କୋଣାର୍କ,୬ା୮(ଡି.ଏନ୍.ଏ.): ରାଜ୍ୟରେ କରୋନା ସଂକ୍ରମିତ ସହ ମୃତ୍ୟୁ ସଂଖ୍ୟା ବଢୁଥିବାରୁ ଲୋକେ ଭୟରେ ସାଧାରଣ ରୋଗରେ ମୃତବ୍ୟକ୍ତିଙ୍କୁ ମଧ୍ୟ ସ୍ପର୍ଶ କରୁ ନାହାନ୍ତି। ଏଭଳି ଜଣଙ୍କ ମୃତଦେହକୁ ଉଠାଇବାରେ ଗ୍ରାମବାସୀ ସହାୟତା ନ କରିବାରୁ ଶେଷରେ ଏକ ଟ୍ରଲି ଜରିଆରେ ଶ୍ମଶାନ ନିଆଯାଇଛି। ଏହି ସ୍ପର୍ଶକାତର ଘଟଣା କୋଣାର୍କ ଥାନା ଅନ୍ତର୍ଗତ ବନାଖଣ୍ଡି ପଞ୍ଚାୟତର ମାଙ୍କରଗୋରଡ଼ି ଗ୍ରାମରେ ବୁଧବାର ଦେଖିବାକୁ ମିଳିଛି। ଏହି ଗ୍ରାମର ଜଣେ ୨୭ ବର୍ଷର ଯୁବକ ମଙ୍ଗଳବାର ବିଳମ୍ବିତ ରାତିରେ ପ୍ରାଣ ହରାଇଥିଲେ। ସେ ଗତ୧୦ ଦିନ ହେବ ଜ୍ୱରରେ ପୀଡ଼ିତ ଥିଲେ। ଜ୍ୱର ନ ଛାଡିବାରୁ ଚିକିତ୍ସା ନିମନ୍ତେ ସେ ଗୋପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଯାଇଥିଲେ। ବୁଧବାର ତାଙ୍କ କୋଭିଡ୍ ଟେଷ୍ଟ ହେବାର ଥିଲା। ହେଲେ ଟେଷ୍ଟ ପୂର୍ବରୁ ସେ ପ୍ରାଣ ହରାଇଥିଲେ। ସକାଳୁ ଏହି ଘଟଣା ଜଣାପଡ଼ିବା ପରେ ଯୁବକ ଜଣକ କରୋନା ପଜିଟିଭ ଯୋଗୁ ମୃତ୍ୟୁ ହରାଇଥିବା ଗ୍ରାମରେ ଗୁଜବ ହୋଇଯାଇଥିଲା। ଫଳରେ ଗ୍ରାମବାସୀ ଏହି ପରିବାରକୁ ସହାୟତା କରି ନ ଥିଲେ। ମୃତଦେହକୁ କାନ୍ଧେଇ ଶ୍ମଶାନକୁ ନେବାକୁ ସମସ୍ତେ ଅରାଜି ହୋଇଥିଲେ। ଫଳରେ ମୃତଦେହଟି ବୁଧବାର ମଧ୍ୟାହ୍ନ ପର୍ଯ୍ୟନ୍ତ ଘର ବାରଣ୍ଡାରେ ପଡ଼ିରହିଥିଲା। ଖବରପାଇ କୋଣାର୍କ ଏନଏସି ନିର୍ବାହୀ ଅଧିକାରୀ ଏମ୍. ଶ୍ରୀନିବାସ ମାନବିକତାର ପରିଚୟ ଦେଇଖାଇଥିଲେ। ଉକ୍ତ ପରିବାରକୁ ସହଯୋଗ ପାଇଁ ଏନଏସି ନୋଡାଲ ଅଫିସର ଭାଗୀରଥି ବରାଳ ଏବଂ ଅନ୍ୟ ଦୁଇ ଜଣଙ୍କୁ ଘଟଣାସ୍ଥଳକୁ ପଠାଇଥିଲେ। ପରେ ଅଧିକାରୀଙ୍କ ସହ କେତେଜଣ କର୍ମଚାରୀ ଆସି ପିପିଇ କିଟ୍ ଦେବା ପରେ ସମ୍ପର୍କୀୟଙ୍କ ସମେତ ଏହି ଗ୍ରାମର ୨ ଜଣ ଟ୍ରଲିରେ ମୃତଦେହକୁ ନେଇ ନିକଟସ୍ଥ ଗ୍ରାମ ଶ୍ମଶାନରେ ଦାହ କରିଥିଲେ।
