ରାଉରକେଲା ଅଫିସ,୨୪ା୧: ଉଦିତନଗର ଥାନା ଅନ୍ତର୍ଗତ ବାସନ୍ତୀ କଲୋନୀ ଅଞ୍ଚଳରେ ବୋହୂଙ୍କୁ ଶାଶୁ ଘର ଲୋକେ ମାରି ଦେଇଥିବା ଅଭିଯୋଗ ହୋଇଛି। ପୋଲିସ ସ୍ବାମୀକୁ ଥାନାରେ ଅଟକ ରଖି ଥିବାବେଳେ ପରିବାରର ଅନ୍ୟ ଲୋକେ ନାତିଙ୍କୁ ଧରି ଫେରାର୍ ହୋଇଯାଇଛନ୍ତି। ବାସନ୍ତୀ କଲୋନୀ ବିଏଲ୍/୧୨୫ ଘରେ ଅକ୍ଷୟ ପ୍ରଧାନ ଓ ତାଙ୍କ ପରିବାର ବାସକରନ୍ତି। ଅକ୍ଷୟ ୨୦୧୫ ମେ ୩୧ରେ ପୁଅ ଜ୍ଞାନ ରଞ୍ଜନ ପ୍ରଧାନଙ୍କୁ ବିବାହ କରାଇଥିଲେ। ଭୁବନେଶ୍ୱର ଡେଲଟା ଛକରେ ବାସ କରୁଥିବା ଧନେଶ୍ୱର ବିଶ୍ୱାଳଙ୍କ ଝିଅ ପ୍ରିୟଦର୍ଶନୀ ବିଶ୍ୱାଳଙ୍କ ସହ ଜ୍ଞାନରଞ୍ଜନଙ୍କ ବୈଦିକ ରିତିରେ ବିହାଘର ହୋଇଥିଲା। ବାହାଘର ସମୟରେ ପୁଅର ବାଟ ଖର୍ଚ୍ଚ ସହ ଝିଅର ଯୌତୁକ ବାବଦକୁ ସାଢ଼େ ୫ ଲକ୍ଷ ଟଙ୍କାର ଏକ କାର ଓ ନଗଦ ସାଢ଼େ ୬ ଲକ୍ଷ ଟଙ୍କା ସମେତ ସମସ୍ତ ଘରୋଇ ଆସବାପତ୍ର ଓ ସୁନା ଗହଣା ଦେଇଥିଲେ। ବାହାଘରର ପ୍ରଥମେ ବର୍ଷେ ପ୍ରିୟଦର୍ଶନୀଙ୍କୁ ଶାଶୁ ଘର ଲୋକେ ଖୁବ ଆଦରଯନତ୍ କରିଥିଲେ। ବିବାହର ଦ୍ୱିତୀୟ ବର୍ଷରେ ପ୍ରିୟଦର୍ଶନୀ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ। ପରେ ଶାଶୁ ଘର ଲୋକେ ବାହାଘର ବେଳେ ବାକିଥିବା ଟଙ୍କାକୁ ନେଇ ପ୍ରିୟଦର୍ଶନୀଙ୍କୁ ବିଭିନ୍ନ ଗାଳିଗୁଲଜ କରିବା ସହ ମାନସିକ, ଶାରିରୀକ ନିର୍ଯାତନା ଦେଇଥିଲେ। ଏନେଇ ପ୍ରିୟଦର୍ଶନୀ ସ୍ବାମୀଙ୍କୁ ଜଣାଇଥିଲେ ମଧ୍ୟ ସେ କୌଣସି କଥାକୁ ଖାତିରି କରୁ ନ ଥିଲେ। ଫଳରେ ପ୍ରିୟଦର୍ଶନୀ ବାପା ଧନେଶ୍ୱରଙ୍କୁ ଫୋନ ଯୋଗେ ସବୁ କଥା ଜଣାଇଥିଲେ। ପରେ ସେ ପ୍ରିୟଦର୍ଶନୀଙ୍କ ଘରକୁ ଯାଇ ତାଙ୍କ ପରିବାର ଲୋକଙ୍କ ସହିତ ଉକ୍ତ ବିଷୟରେ ଆଲୋଚନା କରିବା ସହ ଶ୍ୱଶୁର ଧନେଶ୍ୱର ଓ ସ୍ବାମୀ ଜ୍ଞାନରଞ୍ଜନଙ୍କୁ ବୁଝାଶୁଝା କରି ଫେରିଥିଲେ। ହେଲେ ପରିବାର ଲୋକେ ପୁଣି ପ୍ରିୟଦର୍ଶନୀଙ୍କୁ ଅତ୍ୟାଚାର କରିଥିଲେ। ରବିବାର ସକାଳେ ପ୍ରିୟଦର୍ଶନୀଙ୍କ ମୃତ୍ୟୁ ଖବର ସ୍ବାମୀ ଜ୍ଞାନରଞ୍ଜନ ଝିଅ ଘର ଲୋକଙ୍କୁ ଅବଗତ କରାଇଥିଲେ। ଏନେଇ ଦାଦା ଗୟାଧର ଓ ଭାଇ ଜିତେନ୍ଦ୍ର ଉଦିତନଗର ଥାନାରେ ଅଭିଯୋଗ କରିଥିଲେ। ଅଭିଯୋଗ ଆଧାରରେ ଉଦିତନଗର ପୋଲିସ ଘଟଣାସ୍ଥଳରେ ପହଞ୍ଚି ଝୁଲନ୍ତା ଅବସ୍ଥାରେ ପ୍ରିୟଦର୍ଶନୀଙ୍କ ମୃତଦେହ ଉଦ୍ଧାର କରିଥିଲା। ଅନ୍ୟପକ୍ଷେ ପୋଲିସ ଆସିବା ପୂର୍ବରୁ ପରିବାର ଲୋକେ ରାତିରେ ନାତିକୁ ଧରି ଫେରାର ହୋଇଯାଇଥିବା ବେଳେ ସ୍ବାମୀ ଜ୍ଞାନରଞ୍ଜନଙ୍କୁ ପୋଲିସ କାବୁ କରି ନେଇଥିଲା। ମୃତଦେହ ବ୍ୟବଚ୍ଛେଦ ପରେ ଉକ୍ତ ଘଟଣାର ସତ୍ୟାସତ୍ୟ ଜଣାପଡ଼ିବ ବୋଲି ଉଦିତନଗର ଥାନା ଅଧିକାରୀ ସୁଦର୍ଶନ ପଣ୍ଡା ସୂଚନା ଦେଇଛନ୍ତି।
