ଦାରିଙ୍ଗବାଡି, ୩୧।୧୦ (ଅରୁଣ ସାହୁ ): କନ୍ଧମାଳ ଜିଲା ଦାରିଙ୍ଗବାଡି ଥାନା ସିମନବାଡ଼ି ଅଞ୍ଚଳରେ ଦିନକୁ ଦିନ ଚୋରି ବୃଦ୍ଧି ପାଉଛି। ଦୁର୍ବୃତ୍ତମାନେ ଏବେ ନିୟମିତ ମାତିଥିଲେ ହେଁ ବ୍ୟବସାୟୀମାନେ ପୋଲିସ ନିକଟରେ ଅଭିଯୋଗ କରିବାକୁ ଅମଙ୍ଗ ହେଉଛନ୍ତି। ଏହାକୁ ନେଇ ଅଞ୍ଚଳବାସୀଙ୍କ ଚିନ୍ତା ବୃଦ୍ଧି ପାଇଛି।
ପ୍ରକାଶ ଯେ, ବୁଧବାର ବିଳମ୍ବିତ ରାତିରେ ସିମନବାଡି ବଜାର ଉପରେ ଚା’ଦୋକାନ କରିଥିବା ରାଜୁ ସାହୁଙ୍କ କ୍ୟାବିନରୁ କିଛି ଜିନିଷ ଚୋରି ଯାଇଥିବା ବେଳେ ବିଷ୍ଣୁ ପ୍ରିୟା ମୁଖିଙ୍କ ଷ୍ଟେସନାରୀ ଦୋକାନ ଏବଂ କିରିକୁଟି ପଞ୍ଚାୟତର ଜଣେ ଯୁବତୀ ରଜନୀ ଦଣ୍ଡସେନାଙ୍କ ପରିବା ଦୋକାନ କ୍ୟାବିନ ଭାଙ୍ଗି ୧୫ ଶହ ଟଙ୍କା ଚୋରି ହୋଇଛି। ଏହି ବ୍ୟବସାୟୀମାନେ ଥାନାରେ ଅଭିଯୋଗ କରି ନ ଥିବା ଜଣାପଡିଛି। ପ୍ରତିଦିନ ଏହି ସବୁ ଅଞ୍ଚଳରେ ଜୁଆ ଆଡ୍ଡା ଚାଲିଥିବା ବେଳେ ବେଧଡ଼କ ଚୋରା ମଦ କାରବାର ବୃଦ୍ଧି ଚୋରିର ମୁଖ୍ୟ କାରଣ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ପୋଲିସ ସିମନବାଡି ଅଞ୍ଚଳରେ ପାଟ୍ରୋଲିଂ କରିବା ଓ ଜୁଆଆଡ୍ଡାକୁ ରୋକିବାକୁ ପଦକ୍ଷେପ ନେବାକୁ ସାଧାରଣରେ ନିବେଦନ କରାଯାଇଛି ।