ସୁନ୍ଦରଗଡ଼,୨।୮(ଡି.ଏନ୍.ଏ.): ସୁନ୍ଦରଗଡ଼ ଜିଲା ହେମଗିରି ଥାନା ଅଧୀନ ଗର୍ଜନ ବାହାଲ ହାଇସ୍କୁଲ ପଛପଟୁ ମଙ୍ଗଳବାର ସକାଳେ ଜଣେ ଛାତ୍ରଙ୍କ ମୃତଦେହ ମିଳିଛି। ଖବର ପାଇ ହେମଗିରି ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ମୃତ ଛାତ୍ର ଜଣକ ଗର୍ଜନ ବାହାଲ ବିଦ୍ୟାଳୟର ଅଷ୍ଟମ ଶ୍ରେଣୀରେ ପଢୁଥିବା ପ୍ରସାଦ ପଣ୍ଡା(୧୩) ବୋଲି ଜଣାପଡିଛି। ତାଙ୍କ ଘର ଝାରସୁଗୁଡ଼ା ଜିଲା ବେଲପାହାଡ଼ ଗୁମାଡେରା ଗ୍ରାମରେ। ସେ ହଷ୍ଟେଲରେ ରହି ପଢୁଥିଲେ। ଛାତ୍ର ଜଣକ ସ୍କୁଲ ପଛପଟେ ଥିବା ଏକ କୁସୁମ ଗଛକୁ ଚଢିଥିବା ବେଳେ ପାଖରେ ଯାଇଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ଏଭଳି ଅଘଟଣ ଘଟିଥିବା ପୋଲିସ ଅନୁମାନ କରୁଛି।
