ଅହମ୍ମଦାବାଦ,୭।୧୨: ଅର୍ଥନୀତିଜ୍ଞ ତଥା ପୂର୍ବତନ କେନ୍ଦ୍ରମନ୍ତ୍ରୀ ଯୋଗିନ୍ଦର କେ. ଅଲାଘ ମଙ୍ଗଳବାର ଶେଷନିଶ୍ୱାସ ତ୍ୟାଗ କରିଛନ୍ତି। ୮୩ ବର୍ଷୀୟ ଯୋଗିନ୍ଦର ବାର୍ଦ୍ଧକ୍ୟ କାରଣରୁ ବହୁବିଧ ରୋଗରେ ପୀଡ଼ିତ ଥିଲେ। କିଛିଦିନ ପୂର୍ବେ ସର୍ଦ୍ଦାର ପଟେଲ ଇନ୍ଷ୍ଟିଚ୍ୟୁଟ୍ ଅଫ୍ ଇକୋନୋମିକ୍ ଆଣ୍ଡ୍ ସୋସିଆଲ ରିସର୍ଚ୍ଚ ପ୍ରଫେସର ଯୋଗିନ୍ଦରଙ୍କ ଦେହ ସମ୍ପୂର୍ଣ୍ଣ ବିଗିଡ଼ି ଯାଇଥିବା ତାଙ୍କ ପୁଅ ମୁନିଶ ଅଲାଘ ସୂଚନା ଦେଇଛନ୍ତି। ୧୯୩୯ରେ ଚକଓ୍ବାଲରେ ଯୋଗିନ୍ଦର ଜନ୍ମ ଗ୍ରହଣ କରିଥିଲେ। ଭାରତ ବିଭାଜନ ପରେ ଚାକଓ୍ବାଲ ଏବେ ପାକିସ୍ତାନରେ ଆସୁଛି। ପେନସିଲଭାନିଆ ୟୁନିଭର୍ସିଟିରେ ସେ ଅର୍ଥନୀତିରେ ଡକ୍ଟରେଟ୍ ଡିଗ୍ରୀ ହାସଲ କରିଥିଲେ। ଦିଲ୍ଲୀ ଜବାହରଲାଲ ନେହରୁ ୟୁନିଭର୍ସିଟି (ଜେଏନ୍ୟୁ)ରେ କୁଳପତି ଭାବେ ଦାୟିତ୍ୱ ଗ୍ରହଣ କରିଥିବା ଯୋଗିନ୍ଦର ୧୯୯୬-୯୮ ପର୍ଯ୍ୟନ୍ତ ଭାରତର ବିଜ୍ଞାନ ଓ ପ୍ରଯୁକ୍ତି ବିଭାଗ ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ୱ ସମ୍ପାଦନ କରିଥିଲେ।