ଦେବଗଡ,୨୪।୬:( ଶଶାଙ୍କ ଶେଖର ଝାଙ୍କର) ଦେବଗଡ ଷ୍ଟେଟ ବ୍ୟାଙ୍କରେ କାର୍ଯ୍ୟରତ ଥିବା ସିଏସସି ମ୍ୟାନେଜରଙ୍କ ଝୁଲନ୍ତା ମୃତଦେହ ଶୁକ୍ରବାର ମମତା ହୋଟେଲରୁ ଉଦ୍ଧାର କରାଯାଇଛି । ଉକ୍ତ ଘଟଣା ସହରରେ ଚର୍ଚ୍ଚାର ବିଷୟ ସାଜିଛି। ମୃତ ବ୍ୟାଙ୍କ ଅଧିକାରୀ ଜଣକ ହେଲେ ସମ୍ବଲପୁର ଅଇଁଠାପାଲି ଅଞ୍ଚଳର ସୁବାସ ଚନ୍ଦ୍ର ଅଗ୍ରୱାଲ ।
ସୂଚନା ମୁତାବକ ମୃତ ମ୍ୟାନେଜର ସୁବାସ ଗତ ୧୯ ତାରିଖ ଦିନ ବଦଳି ହୋଇ ନୂତନ ଭାବେ ଦେବଗଡ ଷ୍ଟେଟ୍ ବ୍ୟାଙ୍କରେ ଯୋଗ ଦେଇଥିଲେ। ସେ ସ୍ଥାନୀୟ ମମତା ହୋଟେଲ ରୁମ ନମ୍ବର ୭୦୩ରେ ରହୁଥିଲେ । ଗୁରୁବାର ରାତିରେ ସେ କାମ ସାରି ହୋଟେଲ ରୁମକୁ ଫେରିଥିଲେ। ଶୁକ୍ରବାର ତାଙ୍କ ପରିବାର ଲୋକ ଅନେକ ଥର ଫୋନ କରିଥିଲେ ମଧ୍ୟ ସେ ଫୋନ ଉଠାଇ ନ ଥିଲେ। ଫୋନ୍ ନ ଉଠେଇବାରୁ ତାଙ୍କ ଭାଇ ହୋଟେଲ ରୁମକୁ ଯାଇଥିେଲେ। ତେବେ ତାଙ୍କ ରୁମ୍ ଭିତରୁ ବନ୍ଦ ରହି୍ଥିବା ସେ ଦେଖିବାକୁ ପାଇଥିଲେ। ପରେ କବାଟ ଭାଙ୍ଗିବା ପରେ ତାଙ୍କର ଝୁଲନ୍ତା ମୃତ ଦେହ ଉଦ୍ଧାର କରାଯାଇଥିଲା । ସେ ଏକ ଧଳା ଓଢଣୀ ବେକରେ ଫାଶ ଦେଇ ଆତ୍ମହତ୍ୟା କରିଥିବା ଜଣାପଡିଛି । ତେବେ କେଉଁ କାରଣରୁ ଆତ୍ମହତ୍ୟା କରିଛନ୍ତି ତାହା ଅସ୍ପଷ୍ଟ ରହିଛି । ଦେବଗଡ ଥାନା ପୋଲିସ ଶବ ଜବତ କରିବା ସହିତ ଘଟଣାର ତଦନ୍ତ ଆରମ୍ଭ କରିଛି । ସୂଚନା ଥାଉ କି ଉକ୍ତ ମମତା ହୋଟେଲରେ ୨୦୧୯ମସିହାରେ ଢେଙ୍କାନାଳ ଜିଲା ବଳଭଦ୍ରପୁର ଗ୍ରାମର ବିଜୟ କୁମାର ଷଡଙ୍ଗୀଙ୍କ ମଧ୍ୟ ସନ୍ଦେହ ଜନକ ମତ୍ୟୁ ହେଇଥିଲା। ଏହିପରି ଅନେକ ଘଟଣା ନେଇ ମମତା ହୋଟେଲ ଚର୍ଚ୍ଚାକୁ ଆସିଛି।
