ସିଡନୀ,୨୯।୧୧: ଭାରତ ବିପକ୍ଷ ଦ୍ୱିତୀୟ ଦିନିକିଆ ମ୍ୟାଚ୍ରେ ଅଷ୍ଟ୍ରେଲିଆ ଓପନର୍ ଡେଭିଡ ଓ୍ବାର୍ନର ଆହତ ହୋଇଛନ୍ତି। ତାଙ୍କ ମାଂଶପେଶୀରେ ଯନ୍ତ୍ରଣା ଯୋଗୁ ମ୍ୟାଚ୍ ଚାଲିଥିବା ବେଳେ ତାଙ୍କୁ ହସ୍ପିଟାଲ ନିଆଯାଇଛି। ଭାରତୀୟ ପାଳିର ୪ର୍ଥ ଓଭରର ଚତୁର୍ଥ ବଲ୍ରେ ଶିଖର ଧାଓ୍ବନଙ୍କ ଏକ ଶର୍ଟକୁ ଡ୍ରାିଭ୍ ମାରି ରୋକୁଥିବାବେଳେ ତାଙ୍କ ଗୋଡ ମାଂଶପେଶୀ ଟାଣି ହୋଇଯାଇଥିଲା। ଏହି ସମୟରେ ସେ ବେଶ୍ ଯନ୍ତ୍ରଣା ଅନୁଭବ କରିବାରୁ ସାଥୀ ଖେଳାଳି ସହାୟତାରେ ଡ୍ରେସିଂ ରୁମ୍କୁ ନିଆଯାଇଥିଲା। ପରେ ଓ୍ବାର୍ନରଙ୍କୁ ସ୍କାନ ପାଇଁ ହସ୍ପିଟାଲ ନିଆଯାଇଛି। ଦୁଇଟି ମ୍ୟାଚ୍ରେ ଅଷ୍ଟ୍ରେଲିଆ ପକ୍ଷରୁ ଅର୍ଦ୍ଧଶତକ ହାସଲ କରିଥିବା ଓ୍ବାର୍ନରଙ୍କ ଫିଟ୍ ହେବା ଅଷ୍ଟ୍ରେଲିଆ ପାଇଁ ନିହାତି ଜରୁରୀ। କାରଣ ଘରୋଇ ଦଳ ପାଇଁ ଓ୍ବାର୍ନର ଜଣେ ଗୁରୁତ୍ୱପୂର୍ଣ୍ଣ ବ୍ୟାଟ୍ସମ୍ୟାନ୍। ଆଗକୁ ଭାରତ ବିପକ୍ଷ ଟି-୨୦ ଏବଂ ୪ ମ୍ୟାଚ୍ ବିଶିଷ୍ଟ ଟେଷ୍ଟ ଶୃଙ୍ଖଳା ମଧ୍ୟ ଖେଳିବାର ଅଛି। ସୂଚନାଯୋଗ୍ୟ, ସିଡନୀରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଉଥିବା ଦ୍ୱିତୀୟ ଦିନିକିଆ ମ୍ୟାଚ୍ରେ ଘରୋଇ ଦଳ ସ୍ଥିତି ମଜଭୁତ ହୋଇଛି। ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ଭାରତ ବିପକ୍ଷରେ ୩୯୦ରନର ବିଶାଳ ଲକ୍ଷ୍ୟ ରଖିଛି। ଡେଭିଡ ଓ୍ବାର୍ନର ଏବଂ ଆରୋନ ଫିଞ୍ଚ୍ ଯୋଡି ଭାରତ ପାଇଁ ବିପଦଜ୍ଜନକ ସାବ୍ୟସ୍ତ ହୋଇଛନ୍ତି। ଦୁହେଁ ପ୍ରଥମ ଉଇକେଟ ପାଇଁ ୧୪୨ ରନ୍ ଯୋଡି ଥିଲେ।
