ଯାଜପୁର ଅଫିସ/କୋରେଇ/ ରଗଡ଼ି(ଡି.ଏନ.ଏ.),୨୫ା୭: ଯାଜପୁର ଜିଲା କୋରେଇ ଥାନା ଗୌରପୁର ପଞ୍ଚାୟତ ଯୁଗଳ ଗ୍ରାମରେ ଏକ ଦମ୍ପତିଙ୍କ ଝୁଲନ୍ତା ମୃତଦେହକୁ ଶନିବାର ପୃଥକ୍ ଭାବେ ଜବତ କରାଯାଇଛି। ସେମାନେ ହେଲେ ଶାନ୍ତନୁ ଜେନା ଏବଂ ତାଙ୍କ ସ୍ତ୍ରୀ ସବିତା। ଶ୍ରମିକ ଭାବେ କାମ କରୁଥିବା ଶାନ୍ତନୁ ୨୦୧୬ରେ ପତ୍ରକଣା ଗ୍ରାମର ସବିତା ଜେନାଙ୍କୁ ବୈଦିକ ରୀତିରେ ବିବାହ କରିଥିଲେ। ୫ ବର୍ଷ ପରେ ବି ସେମାନଙ୍କ କୌଣସି ସନ୍ତାନ ଜନ୍ମ ହୋଇ ନ ଥିଲା। ଏହାକୁ ନେଇ ବିଭିନ୍ନ ସମୟରେ ସବିତାଙ୍କୁ ଟାହିଟାପରା ଶୁଣିବାକୁ ପଡୁଥିଲା। ଏହି ଘଟଣାକୁ ନେଇ ସବିତାଙ୍କ ବାପଘର ଲୋକେ ତାଙ୍କ ଝିଅକୁ ହତ୍ୟା କରାଯାଇଛି ଏବଂ ପରେ ଶାନ୍ତନୁ ଘର ବାହାରେ ଆତ୍ମହତ୍ୟା କରିଛନ୍ତି ବୋଲି କୋରେଇ ଥାନାରେ ଅଭିଯୋଗ କରିଛନ୍ତି। ଅନ୍ୟପକ୍ଷେ ପାରିବାରିକ କଳହ ଏବଂ ଆର୍ଥିକ ଅନଟନରୁ ଉଭୟେ ଆତ୍ମହତ୍ୟା କରିଥିବା ଗ୍ରାମବାସୀ ସନ୍ଦେହ କରିଛନ୍ତି। ଖବର ପାଇ କୋରେଇ ଥାନା ଅଧିକାରୀ ରଞ୍ଜିତ ମହାନ୍ତି ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଦାନଗଦୀ ଡାକ୍ତରଖାନାକୁ ପଠାଇଥିଲେ। ପୋଲିସ ଏ ନେଇ ୧୪/୨୧ ନମ୍ବରରେ ଅପମୃତ୍ୟୁ ମାମଲା ରୁଜୁୁ କରି ତଦନ୍ତ ଚଳାଇଛି।
ପଡ଼ୋଶୀଙ୍କଠାରୁ ମିଳିଥିବା ସୂଚନା ଅନୁଯାୟୀ ବାହାଘରର ୫ ବର୍ଷ ପରେ ବି ସବିତାଙ୍କୁ ସନ୍ତାନ ସୁଖ ମିଳି ନ ଥିବାରୁ ସେ ମାନସିକ ଚାପରେ ରହୁଥିଲେ। ସ୍ବାମୀସ୍ତ୍ରୀଙ୍କ ମଧ୍ୟରେ ଏହାକୁ ନେଇ ବିଭିନ୍ନ ସମୟରେ କଳହ ହେଉଥିଲା। ଶୁକ୍ରବାର ମଧ୍ୟ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା। ରାତିରେ ସେମାନେ ଖାଇ ଶୋଇଥିଲେ। କିଛି ସମୟ ପରେ ଅନ୍ୟ ଏକ କୋଠରୀରେ ସବିତାଙ୍କ ଝୁଳନ୍ତା ମୃତଦେହକୁ ଶାନ୍ତନୁ ଦେଖିବାକୁ ପାଇ ପରିବାର ଲୋକଙ୍କୁ ଡାକ ପକାଇଥିଲେ। ପାଖରେ ରହୁଥିବା ଶାନ୍ତନୁଙ୍କ ପରିବାର ଲୋକେ ଏବଂ ପଡୋଶୀମାନେ ସେଠାରେ ରୁଣ୍ଡ ହୋଇଥିଲେ। ଏହି ସମୟରେ ହଠାତ୍ ଶାନ୍ତନୁ କେଉଁଆଡ଼େ ଚାଲି ଯାଇଥିଲେ। ସେ ଘରକୁ ନ ଫେରିିବାରୁ ପରିବାର ଲୋକେ ଖୋଜାଖୋଜି କରି ପାଇ ନ ଥିଲେ। ଶନିବାର ସକାଳୁ ଶାନ୍ତନୁଙ୍କ ଝୁଲନ୍ତା ଶରୀରକୁ ଘର ବାରିପଟ ଏକ କରଞ୍ଜ ଗଛରେ ଦେଖିବାକୁ ପାଇଥିଲେ। ଏ ସଂକ୍ରାନ୍ତରେ କୋରେଇ ଥାନାଧିକାରୀ ମହାନ୍ତି କହିଛନ୍ତି ଯେ, ସ୍ବାମୀସ୍ତ୍ରୀ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି। କାରଣ ଏଯାଏ ସ୍ପଷ୍ଟ ହୋଇନାହିଁ। ଏନେଇ ତଦନ୍ତ ଚାଲିଛି।
