ଗଜପତି,୨୭।୧୨(ଗିରିଧାରୀ ପରିଛା): ଗଜପତି ଜିଲା ସଦର ମହକୁମା ପାରଳାଖେମୁଣ୍ଡିରେ ଘଟିଛି ରହସ୍ୟ ଜନକ ହତ୍ୟା କାଣ୍ଡ। ଦୁଇ ଦିନ ନିଖୋଜ ପରେ ଅଖା ବନ୍ଧା ଅବସ୍ଥାରେ ସୀତା ସାଗରରୁ ମିଳିଲା ଗଳିତ ଶବ। ଏହି ହତ୍ୟାରେ ଏକାଧିକ ଲୋକଙ୍କ ସମ୍ପୃକ୍ତି ଥିବା ସନ୍ଦେହ କରାଯାଉଥିବା ବେଳେ ହତ୍ୟାର କାରଣ ଏବେ ମଧ୍ୟ ଅସ୍ପଷ୍ଟ ରହିଛି।
ସିସିଟିଭି ଫୁଟେଜ ଓ ପାରିପାର୍ଶ୍ବିକ ସ୍ଥିତିକୁ ଆଧାର କରି ହତ୍ୟା ମାମଲା ରୁଜୁ କରିବା ସହ ତଦନ୍ତ ଜାରି ରଖିଛି ପାରଳାଖେମୁଣ୍ଡି ପୋଲିସ। ହତ୍ୟାର ଶିକାର ହୋଇଛନ୍ତି ନୁଆଁ କ୍ୟାମ୍ପ ସାହି ବାସିନ୍ଦା କୃଷ୍ଣ ଚନ୍ଦ୍ର ପଣ୍ଡା । ପାରଳାଖେମୁଣ୍ଡି ନୁଆଁ କାମ୍ପ ସାହି ବାସିନ୍ଦା କୃଷ୍ଣଚନ୍ଦ୍ର ପଣ୍ଡା ଗତ ୨୫ ତାରିଖଠାରୁ ଘରକୁ ନ ଆସିବାରୁ ପରିବାର ଲୋକେ ଖୋଜାଖୋଜି କରିବା ସହ ଚାରିଆଡ଼େ ପଚରାଉଚରା କରିବା ପରେ ପାରଳାଖେମୁଣ୍ଡି ଥାନାରେ ସେ ନିଖୋଜ ଥିବା ନେଇ ଲିଖିତ ଅଭିଯୋଗ କରିଥିଲେ।
ଅଭିଯୋଗକୁ ଭିତ୍ତିକରି ପାରଳାଖେମୁଣ୍ଡି ପୋଲିସ କୃଷ୍ଣ ଚନ୍ଦ୍ର ପଣ୍ଡାଙ୍କ ମୋବାଇଲ ଟ୍ରାକିଂ କରି ଅନୁସନ୍ଧାନ ଆରମ୍ଭ କରିଥିଲା । ସେହି ଅଞ୍ଚଳର ସିସିଟିଭିକୁ ଆଧାର କରି ଯେଉଁ ଘରକୁ ଯାଇଥିଲେ ,ସେଠାକାର ସାହି ପଡିଶା ଓ ସ୍ଥାନୀୟ ବାସିନ୍ଦାଙ୍କ ବୟାନ ଅନୁଯାୟୀ ଗତ ୨୫ ତାରିଖ ରାତି ପରଠାରୁ ସେହି ଅଞ୍ଚଳରେ କୃଷ୍ଣ ଚନ୍ଦ୍ରଙ୍କୁ ଦେଖିବାକୁ ପାଇନଥିବା ସ୍ଥାନିତ ଲୋକେ ସୁଚନା ଦେଇଥିଲେ। ହେଲେ ଶେଷଥର ପାଇଁ ଯେଉଁ ଘରକୁ ଯାଇଥିଲେ ସେଠାରେ କୈାଣସି ବ୍ୟକ୍ତି ନାହାନ୍ତି, ଘର ଖୋଲା ପଡୀଥିବା ଦେଖିବାକୁ ପାଇଥିଲା ପୋଲିସ ।
ତେବେ ଗୁରୁବାରଠାରୁ ପୋଲିସ ବିଭିନ୍ନ ଦିଗକୁ ନେଇ ତା’ର ତଦନ୍ତ ଜାରି ରଖିଥିଲା ବେଳେ ଶୁକ୍ରବାର ଅପରାହ୍ନରେ ଜଙ୍ଗମ ସାହି ନିକଟସ୍ଥ ସୀତା ସାଗରରେ ଗୋଟିଏ ବସ୍ତାରେ ବନ୍ଧା ହୋଇ ପଡିଥିବା ଖବର ପାଇ ପୋଲିସ ସନ୍ଦେହରେ ଅଗ୍ନିଶମ ବିଭାଗର ସହାୟତାରେ ବସ୍ତା ଟିକୁ ବାହାର କରି ଦେଖିବା ସମୟରେ ନିଖୋଜ କୃଷ୍ଣ ଚନ୍ଦ୍ର ପଣ୍ଡାଙ୍କ କ୍ଷତ ବିକ୍ଷତ ମୃତଦେହ ଗଳିତ ଅବସ୍ଥାରେ ପାଇଥିଲା । ତେବେ ହତ୍ୟାର କାରଣ ଏଯାବତ ଅସ୍ପଷ୍ଟ ରହିଛି। ପରିବାର ଲୋକେ ମଧ୍ୟ ହତ୍ୟାର କାରଣ କ’ଣ ହୋଇପାରେ ସଠିକ୍ ଭାବରେ କହି ପାରୁନାହାଁନ୍ତି ।
