କାମ୍ପଲା,୨୨।୩ : ଆଫ୍ରିକୀୟ ଦେଶ ଉଗାଣ୍ଡାର ସଂସଦ ଏକ ବିଲ ପାରିତ କରିଛି ଯେଉଁଥିରେ ସମଲିଙ୍ଗୀ ସମ୍ପର୍କକୁ ପ୍ରକାଶ କରିବା ଅପରାଧ ବୋଲି ଘୋଷଣା କରାଯାଇଛି। ଏହି ବିଲରେ ସମଲିଙ୍ଗୀ ସମ୍ପର୍କ ରଖିଲେ ମୃତ୍ୟୁ ଦଣ୍ଡାଦେଶ କରିବାକୁ ବ୍ୟବସ୍ଥା ରଖାଯାଇଛି। ଏହା ଦ୍ୱାରା ୩୦ରୁ ଅଧିକ ଆଫ୍ରିକୀୟ ଦେଶରେ ଉଗାଣ୍ଡା ମଧ୍ୟ ଅନ୍ତର୍ଭୁକ୍ତ ହୋଇଛି, ଯେଉଁଠାରେ ସମଲିଙ୍ଗୀ ସମ୍ପର୍କ ନିଷେଧ ।
ଉଗାଣ୍ଡାର ନୂତନ ବିଲ ଅନୁଯାୟୀ ସମଲିଙ୍ଗୀ ସମ୍ପର୍କକୁ ଅପରାଧ ବୋଲି ଘୋଷଣା କରାଯାଇଛି। ଏହି ବିଲର ବ୍ୟବସ୍ଥାକୁ ଉଲ୍ଲଂଘନ କଲେ ଆଜୀବନ କାରାଦଣ୍ଡ ଏବଂ ମୃତ୍ୟୁଦଣ୍ଡାଦେଶ ସ୍ଥିର କରାଯାଇଛି। ଯେଉଁମାନେ ୧୮ ବର୍ଷରୁ କମ ବୟସର ଲୋକଙ୍କ ସହ ସମଲିଙ୍ଗୀ ସମ୍ପର୍କ ରଖିବା କିମ୍ବା ଏଚ.ଆଇ.ଭି ସଂକ୍ରମିତ ହୋଇ ସମଲିଙ୍ଗୀ ସମ୍ପର୍କ ରଖି ଦୋଷୀ ସାବ୍ୟସ୍ତ ହୁଅନ୍ତି, ସେମାନଙ୍କ ପ୍ରତି ଏହି ବିଲରେ ଦଣ୍ଡିତ କରିବାର ବ୍ୟବସ୍ଥା କରାଯାଇଛି। ଏଥି ସହିତ ସମଲିଙ୍ଗୀ ବିବାହରେ ଦୋଷୀ ସାବ୍ୟସ୍ତ ବ୍ୟକ୍ତିଙ୍କ ପାଇଁ ଆଜୀବନ କାରାଦଣ୍ଡର ବ୍ୟବସ୍ଥା କରାଯାଇଛି।
ଉଗାଣ୍ଡା ସଂସଦରେ ପାରିତ ହେବା ପରେ ବର୍ତ୍ତମାନ ବିଲ ଅନୁମୋଦନ ପାଇଁ ରାଷ୍ଟ୍ରପତି ୟୋଭେରୀ ମୁସେଭେନିଙ୍କ ନିକଟକୁ ପଠାଯିବ। ରାଷ୍ଟ୍ରପତି ମୁସେଭେନି ମଧ୍ୟ ସମଲିଙ୍ଗୀ ସମ୍ପର୍କ ବିରୁଦ୍ଧରେ ଅଛନ୍ତି। ୨୦୧୩ ମସିହାରେ ଉଗାଣ୍ଡାରେ ସମଲିଙ୍ଗୀ ସମ୍ପର୍କ ବିରୋଧରେ ଏକ ଆଇନ ଅଣାଯାଇଥିଲା। ତେବେ ପାଶ୍ଚାତ୍ୟ ଦେଶଗୁଡିକର ବିରୋଧ ଏବଂ ସ୍ଥାନୀୟ କୋର୍ଟ ଏହା ଉପରେ ରୋକ ଲାଗୁ କରିବା ପରେ ଏହାକୁ କାର୍ଯ୍ୟକାରୀ କରାଯାଇପାର ନ ଥିଲା।
