ଭୁବନେଶ୍ୱର, ୧୮।୪(ବ୍ୟୁରୋ): ବିଶିଷ୍ଟ ଅର୍ଥନୀତିଜ୍ଞ ପ୍ରଫେସର ଡ. ଘନଶ୍ୟାମ ଦାସଙ୍କର ରବିବାର ବରମୁଣ୍ଡାସ୍ଥିତ ବାସଭବନରେ ପରଲୋକ ହୋଇଯାଇଛି। ତାଙ୍କୁ ୯୩ବର୍ଷ ବୟସ ହୋଇଥିଲା। ପ୍ରଫେସର ଦାସ କଟକଠାରେ ଜନ୍ମଗ୍ରହଣ କରିଥିଲେ। ରେଭେନ୍ଶାରେ ଶିକ୍ଷାଗ୍ରହଣ ପରେ ସେ କମନ୍ଓ୍ବେଲ୍ଥ ସ୍କଲାର ଭାବେ ଲଣ୍ଡନ ସ୍କୁଲ ଅଫ୍ ଇକୋନୋମିକ୍ସରେ ଉଚ୍ଚଶିକ୍ଷା ଶେଷ କରିଥିଲେ। ସେ ଆର୍ବିଆଇ ଚେୟାର ପ୍ରଫେସର ଅଫ୍ ଇକୋନୋମିକ୍ସ ରହିବା ସହ ୟୁନିୟନ ପବ୍ଲିକ ସର୍ଭିସ କମିଶନ (ୟୁପିଏସ୍ସି)ର ସବ୍ଜେକ୍ଟ ଏକ୍ସପର୍ଟ ମେମ୍ବର ଆଦି ବହୁ ଗୁରୁତ୍ୱପୂର୍ଣ୍ଣ ପଦବୀରେ ଅବସ୍ଥାପିତ ହୋଇଥିଲେ। ଶେଷରେ ଉଚ୍ଚଶିକ୍ଷା ବିଭାଗରେ ଡିପିଆଇ ଭାବେ ଅବସର ନେଇଥିଲେ। ଏଥିସହ ଚିଲିକା ମତ୍ସ୍ୟଚାଷ ପାଇଁ ଫ୍ୟାକ୍ଟ ଫାଇଣ୍ଡିଂ କମିଟିର ମୁଖ୍ୟ ଭାବେ ଉଚ୍ଚ ନ୍ୟାୟାଳୟ ଦ୍ୱାରା ନିଯୁକ୍ତ ହୋଇଥିଲେ। ୧୯୯୩ରେ ଓଡ଼ିଶା ସରକାରଙ୍କ ନିକଟରେ ସେ ଦାଖଲ କରିଥିବା ରିପୋର୍ଟକୁ ପରେ ଅନୁସନ୍ଧାନକାରୀମାନେ ଚିଲିକା ମତ୍ସ୍ୟଚାଷ ଉପରେ ଅଧ୍ୟୟନ କରିଥିଲେ। ତେବେ ଅବସର ପରେ ପ୍ରଫେସର ଦାସ ଅର୍ଥନୀତିରେ ପ୍ରଫେସର ଏମରିଟସ୍ ଭାବେ କାର୍ଯ୍ୟ କରୁଥିଲେ। ରାଜ୍ୟ ଏକାଡେମିକ ସର୍କଲରେ ସ୍ବର୍ଗତ ଦାସଙ୍କ ମହତ୍ତ୍ୱପୂର୍ଣ୍ଣ ଅବଦାନ ରହିଛି। ସେ ୧୯୯୮ରେ ତାଙ୍କ ସ୍ତ୍ରୀ କଳ୍ପନା ଦାସ ଏବଂ ୧୯୯୪ରେ ସାନ ଝିଅକୁ ହରାଇଥିଲେ। ବଡ଼ ଝିଅ, ଦୁଇ ପୁଅ, ବୋହୂ, ନାତୁଣୀ ଓ ଅଣନାତୁଣୀଙ୍କ ସହ ରହୁଥିଲେ। ବଡ଼ଝିଅଙ୍କ ବାସଭବନରେ ଶେଷ ଦର୍ଶନ ପରେ ସ୍ବର୍ଗତ ଦାସଙ୍କ ପାର୍ଥତ୍ବ ଶରୀରକୁ ପୁରୀ ନିଆଯାଇ ସ୍ବର୍ଗଦ୍ୱାରରେ ଶେଷକୃତ୍ୟ ସମ୍ପନ୍ନ କରାଯାଇଥିଲା।