ବୁଗୁଡ଼ା,୮ା୮(ଡି.ଏନ୍.ଏ.): ଗଞ୍ଜାମ ଜିଲା ବୁଗୁଡ଼ା ଥାନା ଅନ୍ତର୍ଗତ ଭାମଶିଆଳି ଗ୍ରାମର ନିଖୋଜ ଥିବା ଚାଷୀ ସନ୍ତୋଷ ରାଉତ (୫୭)ଙ୍କ ମୃତଦେହ କେନାଲରୁ ସୋମବାର ଉଦ୍ଧାର କରାଯାଇଛି। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ କେସ୍ ନଂ ୨୧/୨୨ରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବା ନେଇ ଆଇଆଇସି ଚିତ୍ତରଞ୍ଜନ ବେହେରାଙ୍କ ଠାରୁ ପ୍ରକାଶ ପାଇଛି।
ଘଟଣାରୁ ପ୍ରକାଶ ଯେ, ଶନିବାର ସକାଳେ ସନ୍ତୋଷ ବିଲକୁ କାମ କରିବାକୁ ଯାଇ ରାତି ସୁଦ୍ଧା ଘରକୁ ଫେରି ନ ଥିଲେ। ପରିବାର ଲୋକେ ବହୁ ଖୋଜାଖୋଜି କରିଥିଲେ ହେଁ ତାଙ୍କୁ ପାଇ ନ ଥିଲେ। ରବିବାର ସକାଳେ ଗାଁର କେନାଲ ହୁଡାରେ ସନ୍ତୋଷଙ୍କ ଚପଲ ଓ ଗାମୁଛା ଦେଖିବାକୁ ମିଳିଥିଲା। ତେବେ କେନାଲକୁ ଶୌଚ ପାଇଁ ଯାଇଥିବା ବେଳେ ସନ୍ତୋଷ କାଳେ ଭାସି ପଳାଇ ଯାଇଥିବେ ବୋଲି ସନ୍ଦେହ କରି ତାଙ୍କର ସ୍ତ୍ରୀ ଶାନ୍ତି ରାଉତ ବୁଗୁଡ଼ା ଥାନାରେ ଅଭିଯୋଗ କରିଥିଲେ। ପୋଲିସ ଓ ଦମକଳବାହିନୀ ଘଟଣାସ୍ଥଳରେ ପହଞ୍ଚି କେନାଲ ସାରା ଖୋଜାଖୋଜି କରାଯାଇଥିଲେ ହେଁ ରବିବାର ରାତି ସୁଦ୍ଧା ସନ୍ତୋଷଙ୍କ ପତ୍ତା ମିଳି ପାରି ନ ଥିଲା। ତେବେ ଆଜି ସକାଳୁ ଡାହାଳିଆଠାରେ କେନାଲ ପାଣିରେ ସନ୍ତୋଷଙ୍କ ମୃତଦେହ ଭାସୁଥିବାର ଦେଖିବାକୁ ମିଳିଥିଲା। ଏନେଇ ପୋଲିସକୁ ଖବର ଦେବା ପରେ ଅଗ୍ନିଶମ ବାହିନୀ କର୍ମଚାରୀ ମୃତଦେହ ଉଦ୍ଧାର କରି ସ୍ଥାନୀୟ ମେଡିକାଲରେ ପହଞ୍ଚାଇ ଥିଲେ।