ନୂଆଦିଲ୍ଲୀ,୨୧।୨: କରୋନା ମହାମାରୀ ଯୁଦ୍ଧରେ ଭାରତକୁ ଆଉ ଏକ ଅସ୍ତ୍ର ମିଳିଛି। ଭାରତରେ କରୋନା ବିରୋଧରେ ଲଢ଼େଇ ପାଇଁ ବାୟୋଲୋଜିକାଲ-ଇ ଦ୍ୱାରା ପ୍ରସ୍ତୁତ କରୋନା ଭାକ୍ସିନ କର୍ବେଭ୍ୟାକ୍ସକୁ ଡ୍ରଗ୍ସ କଣ୍ଟ୍ରୋଲର ଜେନେରାଲ ଅଫ୍ ଇଣ୍ଡିଆ(ଡିସିଜିଆଇ) ଅନୁମୋଦନ ପ୍ରଦାନ କରିଛି। ୧୨ରୁ ୧୮ବର୍ଷ ବୟସର ପିଲାମାନଙ୍କୁ ଏହି ଟିକା ଦିଆଯିବ ବୋଲି ଡିସିଜିଆଇ ସୋମବାର ଘୋଷଣା କରିଛି। ପୂର୍ବରୁ ୧୫ରୁ ୧୮ ବର୍ଷ ବୟସର ପିଲାଙ୍କୁ ଟିକା ଦିଆଯିବା ପାଇଁ ଭାରତ ବାୟୋଟେକ୍ କୋଭାକ୍ସିନକୁ ମଞ୍ଜୁରୀ ମିଳିଥିଲା। ତେବେ କର୍ବେଭ୍ୟାକ୍ସ ଟିକା ପିଲାଙ୍କମାଂସପେଶୀ ଜରିଆରେ ଶରୀରକୁ ପ୍ରବେଶ କରିବ। ଏହାକୁ ୨୮ଦିନ ମଧ୍ୟରେ ୨ଟି ଡୋଜ ନେବାକୁ ପଡ଼ିବ ବୋଲି ଜଣାପଡ଼ିଛି। ସେହିପରି ଏହି ଟିକାକୁ ୨ରୁ ୮ ଡିଗ୍ରୀ ସେଲ୍ସିୟସରେ ସଂରକ୍ଷଣ କରାଯିବ। ସୂଚନାଯୋଗ୍ୟ, ଏହାପୂର୍ବରୁ ଫେବୃଆରୀ ୧୪ରେ ଡିସିଜିଆଇର ବିଶେଷଜ୍ଞ କମିଟି କିଛି ସର୍ତ୍ତ ସହିତ ଜୈବିକ ଇ’ର କୋଭିଡ -୧୯ ଟିକା ‘କର୍ବେଭ୍ୟାକ୍ସ’ର ଜରୁରୀକାଳୀନ ବ୍ୟବହାର ଲାଗି ଅନୁମୋଦନ ପାଇଁ ସୁପାରିଶ କରିଥିଲା।