ସାଉଥାମ୍ପଟନ୍, ୩୧।୭: ମହାମାରୀ କରୋନା ଭାଇରସ୍ ପରବର୍ତ୍ତୀ ପ୍ରଥମ ଦିନିକିଆ ସିରିଜ ଘରୋଇ ଇଂଲଣ୍ଡ ଓ ପଡ଼ୋଶୀ ଆୟର୍ଲାଣ୍ଡ ମଧ୍ୟରେ ଆରମ୍ଭ ହୋଇଯାଇଛି। ଗୁରୁବାର ରାତିରେ ଖେଳାଯାଇଥିବା ସିରିଜର ପ୍ରଥମ ଦିନିକିଆ ମ୍ୟାଚ୍ରେ ଇଂଲଣ୍ଡ ୬ ଉଇକେଟ୍ରେ ବିଜୟ ଲାଭ କରିଛି। ଏହି ମ୍ୟାଚ୍ରେ ଭ୍ରମଣକାରୀ ଆୟର୍ଲାଣ୍ଡ ପ୍ରଥମେ ବ୍ୟାଟିଂ କରି ୪୪.୪ ଓଭରରେ ମାତ୍ର ୧୭୨ ରନରେ ଅଲ୍ଆଉଟ୍ ହୋଇଯାଇଥିଲା। ଜବାବରେ ଇଂଲଣ୍ଡ ସାମ୍ ବିଲିଙ୍ଗ୍ (୬୭ ରନ) ଓ ଅଧିନାୟକ ଇଅନ ମୋର୍ଗାନ (୩୬)ଙ୍କ ଅପରାଜିତ ଇନିଂସ ବଳରେ ୨୭.୫ ଓଭରରେ ୪ ଉଇକେଟ୍ ହରାଇ ଲକ୍ଷ୍ୟ ହାସଲ କରିନେଇଥିଲା। ଚମତ୍କାର ବୋଲିଂ କରିଥିବା ଇଂଲଣ୍ଡର ଡେଭିଡ୍ ଓ୍ବିଲି (୮.୪-୨-୩୦-୫)ଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରାଯାଇଥିଲା। ମ୍ୟାଚ୍ରେ ବାମହାତୀ ଦ୍ରୁତ ବୋଲର ଓ୍ବିଲି ମୋଟ୍ ୫୨ଟି ବଲ୍ ପକାଇଥିବାବେଳେ ସେଥିମଧ୍ୟରୁ ୩୫ ବଲ୍ ଡଟ୍ ରହିଥିଲା। ଅର୍ଥାତ୍ ୩୫ ବଲରେ ସେ କୌଣସି ରନ୍ ବ୍ୟୟ କରି ନ ଥିଲେ। ସେହିଭଳି ଏହି ମ୍ୟାଚ୍ ଅବସରରେ ଓ୍ବିଲି ଏକ ସ୍ବତନ୍ତ୍ର କିର୍ତ୍ତୀମାନ ଲାଭ କରିଛନ୍ତି। ଇଂଲଣ୍ଡର ପ୍ରଥମ ବାମହାତୀ ଦ୍ରୁତ ବୋଲର ଭାବେ ସେ କୌଣସି ଏକଦିବସୀୟ ମ୍ୟାଚ୍ରେ ୫ ଉଇକେଟ୍ ଅକ୍ତିଆର କରିଛନ୍ତି। ଏଥିପୂର୍ବରୁ ଆସେଲ୍ ଜାଇଲ୍ସ ଓ ସମିତ୍ ପଟେଲ ୫ ଉଇକେଟ୍ ହାସଲ କରିଥିଲେ ମଧ୍ୟ ଉଭୟ ସ୍ପିନର ଥିଲେ। ଉଲ୍ଲେଖଯୋଗ୍ୟ, ଉଦୀୟମାନ ବୋଲର ଓ୍ବିଲି ୨୦୧୯ ଆଇସିସି ବିଶ୍ୱକପ୍ରେ ସ୍ଥାନ ପାଇବାର ଯଥେଷ୍ଟ ସମ୍ଭାବନା ଥିଲେ ମଧ୍ୟ ଶେଷ ମୁହୂର୍ତ୍ତରେ ଜୋଫ୍ରା ଆର୍ଚରଙ୍କୁ ବିଶ୍ୱକପ୍ ଟିକେଟ୍ ମିଳିଥିଲା।