କୋକସରା,୪।୧୨(ଡି.ଏନ୍.ଏ.): ସିକନ୍ଦରାବାଦରେ ପୁଣି ଜଣେ ଓଡ଼ିଆ ଦାଦନ ଶ୍ରମିକଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ସେ ହେଲେ କଳାହାଣ୍ଡି ଜିଲା କୋକସରା ଥାନା ଅଧୀନ ଗମ୍ଭାରୀଗୁଡ଼ା ପଞ୍ଚାୟତ ସର୍ଲିଗୁଡ଼ା ଗ୍ରାମର ତେଜରାଜ ନାଏକ(୨୭)। ଅନ୍ୟପକ୍ଷେ ଦୁଇମାସ ମଧ୍ୟରେ କୋକସରା ବ୍ଲକର ବିଭିନ୍ନ ଗ୍ରାମରୁ ୮ଜଣ ଦାଦନ ଶ୍ରମିକଙ୍କ ମୃତ୍ୟୁ ଘଟିଛି। ଅନ୍ୟପକ୍ଷେ ଦାଦନ ସସସ୍ୟା ରୋକିବାରେ ସରକାରଙ୍କ ବିଭିନ୍ନ ଯୋଜନା ଦିଗହରା ହୋଇଛି।
ମିଳିଥିବା ସୂଚନା ମୁତାବକ, ତେଜରାଜ ୭ ମାସ ତଳେ ଗାଁର କିଛି ଯୁବକଙ୍କ ସହ ପେଟପାଟଣା ପାଇଁ ସିକନ୍ଦରାବାଦକୁ ଦାଦନ ଖଟିବାକୁ ଯାଇଥିଲେ। ପରେ ସେ କାମପାଳିର ଏକ ଠିକାସଂସ୍ଥାରେ ଶ୍ରମିକ ଭାବେ ନିୟୋଜିତ ହୋଇ କାମ କରୁଥିଲେ। ହେଲେ ଶନିବାର ଅପରାହ୍ନରେ କୌଣସି କାରଣ ବଶତଃ ସେ ବିଦ୍ୟୁତ୍ ତାର ସଂସ୍ପର୍ଶରେ ଆସି ଗୁରୁତର ହୋଇପଡ଼ିଥିଲେ। ତାଙ୍କୁ ସ୍ଥାନୀୟ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା। ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ସାଥୀ ଶ୍ରମିକମାନେ ପରିବାର ଲୋକଙ୍କୁ ଘଟଣା ସମ୍ପର୍କରେ ସୂଚନା ଦେଇଥିଲେ। ଖବର ପାଇ ଘରେ କାନ୍ଦ ବୋବାଳି ପଡ଼ିଥିଲା। ଏନେଇ ପରିବାର ଲୋକେ କୋକସରା ଥାନାକୁ ଜଣାଇବା ସହ ମୃତଦେହ ଆଣିବାକୁ ସିକନ୍ଦରାବାଦ ଯାଇଥିଲେ। ସେଠାରୁ ଏକ ଆମ୍ବୁଲାନ୍ସ ଯୋଗେ ମୃତଦେହ ଧରି ଗାଁକୁ ଫେରୁଥିବା ସୂଚନା ମଳିଛି।
