ପୁରୀ ଅଫିସ,୨୨।୧୧: ପୋଲିସ ହେପାଜତରେ କେ. ରମେଶଙ୍କ ମୃତ୍ୟୁକୁ ନେଇ ଉତ୍ତେଜନା ଲାଗିରହିଛି। ପୋଲିସର ଏଭଳି କାର୍ଯ୍ୟକୁ ତୀବ୍ର ବିରୋଧ କରାଯାଉଛି। ଏଭଳି ସ୍ଥିତିରେ ଶନିବାର ମୃତକଙ୍କ ପରିବାରକୁ ଭେଟିଛନ୍ତି ଭାଜପାର ରାଷ୍ଟ୍ରୀୟ ମୁଖପାତ୍ର ଡା. ସମ୍ବିତ ପାତ୍ର। ମୋଚିସାହିସ୍ଥିତ କେ. ରମେଶଙ୍କ ଘରକୁ ଯାଇ ତାଙ୍କ ଦାଦା ଏବଂ ସମ୍ପର୍କୀୟଙ୍କ ସହ ଆଲୋଚନା କରି ସାନ୍ତ୍ୱନା ଦେଇଛନ୍ତି । କିଭଳି ଏବଂ କେଉଁ ପରିସ୍ଥିତିରେ ଏସବୁ ଘଟିଲା ତାହା ମଧ୍ୟ ପଚାରି ବୁଝିଛନ୍ତି। ଏହା ହାଜତ ମୃତ୍ୟୁ ନୁହେଁ, ହାଜତରେ ହତ୍ୟା ବୋଲି କହିବା ସହିତ ତୁରନ୍ତ ଏହି ଘଟଣା ପାଇଁ ଦାୟୀ ପୋଲିସ ଅଧିକାରୀଙ୍କ ବିରୋଧରେ ହତ୍ୟାମାମଲା ରୁଜୁ କରିବାକୁ ସମ୍ବିତ ଦାବି କରିଛନ୍ତି।
ଗଣମାଧ୍ୟମକୁ ପ୍ରତିକ୍ରିୟା ଦେଇ ସମ୍ବିତ୍ କହିଛନ୍ତି, ଏହା ନିଶ୍ଚିତ ଏକ ହୃଦୟବିଦାରକ ଘଟଣା । ଏନେଇ ସେ ଶୁକ୍ରବାର ଜାତୀୟ ମାନବାଧିକାର ଆୟୋଗ (ଏନ୍ଏଚ୍ଆରସି)ଙ୍କୁ ଭେଟିଥିଲେ। ଏନ୍ଏଚ୍ଆର୍ସି ମଧ୍ୟ ନୋଟିସ କରିଛନ୍ତି । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ରମେଶଙ୍କ ମୃତଦେହକୁ ହସ୍ପିଟାଲ ପଛ ଦ୍ୱାରରେ ନେଇ ତରବରିଆ ଭାବେ ଦାହ କରାଯାଇଛି। ହିନ୍ଦୁ ପରମ୍ପରାରେ ଦାହ ପୂର୍ବରୁ ଯାହାସବୁ କରାଯିବା କଥା ତାହା କରାଯାଇ ନାହିଁ। ମୃତଦେହକୁ ମଧ୍ୟ ସମ୍ମାନ ଦିଆଗଲାନି, ଏହା ଅଧର୍ମ। ଗରିବ ଲୋକଙ୍କ ସହିତ ଏଭଳି ଅନ୍ୟାୟ ଉଚିତ୍ ନୁହେଁ। କେ. ରମେଶ ଆତଙ୍କବାଦୀ ନ ଥିଲେ ଯେ ତାଙ୍କୁ ଏମିତି ବାଡ଼େଇ ମାରିଦିଆଗଲା ବୋଲି ପ୍ରଶ୍ନ କରିଛନ୍ତି ସମ୍ବିତ। ଏନ୍ଏଚ୍ଆର୍ସି ନିଶ୍ଚିତ ଏହାର ସତ୍ୟତା ବାହାର କରିବେ। ତେବେ ପୋଲିସର ଏଭଳି ବର୍ବରତା ଉଚିତ ନୁହେଁ। ଏଥିରେ ସମ୍ପୃକ୍ତ ପୋଲିସ କର୍ମଚାରୀଙ୍କ ବିରୋଧରେ ୩୦୨ ଦଫା ଲଗାଇ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଏଥିସହ ମୃତକଙ୍କ ପରିବାରକୁ ରାଜ୍ୟ ସରକାର ୧ କୋଟି ଟଙ୍କା ପ୍ରଦାନ କରନ୍ତୁ ବୋଲି ସମ୍ବିତ କହିଛନ୍ତି।
ଅପରପକ୍ଷରେ କେ. ରମେଶଙ୍କ ମା, ବାପା ଓ ଦାଦାଙ୍କୁ ପୋଲିସ ନେଇ କେଉଁଠି ରଖିଛି ତାହା ସେମାନେ ଜାଣି ନ ଥିବା ତାଙ୍କ ସମ୍ପର୍କୀୟମାନେ ଗଣମାଧ୍ୟମ ସମ୍ମୁଖରେ ଅଭିଯୋଗ କରିଥିଲେ। ପୋଲିସର ଏଭଳି କାର୍ଯ୍ୟକୁ ସମସ୍ତେ ତୀବ୍ର ବିରୋଧ କରୁଥିବାବେଳେ ଶୁକ୍ରବାର ରାତିରେ ଘରକୁ ଫେରିଛନ୍ତି କେ. ରମେଶଙ୍କ ଦାଦା କେ. ଆରିୟା। ପୋଲିସ ତାଙ୍କ ଭାଇ ଓ ଭାଉଜଙ୍କୁ ଛାଡ଼ିଛି, ମାତ୍ର ସେ କେଉଁଠି ଅଛନ୍ତି ଜଣାପଡ଼ିନି ବୋଲି ଗଣମାଧ୍ୟମକୁ ଆରିୟା କହିଛନ୍ତି।