ହିଞ୍ଜିଳିକାଟୁ,୭।୪(ଡି.ଏନ୍.ଏ.): ମୁମ୍ବାଇ ସାକିନାକାସ୍ଥିତ ଜଗନ୍ନାଥ ମନ୍ଦିରର ପ୍ରତିଷ୍ଠାତା ତଥା ହିଞ୍ଜିଳିର ଜଣେ ଜଣାଶୁଣା ବ୍ୟକ୍ତି ରମେଶ ମୁନିଙ୍କ ଶୁକ୍ରବାର ପରଲୋକ ହୋଇଛି। ହିଞ୍ଜିଳି ଦେଉଳ ବନ୍ଧରେ ବୁଡ଼ି ତାଙ୍କର ମୃତ୍ୟୁ ଘଟିଛି। ଏହି ଦୁଃଖଦ ଖବର ନେଇ ହିଞ୍ଜିଳିକାଟୁ ସମେତ ମୁମ୍ବାଇରେ ରହୁଥିବା ଓଡ଼ିଆଙ୍କ ମଧ୍ୟରେ ଗଭୀର ଶୋକ ପ୍ରକାଶ ପାଇଛି।
ମିଳିଥିବା ସୂଚନା ମୁତାବକ, ହିଞ୍ଜିଳି ବଡ଼ସାହିର ଜଣେ ବ୍ୟକ୍ତିଙ୍କ ଶୁକ୍ରବାର ସକାଳେ ମୃତ୍ୟୁ ଘଟିଥିଲା। ଏହି ଖବର ପାଇ ରମେଶ ଅନ୍ୟମାନଙ୍କ ସହ ଅନ୍ତ୍ୟେଷ୍ଟିକ୍ରିୟାରେ ଯୋଗଦେଇଥିଲେ। ମଧ୍ୟାହ୍ନରେ ଶଶ୍ମାନରୁ ଫେରି ଘର ସମ୍ମୁଖରେ ଥିବା ଦେଉଳ ବନ୍ଧକୁ ଗାଧୋଇବାକୁ ଯାଇଥିଲେ। ପହଁରିବା ପାଇଁ ସେ କିଛିଦୂର ପୋଖରୀ ଭିତରକୁ ଯାଇ ଆଉ କୂଳକୁ ଆସିପାରି ନ ଥିଲେ। ନିକଟରେ ଥିବା ଅନ୍ୟମାନେ ତାଙ୍କୁ ଗଭୀର ପାଣିରୁ ଉଦ୍ଧାର କରି ହିଞ୍ଜିଳିକାଟୁ ଉପଖଣ୍ଡ ଡାକ୍ତରଖାନାକୁ ଆଣିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଖବର ପ୍ରଚାର ହେବା ପରେ ଅଞ୍ଚଳରେ ଶୋକ ଖେଳିଯାଇଛି।
୪ ଦିନ ତଳେ ରମେଶ ମୁମ୍ବାଇରୁ ହିଞ୍ଜିଳି ଆସିଥିଲେ। ମୁଖ୍ୟତଃ ରମେଶ ତାଙ୍କ ପରିବାର ସହ ମୁମ୍ବାଇରେ ରହୁଥିଲେ। ଏହି ଦୁଃଖଦ ଖବର ମୁମ୍ବାଇରେ ରହୁଥିବା ତାଙ୍କ ପରିବାରକୁ ଜଣାଯାଇଛି। ହିଞ୍ଜିଳି ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ମେଡିକାଲ ପଠାଇଛନ୍ତି। ଏନେଇ ଥାନାରେ ଏକ ମାମଲା(ନଂ.୭/୨୩) ରୁଜୁ ହୋଇ ଘଟଣାର ତଦନ୍ତ ଚାଲିଥିବା ଥାନା ଆଇଆଇସି ଅଭିମନ୍ୟୁ ଦାସ ପ୍ରକାଶ କରିଛନ୍ତି।
