ଲକ୍ଷ୍ନୌ, ୮।୯: ଉତ୍ତର ପ୍ରଦେଶର ଗୋଣ୍ଡା ଜିଲାରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। କୂଅରେ ପଡ଼ିଥିବା ଏକ ବାଛୁରୀକୁ ଉଦ୍ଧାର କରିବାକୁ ଯାଇ ୫ ଜଣ ଯୁବକ ମୃତ୍ୟୁବରଣ କରିଛନ୍ତି। ଜଣଙ୍କ ପରେ ଜଣେ ଯୁବକ କୂଅ ମଧ୍ୟକୁ ଯାଇଥିଲେ ମଧ୍ୟ ବିଷାକ୍ତ ଗ୍ୟାସ ଲାଗି ସମସ୍ତେ ଭିତରରେ ଚେତାଶୂନ୍ୟ ହୋଇ ପାଣିରେ ପଡ଼ି ବୁଡ଼ି ଯାଇଥିଲେ।
ଘଟଣାଟି ଜିଲାର ନଗର କୋତାବଳୀ ଅଞ୍ଚଳରେ ଘଟିଛି। ଅଘଟଣ ଘଟିବା ପରେ ସ୍ଥାନୀୟ ଲୋକ ଅଗ୍ନିଶମ ବିଭାଗ ଓ ପୋଲିସକୁ ଖବର ଦେଇଥିଲେ। ପୋଲିସ ଓ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚିବା ପରେ ଲୋକମାନେ କହିଥିଲେ ଯେ, ଗୋଟିଏ ବାଛୁରୀ କୂଅ ମଧ୍ୟରେ ଗଳି ପଡ଼ିଥିଲା। ଏହାକୁ ଉଦ୍ଧାର କରିବାକୁ ପ୍ରଥମେ ଜଣେ ଯୁବକ କୂଅ ମଧ୍ୟକୁ ପ୍ରବେଶ କରିଥିଲେ। ସେ ବାଛୁରୀକୁ ଦୌଡ଼ିରେ ବାନ୍ଧି ଏହାକୁ ବାହାର କରି ଦେଇଥିଲେ ମଧ୍ୟ ନିଜେ ଭିତରେ ସଂଜ୍ଞାହୀନ ହୋଇ ପାଣିରେ ପଡ଼ି ବୁଡ଼ିଯାଇଥିଲେ। ଏହାପରେ ତାଙ୍କୁ ଉଦ୍ଧାର କରିବାକୁ ଆଉ ଜଣେ ଯୁବକ କୂଅ ମଧ୍ୟକୁ ଯାଇଥିଲେ ମଧ୍ୟ ସେ ସଂଜ୍ଞାହୀନ ହୋଇ ବୁଡ଼ିଯାଇଥିଲେ। ଏପରି ଭାବେ ଜଣଙ୍କ ପରେ ଜଣେ ଏପରି ଭାବେ ଆଉ ୪ ଜଣ ଯୁବକ କୂଅ ମଧ୍ୟକୁ ପଶିଥିଲେ ମଧ୍ୟ ସମାନ କାରଣ ଲାଗି ବୁଡ଼ିଯାଇଥିଲେ। କୂଅ ଭିତରେ ବିଷାକ୍ତ ଗ୍ୟାସ ଥିବା ସନ୍ଦେହ କରାଯାଉଛି। ପ୍ରଶାସନ ପକ୍ଷରୁ କଠିନ ପରିଶ୍ରମ କରାଯାଇ ଜଣଙ୍କ ପରେ ଜଣେ ୫ଜଣ ଯୁବକଙ୍କ ମୃତ ଦେହ ଉଦ୍ଧାର କରାଯାଇଛି। ସମସ୍ତଙ୍କ ବୟସ ୨୫ ବର୍ଷ ମଧ୍ୟରେ ହେବ ବୋଲି ଜଣାପଡ଼ିଛି। ଏପରିକି ଗୋଟିଏ ପରିବାରର ୪ ଜଣ ସଦସ୍ୟ ରହଛନ୍ତି। ସ୍ଥାନୀୟ ବାସିନ୍ଦାଙ୍କ କହିବାନୁଯାୟୀ, କୂଅରେ ଲୋକମାନେ ଅଳିଆ ଆବର୍ଜନା ପକାଇଥାନ୍ତି। ଯେଉଁଥି ପାଇଁ ଭିତରେ ବିଷାକ୍ତ ଗ୍ୟାସ ସୃଷ୍ଟି ହୋଇଥିବା ଅନୁମାନ କରାଯାଉଛି।