀ ରହିଥିବା ଜଣାପଡ଼ିଛି। ଅପରପକ୍ଷରେ ୪୧୯ ଜଣ କହିଛନ୍ତି, ଯଦି କିଛି କାମଧନ୍ଦା ମିଳିଯିବ ତାହାଲେ ସେମାନେ ଭିକ୍ଷାବୃତ୍ତି ଛାଡ଼ିଦେବେ। ଏଠାରେ ଉଲ୍ଳେଖଯୋଗ୍ୟ, ରାଜସ୍ଥାନ ସରକାର ମଧ୍ୟ ଖୁବ ଶୀଘ୍ର ଭିକାରୀମାନଙ୍କୁ ଥଇଥାନ କରିବା ଲାଗି ବିଧାନସଭାରେ ଏକ ବିଲ୍ ଆଗତ କରିବେ ବୋଲି ଜଣାପଡ଼ିଛି।
