ଭିଲନିଅସ୍,୯।୧୨:ଅନେକ ଶିଳ୍ପପତି ଓ ପ୍ରତିଷ୍ଠିତ ବ୍ୟକ୍ତିମାନଙ୍କ ଡେଟା ଚୋରି ହେବା ଘଟଣା ଆଜିର ସମୟରେ ଖବରର ଶିରୋନାମା ପାଲଟିଛି। ବର୍ତ୍ତମାନ ସୁଦ୍ଧା ବିଶ୍ୱବ୍ୟାୟୀ ୫ନିୟୁତ ଲୋକଙ୍କ ବ୍ୟକ୍ତିଗତ ଡେଟା ବେଆଇନ ଭାବେ ଚୋରି କରାଯାଇଥିବାବେଳେ ସେମାନଙ୍କ ଭିତରେ ୬ ଲକ୍ଷ ଭାରତୀୟ। ନୋର୍ଡ ଭର୍ଚୁଆଲ ପ୍ରାଇଭେଟ ନେଟଓ୍ବର୍କ (ଭିପିଏନ୍) ପକ୍ଷରୁ ଡେଟା ଚୋରି ସମ୍ବଳିତ ରିପୋର୍ଟ ଅନୁସାରେ ପାଖାପାଖି ୬ ଲକ୍ଷ ଭାରତୀୟଙ୍କ ପର୍ସନାଲ ଡେଟା ବୋଟ୍ ମାର୍କେଟରେ ବିକ୍ରି କରାଯାଇଛି। ବୋଟ୍ ମାଲଓ୍ବେର ଦ୍ୱାରା ଭାରତ ଅଧିକ ପ୍ରଭାବିତ ହୋଇଥିବା ପ୍ରକାଶିତ ରିପୋର୍ଟରେ ଦର୍ଶାଯାଇଛି।
ୟୁରୋପ ଲୁଥୁଆନିଆରେ ଅବସ୍ଥିତ ନୋର୍ଡ ଭିପିଏନ୍ ରିପୋର୍ଟ ମୁତାବକ ୟୁଜରଙ୍କ ଲଗ୍ଇନ୍ସ, ଡିଜିଟାଲ ଫିଙ୍ଗରପ୍ରିଣ୍ଟସ୍, ସ୍କ୍ରିନ୍ଶଟ୍ ଏବଂ ଅନ୍ୟାନ୍ୟ ସୂଚନା ସବୁକୁ ହ୍ୟାକରମାନେ ବୋଟ ମାଲଓ୍ବେର ସାହାଯ୍ୟରେ ଚୋରି କରି ଏହାକୁ ବୋଟ ମାର୍କେଟରେ ବିକ୍ରି କରିଛନ୍ତି। ପ୍ରତ୍ୟେକ ବ୍ୟକ୍ତି ବିଶେଷକଙ୍କ ଡେଟାକୁ ୪୯୦ ଟଙ୍କାରେ (୫.୯୫ ଡଲାର) ବିକ୍ରି କରାଯାଇଛି। ୨୦୧୮ରେ ବୋଟ ମାର୍କେଟ୍ ବଜାର ପ୍ରବେଶ କରିଥିବାବେଳେ ନୋର୍ଡ ଭିପିଏନ୍ ୪ ବର୍ଷର ତଥ୍ୟକୁ ନେଇ ଏହି ରିପୋର୍ଟ ତିଆରି କରିଛି। ୮୧,୦୦୦ ଡିଜିଟାଲ ଫିଙ୍ଗରପ୍ରିଣ୍ଟ, ୫୩୮,୦୦୦ଅଟୋ ଫିଲ ଫର୍ମସ୍ ଏବଂ ଅନେକ ଡିଭାଇସ୍ ସ୍କ୍ରିନ୍ଶଟ୍ ବିକ୍ରି କରାଯାଇଥିବା ଅଧ୍ୟୟନରୁ ଜଣାପଡ଼ିଛି।
