ମୁମ୍ବାଇ, ୨।୨ : ଜଣେ ଡାକ୍ତରୀ ଛାତ୍ରୀଙ୍କ ମୃତ୍ୟୁ ନେଇ ତାଙ୍କ ପିତା ବମ୍ବେ ହାଇକୋର୍ଟରେ ଏକ ପିଟିଶନ୍ ଦାଖଲ କରିଛନ୍ତି। କରୋନା ଟିକାର ପାର୍ଶ୍ୱ ପ୍ରତିକ୍ରିୟା ଯୋଗୁଁ ଝିଅର ମୃତ୍ୟୁ ଘଟିଥିବା ଅଭିଯୋଗ କରି ପିତା ୧,୦୦୦ କୋଟି ଟଙ୍କାର କ୍ଷତିପୂରଣ ମାଗିଛନ୍ତି।
ଏହି ଆବେଦନରେ ଅଭିଯୁକ୍ତମାନଙ୍କ ମଧ୍ୟରେ କୋଭିଡଶିଲ୍ଡ ଟିକା ନିର୍ମାତା ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ, ଏହାର ସହଯୋଗୀ ବିଲ ଗେଟ୍ସ ଏବଂ ରାଜ୍ୟ ତଥା କେନ୍ଦ୍ରୀୟ ଅଧିକାରୀମାନେ ପକ୍ଷଭୁକ୍ତ ଅଛନ୍ତି। ଆବେଦନକାରୀ ଦିଲୀପ ଲୁନାଓ୍ବତ୍ ଦାବି କରିଛନ୍ତି ଯେ ତାଙ୍କ ଝିଅ ସ୍ନେହଲ ଲୁନାଓ୍ବତ୍ ନାଗପୁରର ଏକ ମେଡିକାଲ କଲେଜର ବରିଷ୍ଠ ଅଧ୍ୟାପିକା ଭାବେ କାର୍ଯ୍ୟ କରୁଥିଲେ।
ସ୍ନେହଲ ୨୦୨୧ ଜାନୁଆରୀ ୨୮ରେ ନାସିକ୍ ଠାରେ କୋଭିଶିଲ୍ଡ ଟିକା ନେଇଥିଲେ ଏବଂ ଏହାର ପାର୍ଶ୍ୱ ପ୍ରତିକ୍ରିୟା ଯୋଗୁ ଏକ ମାସ ପରେ ୨୦୨୧ ମାର୍ଚ୍ଚ ୧ରେ ତାଙ୍କର ମୃତ୍ୟୁ ଘଟିଥିଲା।
ପିତା ପିଟିଶନ୍ରେ ଉଲ୍ଲେଖ କରିଛନ୍ତି ଯେ ତାଙ୍କ ଝିଅ ସ୍ବାସ୍ଥ୍ୟ କର୍ମୀ ଥିବାରୁ ତାଙ୍କୁ ଟିକା ନେବାକୁ ବାଧ୍ୟ କରାଯାଇଛି। ଡ୍ରଗ କଣ୍ଟ୍ରୋଲର୍ ଜେନେରାଲ ଅଫ ଇଣ୍ଡିଆ (ଡିସଜିଆଇ) ଏବଂ ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସ (ଏମ୍ସ୍) ର ନିଦ୍ଦେଙ୍କ ଦ୍ୱାରା ଟିକା ସୁରକ୍ଷିତ ବୋଲି କୁହାଯାଇଥିଲା।
ପିଟିଶନ୍ ଅନୁଯାୟୀ, କେନ୍ଦ୍ର ସରକାରଙ୍କ ପରବର୍ତ୍ତୀ ପ୍ରଭାବ (ଏଇଏଫ୍ଆଇ) କମିଟି ୨୦୨୧ ଅକ୍ଟୋବର ୨ରେ ସ୍ବୀକାର କରିଥିଲେ ଯେ ଟିକାର ପାର୍ଶ୍ୱ ପ୍ରତିକ୍ରିୟା ଯୋଗୁ ଅଭିଯୋଗକାରୀଙ୍କ ୩୩ ବର୍ଷ ବୟସ୍କା ଝିଅଙ୍କର ମୃତ୍ୟୁ ଘଟିଛି।