ଅକ୍ଲାଣ୍ଡ,୨ା୮: ୧୯୭୦ ଦଶକର ମଧ୍ୟଭାଗରେ ପାସିଫିକ୍ ଆଇଲାଣ୍ଡର୍ସ ବା ପ୍ରଶାନ୍ତ ଦ୍ୱୀପପୁଞ୍ଜ ଅଧିବାସୀ ‘ପାସିଫିକିଆ’ଙ୍କ ଉପରେ ନ୍ୟୁଜିଲାଣ୍ଡ ପକ୍ଷରୁ ଭୋର ସମୟରେ ଚଢ଼ାଉ (ଡନ୍ ରେଡ୍ସ) କରାଯାଇଥିଲା। ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ ଜେସିଣ୍ଡା ଆର୍ଡନ ଶେଷରେ ରବିବାର ଆନୁଷ୍ଠାନିକ ଭାବେ ଏହି ବର୍ବର କାର୍ଯ୍ୟାନୁଷ୍ଠାନ ପାଇଁ କ୍ଷମା ମାଗିଛନ୍ତି।
ଟୋଙ୍ଗା, ଫିଜି ସମେତ ପ୍ରଶାନ୍ତ ଦ୍ୱୀପପୁଞ୍ଜର ବହୁସଂଖ୍ୟକ ଅଧିବାସୀ ନ୍ୟୁଜିଲାଣ୍ଡର କଳକାରଖାନା, ଚାଷଜମି ଓ ଅନ୍ୟ କ୍ଷେତ୍ରଗୁଡ଼ିକରେ କାମ କରୁଥିଲେ। ଏଥିପାଇଁ ସେମାନଙ୍କୁ ଅସ୍ଥାୟୀ ଭିଜା ମିଳୁଥିଲା। ତେବେ ପ୍ରବାସୀମାନେ ଭିଜା ଅବଧି ଶେଷ ହେବା ପରେ ମଧ୍ୟ ନ୍ୟୁଜିଲାଣ୍ଡରେ ରହୁଥିଲେ। ନ୍ୟୁଜିଲାଣ୍ଡବାସୀ ଏହାକୁ ବିରୋଧ କରିଥିଲେ। ପାସିଫିକିଆମାନେ ସେମାନଙ୍କ ରୋଜଗାର ଛଡ଼ାଇନେଇଥିବା ସେମାନେ ଅଭିଯୋଗ ଆଣିଥିଲେ। ଫଳରେ ବେଆଇନ ଭାବେ ରହୁଥିବା ପ୍ରବାସୀଙ୍କୁ ଚିହ୍ନଟ କରି ନିଜ ନିଜ ମୂଳ ଦେଶକୁ ପ୍ରତ୍ୟର୍ପଣ କରାଯାଇଥିଲା। ବ୍ରିଟିଶ୍, ଅଷ୍ଟ୍ରେଲୀୟ ଓ ଦକ୍ଷିଣ ଆଫ୍ରିକୀୟଙ୍କ ତୁଳନାରେ ପାସିଫିକିଆ ଅଧିବାସୀଙ୍କ ସଂଖ୍ୟା ଅଧିକ ଥିଲା। ନ୍ୟୁଜିଲାଣ୍ଡ ସରକାରଙ୍କ ପକ୍ଷରୁ ନିଜ ନାଗରିକମାନଙ୍କୁ ପରାମର୍ଶ ଦିଆଯାଇଥିଲା ଯେ, ସେମାନେ ନିଜ ପରିଚୟପତ୍ର ସାଙ୍ଗରେ ନେଇଯାଆନ୍ତୁ। ଫଳରେ ସେମାନେ ଭିଜା ଅବଧି ଶେଷ ପରେ ରହୁଥିବା ପ୍ରବାସୀ ନୁହନ୍ତି ବୋଲି ଯାଞ୍ଚ ବେଳେ ସୁନିଶ୍ଚିତ ହୋଇପାରିବ। ସେତେବେଳେ ରାସ୍ତା, ସ୍କୁଲ ଓ ଚର୍ଚ୍ଚରେ ଲୋକଙ୍କୁ ହଠାତ୍ ଅଟକାଇ ପରିଚୟପତ୍ର ଦେଖାଇବାକୁ କୁହାଯାଉଥିଲା। ଭୋର ସମୟରେ ଚଢ଼ାଉ କରାଯାଇଥିବାରୁ ଏହା ‘ଡନ୍ ରେଡ୍ସ’ ନାମରେ କୁଖ୍ୟାତ।
ଦ୍ୱିତୀୟ ବିଶ୍ୱଯୁଦ୍ଧ ପରେ ନ୍ୟୁଜିଲାଣ୍ଡର ଅର୍ଥନୀତି ଦ୍ରୁତଗତିରେ ଆଗେଇ ଚାଲିଥିଲା। ଏଥିପାଇଁ ଦେଶରେ ବହୁ ସଂଖ୍ୟକ ଶ୍ରମିକ ଆବଶ୍ୟକ ପଡ଼ିଥିଲା। ଫଳରେ ପ୍ରଶାନ୍ତ ଦ୍ୱୀପ ସମୂହର ପ୍ରବାସୀଙ୍କୁ ନ୍ୟୁଜିଲାଣ୍ଡ ସ୍ବାଗତ କରିଥିଲା। ୧୯୭୦ ଦଶକ ପ୍ରାରମ୍ଭରେ ପୁଣି ଆର୍ଥିକ ସଙ୍କଟ ସୃଷ୍ଟି ହେବାରୁ ଦେଶରେ ବେକରି ସଂଖ୍ୟା ବଢ଼ିବାରେ ଲାଗିଲା। ରାଜନେତା ଓ ଗଣମାଧ୍ୟମ ପକ୍ଷରୁ ପ୍ରବାସୀଙ୍କ ଉପରେ ଆକ୍ରମଣ କରାଯାଇଥିଲା। ୧୯୭୪ରେ ଆରମ୍ଭ ହୋଇଥିବା ଏହି ଚଢ଼ାଉ ୧୯୮୦ ପର୍ଯ୍ୟନ୍ତ ଚାଲିଥିଲା। ପରେ ଧର୍ମଗୁରୁ, ନେତା ଓ ସିଭିଲ ସୋସାଇଟି ପକ୍ଷରୁ ଏହାକୁ ବିରୋଧ କରାଯିବାରୁ ଚଢ଼ାଉ ବନ୍ଦ କରାଯାଇଥିଲା। ନ୍ୟୁଜିଲାଣ୍ଡ ସରକାରଙ୍କ ତଥ୍ୟାନୁସାରେ ୧୯୭୬ ବେଳକୁ ଦେଶରେ ୫୦,୦୦୦ରୁ ଅଧିକ ପାସିଫିକ୍ ଆଇଲାଣ୍ଡର୍ସ ଥିଲେ। ବର୍ତ୍ତମାନ ନ୍ୟୁଜିଲାଣ୍ଡର ପାସିଫିକ୍ ପିପୁଲ୍ସ ମନ୍ତ୍ରୀ ଥିବା ଅପିଟୋ ଓ୍ବିଲିୟମ୍ ସିଓ ମଧ୍ୟ ଏହି ଅପରେଶନର ଶିକାର ହୋଇଥିଲେ।
