କୋକସରା:୨୩।୯(ଡି.ଏନ୍.ଏ.): ଦାଦନ ଖଟିବାକୁ ହାଇଦ୍ରାବାଦ ଯାଇଥିଲେ ସ୍ବାମୀ, ସ୍ତ୍ରୀ। ଶୁକ୍ରବାର ଘରକୁ ଫେରିବା ବେଳେ ବସ୍ରୁ ଓହ୍ଲାଇବା ପରେ ହଠାତ୍ ସ୍ବାମୀଙ୍କ ମୃତ୍ୟୁ ଘଟିଛି। ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କୋକସରା ବ୍ଲକ ଆମପାଣି ବସ୍ଷ୍ଟାଣ୍ଡରେ।
ମିଳିଥିବା ସୂଚନା ମୁତାବକ, ଜୁନାଗଡ଼ ଥାନା ଦାସିଗାଁ ତାଳପଦର ଗାଁର ଜଳଧର ନିଆଲ (୫୫) ଏବଂ ତାଙ୍କର ସ୍ତ୍ରୀ ସୁଶିଳା ନିଆଲ ଦେଢ଼ ମାସ ତଳେ ଦାଦନ ଖଟିବାକୁ ହାଇଦ୍ରାବାଦ ଯାଇଥିଲେ। ଶୁକ୍ରବାର ଏକ ଘରୋଇ ବସ୍ ଯୋଗେ ଘରକୁ ଫେରୁଥିଲେ । ହେଲେ ବସ୍ଟି ସିନାପାଲି ଯାଉଥିବା ବେଳେ ଆମପାଣି ବସ୍ଷ୍ଟାଣ୍ଡରେ ସେମାନେ ଓହ୍ଲାଇଥିଲେ। ଏହାର କିଛି ସମୟ ପରେ ଜଳଧର ଅସୁସ୍ଥ ହୋଇପଡ଼ିବାରୁ ସେଠାରେ ତାଙ୍କର ମୃତ୍ୟୁ ଘଟିଥିଲା। ଅନ୍ୟପକ୍ଷେ କିଛି ଦିନ ହେବ ଜଳଧରଙ୍କୁ ଜ୍ୱର ହେଉଥିବା ନେଇ ସ୍ତ୍ରୀ ସୁଶିଳା କହିଛନ୍ତି। ତେବେ ମୃତଦେହ ବସଷ୍ଟାଣ୍ଡରେ ଦୀର୍ଘ ସମୟ ଧରି ପଡ଼ିରହିବା ପରେ ସ୍ଥାନୀୟ ଲୋକଙ୍କଠାରୁ ଖବର ପାଇ ଆମପାଣି ଥାନା ପୋଲିସ ପହଞ୍ଚି ମୃତଦେହ ଜବତ କରିଥିଲା। ଏନେଇ ଆମପାଣି ଥାନା ପୋଲିସ ଏକ ମାମଲା(ନଂ. ୬/୨୨) ରୁଜୁ କରି ତଦନ୍ତ ଆରମ୍ଭ କରିଥିବା ଥାନା ଏଏସ୍ଆଇ ଅକ୍ଷୟ ଜାଲ କହିଛନ୍ତି।