ଫୁଲବାଣୀ ଅଫିସ, ୧୩ା୨: କନ୍ଧମାଳ ଜିଲା କାରାଗାରରେ ଆଜୀବନ ସଜା ଭୋଗୁଥିବା ଜଣେ କଏଦୀଙ୍କର ଫୁଲବାଣୀ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି । ସେ ହେଲେ ଦାରିଙ୍ଗବାଡି ଥାନା ଅନ୍ତର୍ଗତ କାରାମାହା ଗ୍ରାମର କାହ୍ନୁ ଚରଣ ପ୍ରଧାନ(୬୧)।
ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ କରାଇବା ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଜେଲ ଅଧୀକ୍ଷକ ଶର୍ମିଷ୍ଠା ପୃଷ୍ଟିଙ୍କ ସୂଚନା ଅନୁସାରେ, ୨୦୧୬ରେ କାହ୍ନୁ ଏକ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇ ଆଜୀବନ ଜେଲ ଭୋଗୁଥିଲେ। ୨୦୧୮ରେ ଜେଲ ଭିତରେ ଅନ୍ୟ ଜଣେ କଏଦୀଙ୍କୁ ମଧ୍ୟ ସେ ହତ୍ୟା କରିଥିଲେ। ଶୁକ୍ରବାର କାହ୍ନୁଚରଣ ଅସୁସ୍ଥ ହେବାରୁ ରାତି ୯ଟାରେ ମେଡିକାଲକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା ।
