କାବୁଲ, ୧୭।୭: ପାକିସ୍ତାନରେ ଆଫଗାନିସ୍ତାନର ରାଷ୍ଟ୍ରଦୂତ ନାଜିବୁଲ୍ଲା ଅଲିଖିଲ୍ଙ୍କ ଝିଅଙ୍କୁ ଶୁକ୍ରବାର ଇସ୍ଲାମାବାଦରୁ ଅପହରଣ କରାଯାଇ ନିର୍ଯାତନା ଦିଆଯାଇଥିବା ଅଭିଯୋଗ ହୋଇଛି। ଏ ନେଇ ଆଫଗାନିସ୍ତାନ ବୈଦେଶିକ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ସିଲ୍ସିଲା ଅଲିଖିଲ୍ (୨୬) ଜିନ୍ନା ସୁପର ମାର୍କେଟରୁ ଘରକୁ ଫେରୁଥିବାବେଳେ ତାଙ୍କୁ ଅପହରଣ କରାଯାଇଥିଲା। ଅପହରଣକାରୀଙ୍କ ଠାରୁ ମୁକୁଳିବା ପରେ ସିଲ୍ସିଲାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଏଭଳି ଅମାନବିୟ କାର୍ଯ୍ୟକୁ ଆଫଗାନ୍ ସରକାର ନିନ୍ଦା କରିଛନ୍ତି। ଏଥି ସହିତ ପାକିସ୍ତାନରେ ଥିବା ଆଫଗାନ କୂଟନୀତିଜ୍ଞ ଓ ସେମାନଙ୍କ ପରିବାର ସଦସ୍ୟଙ୍କ ସୁରକ୍ଷା ନେଇ ଚିନ୍ତାବ୍ୟକ୍ତ କରିଛନ୍ତି।
ଅନ୍ତର୍ଜାତୀୟ ଚୁକ୍ତି ଓ ପ୍ରତିବଦ୍ଧତାକୁ ସମ୍ମାନ ଦେଇ କୂଟନୀତିଜ୍ଞ ଏବଂ ସେମାନଙ୍କ ପରିବାର ସଦସ୍ୟଙ୍କ ସୁରକ୍ଷା ସୁନିଶ୍ଚିତ କରିବା ଲାଗି ପାକିସ୍ତାନ ସରକାରଙ୍କୁ ତୁରନ୍ତ ଆବଶ୍ୟକୀୟ ପଦକ୍ଷେପ ନେବାକୁ ଆଫଗାନିସ୍ତାନ ଆହ୍ବାନ ଦେଇଛି।