ନୂଆଦିଲ୍ଲୀ, ୧୫।୧୧ : ଇଂଲଣ୍ଡର ପୂର୍ବତନ ଫୁଟବଲର୍ ଡେଭିଡ୍ ବେକହମ୍ ବର୍ତମାନ ଭାରତରେ ଅଛନ୍ତି ଏବଂ ନିକଟରେ ଗୁଜରାଟରେ ପିଲାମାନଙ୍କ ସହିତ ଗଲି କ୍ରିକେଟ୍ ଖେଳୁଥିବା ଦେଖିବାକୁ ମିଳିଛି। ୪୮ ବର୍ଷୀୟ ବେକହମ୍ ତିନି ଦିନ ଧରି ଭାରତରେ ଅଛନ୍ତି ଏବଂ ଖବର ମୁତାବକ, ସେ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବ ମୁମ୍ବାଇର ଓ୍ବାଙ୍ଖ୍ଡ଼େ ଷ୍ଟାଡିୟମରୁ ଦିନିକିଆ ବିଶ୍ୱକପ ୨୦୨୩ ସେମିଫାଇନାଲକୁ ଦେଖିବେ।
ବେକହମ୍ ୟୁନିସେଫ୍ ଆମ୍ବାସଡର ଭାବରେ ଭାରତକୁ ଆସିଛନ୍ତି। ମହିଳା ଓ ବାଳିକାଙ୍କୁ ସଶକ୍ତ କରିବା ଏବଂ କ୍ରିକେଟ୍ ମାଧ୍ୟମରେ ଅନ୍ତର୍ଭୁକ୍ତତା ଏବଂ ଲିଙ୍ଗଗତ ସମାନତାକୁ ପ୍ରୋତ୍ସାହିତ କରିବା ପାଇଁ ୟୁନିସେଫ୍ ସହିତ ଅନ୍ତର୍ଜାତୀୟ କ୍ରିକେଟ୍ ପରିଷଦ ଏକ ସହଭାଗୀତା କରିଛି। ତେବେ ବେକହମ୍ ପିଲାମାନଙ୍କ ସହିତ ଖେଳୁଥିବା ଫଟୋ ସୋସିଆଲ ମିଡିଆରେ ଭାଇରଲ ହୋଇଛି।
ଚଳିତ ବିଶ୍ୱକପରେ ଭାରତ ସମସ୍ତ ୯ ମୁକାବିଲାରେ ବିଜୟ ସହିତ ପଏଣ୍ଟ ଟେବୁଲର ଶୀର୍ଷରେ ରହିଛି। ଧର୍ମଶାଳାରେ ବିରାଟ କୋହଲିଙ୍କ ୯୫ ରନ୍ ବଳରେ ଭାରତ ବ୍ୟୁଜିଲାଣ୍ଡକୁ ମଧ୍ୟ ୪ ଉଇକେଟରେ ମାତ୍ ଦେଇଥିଲା। ଏହା ପୂର୍ବରୁ ବୋଲିଂରେ ମହମ୍ମଦ ଶାମି ୫ ଉଇକେଟ ନେଇଥିଲେ ଏବଂ ନ୍ୟୁଜିଲାଣ୍ଡ ଟିମ୍ ୨୭୩ ରନରେ ଅଟକି ଯାଇଥିଲା। ମ୍ୟାଚକୁ ଭାରତ ଦୁଇ ଓଭର ଥାଇ ଜିତି ନେଇଥିଲା।
୨୦୧୯ ଦିନିକିଆ ବିଶ୍ଵକପରେ ଭାରତ ନ୍ୟୁଜିଲାଣ୍ଡ ନିକଟରୁ ସେମିଫାଇନାଲରେ ପରାଜିତ ହୋଇଥିଲା ବେଳେ ପୁଣିଥରେ ୨୦୨୩ରେ ସେମିଫାଇନାଲରେ ପୁଣି ଭେଟିବ। ତେବେ ଚଳିତ ଥର ଲଗାତାର ତୃତୀୟ ବିଶ୍ୱକପରେ ଫାଇନାଲରେ ପ୍ରବେଶ ପାଇଁ ନ୍ୟୁଜିଲାଣ୍ଡ ଟିମ୍ ଲକ୍ଷ୍ୟ ରଖିଥିବା ବେଳେ ମଞ୍ଚେଷ୍ଟର ପରାଜୟର ପ୍ରତିଶୋଧ ନେବାକୁ ଚେଷ୍ଟା କରିବ।