ବେଙ୍ଗାଲୁରୁ,୨୯।୧୧: କର୍ନାଟକର ରାଜଧାନୀସ୍ଥିତ ଇଏସ୍ଆଇ ହସ୍ପିଟାଲର ଶବଗୃହରୁ ମିଳିଛି ୧୫ ମାସ ତଳର ଦୁଇଟି ମୃତଦେହ। କରୋନାରେ ଦୁହିଁଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ଗତ ଶୁକ୍ରବାର ଶବଗୃହର ସଫେଇ ବେଳେ ଏଭଳି ଘଟଣା ସାମ୍ନାକୁ ଆସିଛି। କୋଭିଡ୍ ପ୍ରୋଟୋକଲ ଅନୁସାରେ ସେମାନଙ୍କ ଶବ ସତ୍କାର କରାଯାଇ ନ ଥିବାରୁ ହସ୍ପିଟାଲ କର୍ମଚାରୀ ଓ ଡାକ୍ତରଙ୍କୁ ଦାୟୀ କରିଛନ୍ତି ସ୍ଥାନୀୟ ଲୋକେ।
ରିପୋର୍ଟ ମୁତାବକ, ଜଣେ ମୃତକଙ୍କ ଶବଦାହ କରିବାକୁ ତାଙ୍କ ପରିବାରବର୍ଗ ଓ ସମ୍ପର୍କୀୟ ମନା କରି ଦେଇଥିବା ବେଳେ ଅନ୍ୟ ଏକ ମୃତକଙ୍କ ପରିବାରବର୍ଗଙ୍କୁ ପୋଲିସ ଖୋଜିବାରେ ସଫଳ ହୋଇ ନ ଥିଲା।
ମୃତଦେହରେ ଲାଗିଥିବା ଟ୍ୟାଗ ସାହାଯ୍ୟରେ ଦୁଇ ମୃତକଙ୍କ ପରିଚୟ ଜଣାପଡ଼ିଛି। ଦୁହେଁ ୨୦୨୦ ଜୁଲାଇରେ କୋଭିଡ୍ରେ ଆକ୍ରାନ୍ତ ହେବା ପରେ ଇଏସ୍ଆଇ ହସ୍ପିଟାଲରେ ଭର୍ତ୍ତି ହୋଇଥିଲେ। ଚିକିତ୍ସାଧୀନ ଅବସ୍ଥାରେ ସେମାନଙ୍କ ମୃତ୍ୟୁ ଘଟିଥିଲା। ଫଳରେ ସେମାନଙ୍କ ମୃତଦେହକୁ ପୁରୁଣା ଶବଗୃହରେ ରଖାଯାଇଥିଲା। ସେଠାରୁ ଶବଦାହ ପାଇଁ ବୃହତ ବେଙ୍ଗାଲୁରୁ ମହାନଗର ପାଳିକା (ବିବିଏମ୍ପି)କୁ ଦିଆଯିବାର ଥିଲା। କିନ୍ତୁ ଗତବର୍ଷ କରୋନା ଜନିତ ମୃତକଙ୍କ ସଂଖ୍ୟା ବଢ଼ିବାରୁ ଡିସେମ୍ବରରେ ନିର୍ମାଣ କରାଯାଇଥିଲା ଏକ ନୂଆ ଶବଗୃହ। ଏହା କାର୍ଯ୍ୟକ୍ଷମ ହେବା ପରେ ପୁରୁଣା ଶବଗୃହରେ ରଖାଯାଇଥିବା ଦୁଇ ମୃତଦେହକୁ ଭୁଲି ଯାଇଥିଲେ ହସ୍ପିଟାଲ କର୍ମଚାରୀ।
ଗତ ୨୬ ତାରିଖରେ ପୁରୁଣା ଶବଗୃହର ସଫେଇ କରିବାକୁ ଯାଇଥିବା ହସ୍ପିଟାଲ କର୍ମଚାରୀଙ୍କୁ ଫ୍ରିଜରରୁ ଦୁଇ ମୃତହେଦ ମିଳିଥିଲା। ଘଟଣା ସାମ୍ନାକୁ ଆସିବା ପରେ ରାଜାଜିନଗର ବିଧାୟକ ସୁରେଶ କୁମାର ରାଜ୍ୟ ଶ୍ରମ ମନ୍ତ୍ରୀ ଶିବରାଜ ହେବଲଙ୍କୁ ଉଚ୍ଚ ସ୍ତରୀୟ ତଦନ୍ତ ଦାବିରେ ଚିଠି ଲେଖିଛନ୍ତି।