କ୍ଷମା ମାଗିବା ପାଇଁ ଅକ୍ଲାଣ୍ଡ ଟାଉନ୍ହଲରେ ରବିବାର ଏକ ଶୋକାକୁଳ ପରିବେଶରେ ସ୍ବତନ୍ତ୍ର ଉତ୍ସବର ଆୟୋଜନ କରାଯାଇଥିଲା। ନ୍ୟୁଜିଲାଣ୍ଡ ପକ୍ଷରୁ ନିଆଯାଇଥିବା ଉପରୋକ୍ତ କାର୍ଯ୍ୟାନୁଷ୍ଠାନରେ ପ୍ରଭାବିତ ପରିବାରମାନେ, ପାସିଫିକ୍ ଆଇଲାଣ୍ଡର ବିଶିଷ୍ଟ ବ୍ୟକ୍ତି ଓ ସରକାରୀ ଅଧିକାରୀମାନେ ଏଥିରେ ସାମିଲ ହୋଇଥିଲେ। ପ୍ରଧାନମନ୍ତ୍ରୀ ଜେସିଣ୍ଡା ଆର୍ଡନ ସେମାନଙ୍କୁ ସମ୍ବୋଧିତ କରି କହିଥିଲେ, ଡନ୍ ରେଡ୍ସ ପାଇଁ ସେ ସଫା ମନ ଓ ଖୋଲା ହୃଦୟରେ କ୍ଷମା ମାଗୁଛନ୍ତି। ପ୍ରଶାନ୍ତ କ୍ଷେତ୍ରୀୟ ସମୁଦାୟର ଲୋକେ ଆଜି ମଧ୍ୟ ନ୍ୟୁଜିଲାଣ୍ଡରେ ପୀଡ଼ିତ। ସେମାନେ ପୂର୍ବର କ୍ଷତକୁ ଏବେ ବି ସ୍ମରଣ କରୁଛନ୍ତି। ସେମାନଙ୍କୁ କ୍ଷମା ମାଗିବା ସହ ଏହି ପ୍ରକରଣରେ ଏବେ ପୂର୍ଣ୍ଣଚ୍ଛେଦ ପଡ଼ିବ ବୋଲି ଆଶାବାଦୀ।
କ୍ଷମା ମାଗିବା ପାଇଁ ଅକ୍ଲାଣ୍ଡ ଟାଉନ୍ହଲରେ ରବିବାର ଏକ ଶୋକାକୁଳ ପରିବେଶରେ ସ୍ବତନ୍ତ୍ର ଉତ୍ସବର ଆୟୋଜନ କରାଯାଇଥିଲା। ନ୍ୟୁଜିଲାଣ୍ଡ ପକ୍ଷରୁ ନିଆଯାଇଥିବା ଉପରୋକ୍ତ କାର୍ଯ୍ୟାନୁଷ୍ଠାନରେ ପ୍ରଭାବିତ ପରିବାରମାନେ, ପାସିଫିକ୍ ଆଇଲାଣ୍ଡର ବିଶିଷ୍ଟ ବ୍ୟକ୍ତି ଓ ସରକାରୀ ଅଧିକାରୀମାନେ ଏଥିରେ ସାମିଲ ହୋଇଥିଲେ। ପ୍ରଧାନମନ୍ତ୍ରୀ ଜେସିଣ୍ଡା ଆର୍ଡନ ସେମାନଙ୍କୁ ସମ୍ବୋଧିତ କରି କହିଥିଲେ, ଡନ୍ ରେଡ୍ସ ପାଇଁ ସେ ସଫା ମନ ଓ ଖୋଲା ହୃଦୟରେ କ୍ଷମା ମାଗୁଛନ୍ତି। ପ୍ରଶାନ୍ତ କ୍ଷେତ୍ରୀୟ ସମୁଦାୟର ଲୋକେ ଆଜି ମଧ୍ୟ ନ୍ୟୁଜିଲାଣ୍ଡରେ ପୀଡ଼ିତ। ସେମାନେ ପୂର୍ବର କ୍ଷତକୁ ଏବେ ବି ସ୍ମରଣ କରୁଛନ୍ତି। ସେମାନଙ୍କୁ କ୍ଷମା ମାଗିବା ସହ ଏହି ପ୍ରକରଣରେ ଏବେ ପୂର୍ଣ୍ଣଚ୍ଛେଦ ପଡ଼ିବ ବୋଲି ଆଶାବାଦୀ।