ସିଡ୍ନୀ, ୧୧।୧୨(ପି.ଟି.)-
ଶୁକ୍ରବାର ଏଠାରେ ଆରମ୍ଭ ହୋଇଯାଇଛି ଭାରତ ଓ ଅଷ୍ଟ୍ରେଲିଆ ‘ଏ’ ଦିବାରାତ୍ର ଓ୍ବାର୍ମଅପ୍ କ୍ରିକେଟ ମ୍ୟାଚ। ବର୍ଷା ବାଧାପ୍ରାପ୍ତ ପ୍ରଥମ ଦିନରେ ପଡ଼ିଛି ୨୦ଟି ଉଇକେଟ। ଭାରତ ପ୍ରଥମ ଇନିଂସରେ ୧୯୪ ରନ କରିଥିବାବେଳେ ଅଷ୍ଟ୍ରେଲିଆ ‘ଏ’ ୧୦୮ରେ ଅଲଆଉଟ ହୋଇଛି। ଫଳରେ ଭାରତ ୮୬ ରନରେ ଅଗ୍ରଣୀଲାଭ କରିଛି।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତ ଦଳର ସମସ୍ତ ତାରକା ବ୍ୟାଟ୍ସମ୍ୟାନ ଫେଲ୍ ମାରିଥଲେ। ହେଲେ ଦେଖିବାକୁ ମିଳିଥିଲା ଯଶପ୍ରୀତ୍ ବୁମ୍ରା ଚମକ। ସେ ୫୭ ବଲରୁ ୫୫ ରନରେ ଅପରାଜିତ ରହି ଦଳ ପାଇଁ ସର୍ବାଧିକ ରନ୍ ସ୍କୋର କରିଥିଲେ। ପ୍ରଥମଶ୍ରେଣୀ କ୍ରିକେଟରେ ଏହା ଥିଲା ତାଙ୍କ କ୍ୟାରିୟରର ପ୍ରଥମ ଅର୍ଦ୍ଧଶତକ। ଇନିଂସରେ ସାମିଲ ଥିଲା ୬ ଚୌକା ଓ ୨ ଛକା । ୨୭ ବର୍ଷୀୟ ବୁମ୍ରା ଛକା ମାରି ପୂରଣ କରିଥିଲେ ଅର୍ଦ୍ଧଶତକ । ବୁମ୍ରା ଓ ମହମ୍ମଦ ସିରାଜ ୧୦ମ ଉଇକେଟରେ ଯୋଡ଼ିଥିଲେ ୭୧ ରନ। ଫଳରେ ସମ୍ମାନଜନକ ସ୍ଥିତିରେ ପହଞ୍ଚତ୍ ପାରିଥିଲା ଟିମ୍ ଇଣ୍ଡିଆ। ସିରାଜ ୨୨, ପୃଥ୍ବୀ ଶ’ ୪୦ ଓ ଶୁବମନ ଗିଲ୍ ୪୩ ରନ କରିଥିଲେ। ଅଷ୍ଟ୍ରେଲିଆ ‘ଏ’ ପକ୍ଷରୁ ସିଅନ ଆବୋଟ ଓ ଜ୍ୟାକ୍ ଓ୍ବାଇଲ୍ଡରମୁଥ ନେଇଥିଲେ ୩ଟି ଲେଖାଏ ଉଇକେଟ।
ଭାରତ ଇନିଂସ ଶେଷ ହେବାପରେ ଅଷ୍ଟ୍ରେଲିଆ ‘ଏ’ ଦଳର ବ୍ୟାଟ୍ସମ୍ୟାନମାନେ ସମ୍ମୁଖୀନ ହୋଇ ପାରି ନ ଥିଲେ ଭ୍ରମଣକାରୀ ଦଳର ବୋଲରଙ୍କ ଘାତକ ବୋଲିଂ। ଫଳରେ ମାତ୍ର ୩୨.୨ ଓଭରରେ ଦଳ ଅଲ୍ଆଉଟ ହୋଇଯାଇଥିଲା। ଅଷ୍ଟ୍ରେଲିଆ ‘ଏ’ ପକ୍ଷରୁ ଆଲେକ୍ସ କାରେ ସର୍ବାଧିକ ୩୨ ଓ ମାର୍କୁସ ହାରିସ ୨୬ ରନ କରିବାକୁ ସକ୍ଷମ ହୋଇଥିଲେ। ଦୁଇଅଙ୍କ ଛୁଇଁପାରି ନ ଥିଲେ ୭ ଜଣ ଖେଳାଳି। ଭାରତୀୟ ବୋଲରଙ୍କ ମଧ୍ୟରେ ମହମ୍ମଦ ସାମି ଓ ନବଦୀପ ସଇନୀ ୩ଟି ଲେଖାଏ, ବୁମ୍ରା ୨ଟି ଉଇକେଟ ନେଇଥିଲେ।