ଡେଟା ଓ ଓ୍ବେବ୍ସାଇଟ୍ ହ୍ୟାକ୍ ନେଇ ଏକାଧିକ ଘଟଣା ସାମ୍ନାକୁ ଆସିବା ପରେ ଚଳିତ ବର୍ଷ ଭାରତ ସରକାର ସାଇବର ସିକ୍ୟୁରିଟି ନିୟମକୁ କଡ଼ା କରିଛନ୍ତି। ଡେଟା ହ୍ୟାକ୍ ହେବାର ୬ ଘଣ୍ଟା ଭିତରେ ଟେକ୍ କମ୍ପାନୀ ଭାରତୀୟ କମ୍ପ୍ୟୁଟର ଇମର୍ଜେନ୍ସି ରେସ୍ପନ୍ସ ଟିମ୍ (ସିଇଆର୍ଟି )କୁ ଏ ନେଇ ଅବଗତ କରାଇଥାଏ, ଯାହାପରେ ହ୍ୟାକରଙ୍କୁ ଧରିବା ଲାଗି ଆବଶ୍ୟକ ପଦକ୍ଷେପ ଗ୍ରହଣ କରାଯାଏ। ଭାରତରେ ସାଇବର ସିକ୍ୟୁରିଟି ଏକ ଚ୍ୟାଲେଞ୍ଜ ପାଲଟିଛି। ନିକଟରେ ଦିଲ୍ଲୀସ୍ଥିତ ଏମ୍ସ ହସ୍ପିଟାଲ ଓ୍ବେବ୍ସାଇଟ୍ ହ୍ୟାକ୍ ହୋଇଥିବାବେଳେ ୨୪ ଘଣ୍ଟାରେ ଜଣେ ହ୍ୟାକ୍ର ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ ରିସର୍ଚ୍ଚ (ଆଇସିଏମ୍ଆର୍)ର ଓ୍ବେବ୍ସାଇଟ୍ ହ୍ୟାକ୍ କରିବା ପାଇଁ ଦୁର୍ବୃତ୍ତ ୬ ହଜାର ଥର ପ୍ରୟାସ କରିଥିବା ଖବର ସାମ୍ନାକୁ ଆସିଥିଲା।
ନୋର୍ଡ ଭିପିଏନ୍ ମୁଖ୍ୟତଃ ୩ ପ୍ରକାର ବୋଟ୍ ମାର୍କେଟ ଜେନେସିସ୍, ଦ ରୁଷିଆନ୍ ଏବଂ ୨ଇଜି ମାର୍କେଟରେ ବିକ୍ରି ହୋଇଥିବା ଅଧିକାଂଶ ଡେଟା ଗୁଗଲ, ମାଇକ୍ରୋସଫ୍ଟ ଏବଂ ଫେସ୍ବୁକରୁ ଚୋରି ହୋଇଥିବା ଜଣାପଡ଼ିଛି। ଅନ୍ୟ ଡାର୍କ ଓ୍ବେବ୍ ମାର୍କେଟ୍ ତୁଳନାରେ ବୋଟ୍ ମାର୍କେଟରେ ଆବଶ୍ୟକତାଠାରୁ ଅଧିକ ଡେଟା ସହଜରେ ମିଳୁଥିବା ବୋର୍ଡ ଭିପିଏନ୍ ମୁଖ୍ୟ ଟେକ୍ନୋଲୋଜି ଅଫିସର ମାରିଜସ୍ ବ୍ରିନଡିସ୍ କହିଛନ୍ତି। ଯେପର୍ଯ୍ୟନ୍ତ ବ୍ୟକ୍ତି ବିଶେଷଙ୍କ ଫୋନରେ ବୋଟ ମାଲଓ୍ବେର ରହିଥିବ ସେ ପର୍ଯ୍ୟନ୍ତ ଡେଟା ସବୁ ସହଜରେ ଚୋରି କରାଯାଉଥିବ।