ଲକ୍ଷ୍ନୌ,୧୧।୧୨: ମଧ୍ୟପ୍ରଦେଶର ଛିନ୍ଦ୍ୱାଡ଼ା ଜିଲା ପରାସିଆ ତହସିଲ ଅଧୀନ ଶଙ୍କରଗଡ଼ ଅଞ୍ଚଳର ଏକ ବାହାଘରକୁ ନେଇ ଚର୍ଚ୍ଚା ଜୋର ଧରିଛି। ଶାଶୁଘର ଲୋକେ ବିଧବା ବୋହୂଙ୍କ ବିବାହ କରାଇ ମହାନତା ଦେଖାଇଛନ୍ତି। ଏପରି କି ପରିବାର ଲୋକେ ନବଦମ୍ପତିଙ୍କୁ ପୁଣି ନୂଆ ଜୀବନ ଆରମ୍ଭ କରିବାକୁ ଆଶୀର୍ବାଦ କରିଛନ୍ତି। ଏହି ବିବାହ ଶନିବାର ହୋଇଛି।
ଶଙ୍କରଗଡ଼ରେ ରହୁଥିବା ଦମ୍ପତି ମଙ୍ଗଲ ବାଭାରିଆ ଏବଂ ଆଶା ବାଭାରିଆଙ୍କ ପୁତ୍ର ଜୟ କିଷନ ବାଭାରିଆଙ୍କ ବିବାହ ରାକ୍ଷୀଙ୍କ ସହିତ ହୋଇଥିଲା। ବିବାହର ୨ ବର୍ଷ ପରେ ଜୟ କିଷନ ଜଣ୍ଡିସ୍ରେ ଆକ୍ରାନ୍ତ ହୋଇ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିଲେ। ଏଭଳିସ୍ଥିତିରେ ବୋହୂ ରାକ୍ଷୀ ସ୍ବାମୀଙ୍କୁ ହରାଇ ବିଧବା ହେବା ଘଟଣାକୁ ଶାଶୁଘର ଲୋକେ ସହି ପାରି ନ ଥିଲେ। ବୋହୂ ମୁଖରେ କିପରି ପୁଣି ହସ ଫେରାଇବେ ସେ ଚିନ୍ତାରେ ରହୁଥିଲେ।
ହେଲେ ରାକ୍ଷୀଙ୍କ ଶ୍ବଶୁର ବୋହୂଙ୍କୁ ପୁଣି ବିବାହ କରାଇବାକୁ ଚିନ୍ତା କରିଥିଲେ। ଏନେଇ ରାକ୍ଷୀଙ୍କ ପରିବାର ଲୋକଙ୍କ ସହ କଥା ହୋଇଥିଲେ। ପରେ ଉଭୟ ପରିବାର ଲୋକେ ରାକ୍ଷୀଙ୍କୁ ପୁଣି ବିବାହ କରାଇବା ପାଇଁ ସ୍ଥିର କରିଥିଲେ। ଏହାପରେ ଶ୍ବଶୁର ମଙ୍ଗଲ ପୁଅ ଖୋଜିବା ଆରମ୍ଭ କରିଥିଲେ। ଏପରି କି ସେ ଲୋକଙ୍କୁ ବୋହୂଙ୍କ ବିବାହ ପ୍ରସ୍ତାବ ଦେଇଥିଲେ।
ପରାସିଆରେ ରହୁଥିବା ଅଜୟ କୈଥବାସଙ୍କ ସହ ବୋହୂଙ୍କ ବିବାହ ପ୍ରସ୍ତାବ ପକାଇଥିଲେ ଶ୍ବଶୁର ମଙ୍ଗଲ। ଅଜୟଙ୍କ ପରିବାର ଲୋକେ ମଧ୍ୟ ରାକ୍ଷୀଙ୍କୁ ଗ୍ରହଣ କରିବାକୁ ରାଜି ହୋଇ ଯାଇଥିଲେ। ଏହା ପରେ ପରିବାରର ନିଷ୍ପତ୍ତି କ୍ରମେ ଗ୍ରାମବାସୀଙ୍କ ଉପସ୍ଥିତିରେ ନିକଟସ୍ଥ ଗାୟତ୍ରୀ ମନ୍ଦିରରେ ରୀତିିନୀତି ସହକାରେ ରାକ୍ଷୀ ଏବଂ ଅଜୟଙ୍କ ବିବାହ ହୋଇଥିଲା। ଏପରିକି ବିବାହରେ ଭୋଜିଭାତର ମଧ୍ୟ ଆୟୋଜନ କରାଯାଇଥିଲା।
