ବାରଙ୍ଗ,୨୪।୩(ଡି.ଏନ୍.ଏ.)- ପ୍ରାଣୀ ଉଦ୍ୟାନ ନନ୍ଦନକାନନରେ ଗୁରୁବାର ଏକ କୋକିଶିଆଳିର ମୃତ୍ୟୁ ଘଟିଥିବାବେଳେ ଶୁକ୍ରବାର ଏକ ଧଳାମୟୂର ମୃତ୍ୟୁ କରିଛି। ପ୍ରାୟ ୫ ବର୍ଷର ଏହି ଧଳାମୟୂରଟି ଗତଦୁଇଦିନ ହେବ ଅସୁସ୍ଥ ହେବା ସହ ଛୋଟେଇ ଛୋଟେଇ ଚାଲୁଥିଲା। ସେ ରହୁଥିବା ପକ୍ଷୀଶାଳାର ୬୭ନଂ. ଏନକ୍ଲୋଜରରେ ଇଞ୍ଜେକ୍ସନ ଦିଆଯାଇ ଚିକିତ୍ସା ଆରମ୍ଭ କରାଯାଇଥିଲେ ମଧ୍ୟ ସୁସ୍ଥ ହୋଇ ନ ଥିଲା। ସ୍ବାସ୍ଥ୍ୟାବସ୍ଥାରେ ପରିବର୍ତ୍ତନ ନ ହେବାରୁ ଶୁକ୍ରବାର ଅପରାହ୍ନ ୩ଟାରେ ଉକ୍ତ ମୟୂରକୁ ନିଶା ଇଞ୍ଜେକ୍ସନ ଦିଆଯାଇ ଡାକ୍ତରଖାନାକୁ ଅଣାଯାଇଥିଲା। ସେଠାରେ ତା’ର ଚିକିସା ଆରମ୍ଭ ସହ ଛୋଟେଇବାର ପ୍ରକୃତ କାରଣ ଜଣାପଡିଥିଲା। ତା’ପେଟରେ ଏକ ଅଣ୍ଡା ଥିବାରୁ ଅସୁସ୍ଥ ହେବା ସହ ଛୋଟେଇ ଚାଲୁଥିଲା। ଡାକ୍ତରମାନେ ମୟୂର ଦେହରୁ ଉକ୍ତ ଅଣ୍ଡାକୁ ବାହାର କରୁଥିଲେ। ଏହି ସମୟରେ ହଠାତ୍ ମୟୂରଟିର ମୃତ୍ୟୁ ହୋଇଯାଇଥିଲା। ଏହି ଧଳାମୟୂରର ମୃତ୍ୟୁ ପରେ ଏମାନଙ୍କ ସଂଖ୍ୟା ହ୍ରାସପାଇ ୪ରେ ପହଞ୍ଚତ୍ଛି।
