ରାସୋଳ, ୨୭।୮(ସରୋଜ ମିଶ୍ର)ଗାଧୋଇବାକୁ ଯାଉଥିବାବେଳେ ଆକ୍ରମଣ କରିବାକୁ ଗୋଡ଼ାଇଲେ ମାଙ୍କଡ଼ ପଲ। ଜୀବନ ବଞ୍ଚାଇବା ଲାଗି ଆଗପଛ ବିଚାର ନ କରି ପୋଖରୀକୁ ଡେଇଁ ପଡ଼ିଲେ ମା’ ଏବଂ ଝିଅ। ଏଥିରେ ଝିଅଙ୍କ ମୃତ୍ୟୁ ଘଟିଥିବାବେଳେ ମା’ଙ୍କୁ ଉଦ୍ଧାର କରିବାରେ ସଫଳ ହୋଇଛନ୍ତି ପାଖପଡ଼େଶୀ। ଢେଙ୍କାନାଳ ଜିଲା ହିନ୍ଦୋଳ ବ୍ଲକ ରାସୋଳ ଥାନା ଅଧୀନ କଳିଙ୍ଗାପାଳ ଗ୍ରାମରେ ଶନିବାର ସକାଳେ ଘଟିଛି ଏଭଳି ଏକ ଦୁଃଖଦ ଘଟଣା। ମୃତା ନାବାଳିକା ହେଲେ ସୁମିତ୍ରା ସର (୧୩)।
କଳିଙ୍ଗାପାଳ ଗ୍ରାମ ସରସାହିର ବଳରାମ ସରଙ୍କ ସ୍ତ୍ରୀ ଊର୍ମିଳା ଏବଂ ବଡ଼ ଝିଅ ସୁମିତ୍ରା ସକାଳେ ଘର ନିକଟ ପୋଖରୀକୁ ଗାଧୋଇବାକୁ ଯାଇଥିବାବେଳେ ଏକ ମାଙ୍କଡ଼ ପଲ ହାବୁଡ଼ରେ ପଡ଼ିଯାଇଥିଲେ। ପଲରୁ କେତେକ ମାଙ୍କଡ଼ ମା’ଝିଅଙ୍କୁ କାମୁଡ଼ିବାକୁ ଗୋଡ଼ାଇବାରୁ ଉଭୟେ ଭୟଭୀତ ହୋଇ ପୋଖରୀ ଭିତରକୁ ଡେଇଁ ପଡ଼ିଥିଲେ। ଚିତ୍କାର ଶୁଣି ଆଖପାଖରେ ଥିବା ଲୋକେ ପହଞ୍ଚତ୍ ଊର୍ମିଳାଙ୍କୁ ଉଦ୍ଧାର କରିଥିବାବେଳେ ସୁମିତ୍ରା ଗଭୀର ପାଣିରେ ବୁଡ଼ିଯାଇଥିଲେ। ତାଙ୍କୁ ଉଦ୍ଧାର କରି ିନ୍ଦୋଳ ମେଡିକାଲକୁ ନିଆଯାଇଥିବାବେଳେ ଡାକ୍ତର ମୃତ ଘୋଷଣା କରିଥିଲେ। ରାସୋଳ ପୋଲିସ ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଛି। ଅନ୍ୟପଟେ ଏହି ଘଟଣାରେ ମୃତ ନାବାଳିକାଙ୍କ ପରିବାର ଲୋକେ ୧୦୮ ଆମ୍ବୁଲାନ୍ସକୁ ଦାୟୀ କରିଛନ୍ତି। ସୂଚନା ଦେବା ସତ୍ତ୍ୱେ ବିଳମ୍ବରେ ପହଞ୍ଚତ୍ବାରୁ ନାବାଳିକାଙ୍କ ଜୀବନ ବଞ୍ଚାଯାଇ ପାରିଲାନାହିଁ ବୋଲି ସେମାନେ ଅଭିଯୋଗ କରିଛନ୍ତି। ସୂଚନାଯୋଗ୍ୟ, ବଳରାମ ଜଣେ ସାଇକେଲ ମେକାନିକ୍। ୩ ଝିଅଙ୍କ ମଧ୍ୟରୁ ବଡ଼ ଝିଅ ସୁମିତ୍ରା ଗଁା ପାଖ ଅରବିନ୍ଦ ଶିକ୍ଷାକେନ୍ଦ୍ରରେ ୮ମ ଶ୍ରେଣୀରେ ପଢୁଥିଲେ। ମେଧାବୀ ସୁମିତ୍ରାଙ୍କ ଏଭଳି ଅକାଳ ବିୟୋଗ ଶିକ୍ଷାନୁଷ୍ଠାନ ସମେତ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।