ନୂଆଦିଲ୍ଲୀ,୧୩।୧୨: ଦୁଇ ବର୍ଷର ହୋଇଥିବା ବେଳେ ପିତାଙ୍କୁ ହରାଇଥିଲେ। ହେଲେ ତାଙ୍କ ମା’ କେବେହେଲେ ତାଙ୍କୁ ପିତାର ଅଭାବ ଜାଣିବାକୁ ଦେଇ ନ ଥିଲେ। ଜୀବନରେ ଆଉ ଜଣେ ସାଥୀଙ୍କୁ ନଖୋଜି ସେ ନିଜର ସନ୍ତାନ ହିଁ ସବୁକିଛି ବୋଲି ମାନି ନେଇଥିଲେ। ମାତ୍ର ବଡ଼ ହେବା ପରେ ମା’ଙ୍କ ପାଇଁ ଜୀବନସାଥୀ ଖୋଜି ଖୋଜି ଶେଷରେ ସଫଳ ହୋଇଛି ଝିଅ। ମୂଳତଃ ମେଘାଳୟର ରାଜଧାନୀ ଶିଲୋଂ ବାସିନ୍ଦା ଦେବର୍ତ୍ତୀ ଚକ୍ରବର୍ତ୍ତୀ ଏବଂ ତାଙ୍କ ମା’ ମୌସୁମୀ ଚକ୍ରବର୍ତ୍ତୀଙ୍କ ଏଭଳି କାହାଣୀ ଏବେ ଚର୍ଚ୍ଚାର ବିଷୟ ପାଲଟିଛି। ନିକଟରେ ୫୦ ବର୍ଷୀୟ ମୌସୁମୀଙ୍କ ବିବାହ କରାଇଛନ୍ତି ଦେବର୍ତ୍ତୀ।
ଦେବର୍ତ୍ତୀଙ୍କ ବାପା ଜଣେ ଲୋକପ୍ରିୟ ଡାକ୍ତର ଥିଲେ। ହେଲେ କମ୍ ବୟସରେ ବ୍ରେନ୍ ହାମ୍ରେଜ ହେବା ଯୋଗୁ ତାଙ୍କର ମୃତ୍ୟୁ ଘଟିଥିଲା। ସେତେବେଳେ ଦେବର୍ତ୍ତୀ ୨ ବର୍ଷର ହୋଇଥିବା ବେଳେ ମୌସୁମୀ ୨୫ ବର୍ଷର ଥିଲେ। ମୌସୁମୀ ପେସାରେ ଶିକ୍ଷକ ହୋଇଥିବା ହେତୁ ସେ ତାଙ୍କ ବାପଘରେ ରହୁଥିଲେ। ବିବାହ କରିନେଲେ ଝିଅଙ୍କ ଅବହେଳା ହେବ ଭାବି ସେ ସେଥିପାଇଁ ହଁ କରୁ ନ ଥିଲେ। ହେଲେ ଦେବର୍ତ୍ତୀ ସର୍ବଦା ସେ ବିବାହ କରି ସୁଖରେ ରୁହନ୍ତୁ ବୋଲି ଚାହୁଁଥିଲେ।
ଏବେ ଦେବର୍ତ୍ତୀ ବମ୍ବେରେ ରହୁଛନ୍ତି। ସେ ଟ୍ୟାଲେଣ୍ଟ ମ୍ୟାନେଜର ଭାବେ କାମ କରୁଛନ୍ତି। ପିଲାଟି ବେଳରୁ ସ୍ବପ୍ନ ଥିବା ବେଳେ ସେ ବିବାହ ଲାଗି ମା’ଙ୍କୁ ରାଜି କରାଇଥିଲେ। ପ୍ରଥମେ ବନ୍ଧୁ ପରେ ଜୀବନସାଥୀ ହେବାକୁ ପ୍ରସ୍ତାବ ଦେଇଥିଲେ। ଶେଷରେ ତାହା ହିଁ ହୋଇଛି।
ଚଳିତ ବର୍ଷ ମାର୍ଚ୍ଚରେ ଦେବର୍ତ୍ତୀ ମା’ଙ୍କ ବିବାହ ପଶ୍ଚିମବଙ୍ଗରେ କରାଇଛନ୍ତି। ଉଭୟ ଦମ୍ପତି ୫୦ ବର୍ଷର। ବିବାହ ପରେ ମା’ଙ୍କ ଜୀବନ ବଦଳି ଯାଇଛି। ସେ ଏବେ ଖୁସିରେ ରହୁଛନ୍ତି। ପ୍ରଥମେ ସେ ସାମାନ୍ୟ କଥାରେ ଚିଡ୍ଚିଡ୍ ହେଉଥିଲେ। ଏବେ କିନ୍ତୁ ତାଙ୍କ ପରିବର୍ତ୍ତନ ଖୁସି ଦେଉଥିବା ଦେବର୍ତ୍ତୀ କହିଛନ୍ତି।