ଗୁଆହାଟୀ,୨୩।୫: ଆସାମର ନାଗାଁଓ ଜିଲାରେ ହାଜତ ମୃତ୍ୟୁ ଅଭିଯୋଗକୁ ନେଇ ଶନିବାର ଉତ୍ତ୍ୟକ୍ତ ଲୋକେ ଏକ ଥାନା ଉପରେ ଆକ୍ରମଣ କରିବା ସହ ନିଆଁ ଲଗାଇଦେଇଥିଲେ। ଏଥିରେ ୩ ଜଣ ଆହତ ହୋଇଥିଲେ। ଏହାର ଦିନକ ପରେ ହିଂସାକାଣ୍ଡରେ ସମ୍ପୃକ୍ତ ଅଭିଯୁକ୍ତମାନଙ୍କ ଘରକୁ ପୋଲିସ ବୁଲ୍ଡୋଜର ଲଗାଇ ଭାଙ୍ଗିଦେଇଛି। ଅନ୍ୟପକ୍ଷରେ ଜବରଦଖଲ ଉଚ୍ଛେଦ ଲାଗି ସେମାନଙ୍କ ଘର ଭଙ୍ଗାଯାଇଥିବା ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି।
ନାଗାଁଓର ଧିଙ୍ଗ ଅଞ୍ଚଳ ଅନ୍ତର୍ଗତ ବଟଦ୍ରଭା ଥାନାରେ ଜଣେ ସ୍ଥାନୀୟ ବ୍ୟକ୍ତିଙ୍କର ହାଜତ ମୃତ୍ୟୁ ଘଟିଥିବା ଅଭିଯୋଗ ହୋଇଥିଲା। ଏହି ଘଟଣାର ବିଚାର ବିଭାଗୀୟ ତଦନ୍ତ ଲାଗି ଜିଲା ପ୍ରଶାସନ ନିର୍ଦ୍ଦେଶ ଦେଇଥିବାବେଳେ ଥାନା ଭାରପ୍ରାପ୍ତ ଅଧିକାରୀଙ୍କୁ ନିଲମ୍ବନ କରାଯାଇଛି। ଏହା ସତ୍ତ୍ୱେ ଶନିବାର ଅପରାହ୍ନରେ ସାଲୋନାବୋରି ଗ୍ରାମର ୪୦ରୁ ଊର୍ଦ୍ଧ୍ୱ ଲୋକେ ଉକ୍ତ ଥାନାରେ ନିଆଁ ଲଗାଇଦେଇଥିଲେ। ଫଳରେ ଯେସାକୁ ତେସା ନୀତି ସ୍ବରୂପ ରବିବାର ସକାଳେ ସାଲୋନାବୋରି ଗ୍ରାମରେ ବୁଲ୍ଡୋଜର ପହଞ୍ଚତ୍ ଥାନାପୋଡ଼ିରେ ସମ୍ପୃକ୍ତଙ୍କ ଘର ଭାଙ୍ଗିଥିଲା। ହିଂସାକାଣ୍ଡ ଘଟାଇଥିବା ୭ ଜଣଙ୍କୁ ଗିରଫ କରାଯାଇଥିବାବେଳେ ଅନ୍ୟ ୨୧ ଜଣଙ୍କୁ ପୋଲିସ ଥାନାକୁ ନେଇ ପଚରାଉଚରା ଚଳାଇଛି। ହାଜତ ମୃତ୍ୟୁ ପାଇଁ ଯେଉଁ ପୋଲିସ ଅଧିକାରୀ ଦାୟୀ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ଏଭଳି ଅଭିଯୋଗ ପାଇଁ ଥାନା ପୋଡ଼ିଦେବାକୁ ବରଦାସ୍ତ କରାଯିବ ନାହିଁ ବୋଲି ଆସାମ ସ୍ପେଶାଲ ପୋଲିସ ମହାନିର୍ଦ୍ଦେଶକ (ଆଇନ ଶୃଙ୍ଖଳା) ଜି.ପି. ସିଂ କହିଛନ୍ତି। ପୋଲିସ ଆକ୍ରମଣକାରୀଙ୍କ ଘର ଭାଙ୍ଗିବାକୁ ବିରୋଧୀ ଦଳ ସମାଲୋଚନା କରିଛି। ପୋଲିସ ମାନବାଧିକାର ଉଲ୍ଲଂଘନ କରିଥିବା କଂଗ୍ରେସ ଏମ୍ପି ଅବଦୁଲ ଖାଲେକ୍ ଟୁଇଟ୍ କରିଛନ୍ତି।
ସୂଚନାଯୋଗ୍ୟ, ମଦ ପିଇ ଗାଳିଗୁଲଜ କରିବା ଅଭିଯୋଗରେ ସାଲୋନାବୋରି ଗ୍ରାମର ମାଛ ବ୍ୟବସାୟୀ ସୋଫିକୁଲ ଇସ୍ଲାମଙ୍କୁ ପୋଲିସ ଶୁକ୍ରବାର ରାତିରେ ଥାନାକୁ ନେଇଥିଲା। ପରଦିନ ସକାଳେ ତାଙ୍କର ମୃତ୍ୟୁ ଘଟିଥିଲା।