ପ୍ୟାରିସ୍,୧୪।୪: ଗତବର୍ଷ ଇରାନ୍ରେ ଦଣ୍ଡାଦେଶ ୭୫% ବୃଦ୍ଧି ପାଇଛି। ଲୋକଙ୍କ ମଧ୍ୟରେ ଭାୟର ବାତାବରଣ ସୃଷ୍ଟି କରିବା ପାଇଁ ଇରାନ୍ ସରକାର ଏପରି କରିଥିବା ମାନବ ଅଧିକାର ଗ୍ରୁପ୍ ପକ୍ଷରୁ କୁହାଯାଇଛି। ୨୦୨୧ରେ ଦେଶରେ ମୋଟ ୩୩୩ ଜଣଙ୍କୁ ଫାଶୀ ଦଣ୍ଡରେ ଦଣ୍ଡିତ କରାଯାଇଥିବାବେଳେ ୨୦୨୨ରେ ଦେଶରେ ସର୍ବାଧିକ ୫୮୨ ଜଣଙ୍କୁ ଫାଶୀଦଣ୍ଡ ମିଳିଛି। ଏ ନେଇ ନରଓ୍ବେସ୍ଥିତ ଇରାନ୍ର ମାନବାଧିକାର (ଆଇଏଚ୍ଆର୍) ଏବଂ ପ୍ୟାରିସ୍ରେ ଥିବା ଟୁଗେଦର ଏଗେନ୍ଷ୍ଟ ଡେଥ୍ ପେନାଲ୍ଟି ପକ୍ଷରୁ ଉକ୍ତ ରିପୋର୍ଟ ପ୍ରକାଶ ପାଇଛି।
ମହସା ଅମିନଙ୍କ ମୃତ୍ୟୁ ପରେ ଗତ ସେପ୍ଟେମ୍ବରରେ ଦେଶବ୍ୟାପୀ ହିଜାବ ବିରୋଧୀ ଆନ୍ଦୋଳନ ମୁଣ୍ଡ ଟେକିଥିଲା। ଆନ୍ଦୋଳକୁ ସମର୍ଥନ କରୁଥିବା ଏବଂ ଇରାନ୍ର ରକ୍ଷଣଶୀଳ ସରକାର ଓ ପୋଲିସକୁ ସମାଲୋଚନା କରିଥିବା ଅନେକଙ୍କୁ ଫାଶୀ ଦଣ୍ଡରେ ଦଣ୍ଡିତ କରାଯାଇଥିଲା। ଆନ୍ଦୋଳନରେ ସାମିଲଥିବା ପ୍ରାୟ ୪ ଜଣ ପୁରୁଷଙ୍କୁ ଫାଶୀ ଦଣ୍ଡ ଦିଆଯାଇଥିଲା। ଲୋକଙ୍କୁ ଭୟଭୀତ କରିବା ପାଇଁ ଇରାନୀୟ ସରକରାଙ୍କ ପକ୍ଷରୁ ଏ ପ୍ରକାର ପଦକ୍ଷେପ ଗ୍ରହଣ କରାଯାଇଥିବା ଆଇଏଚ୍ଆଇ ନିର୍ଦ୍ଦେଶକ ମହମୁଦ ଅମରି ମୋଘାଦ୍ଦାମ କହିଛନ୍ତି। ୨୦୧୭ରେ ଦେଶରେ ଆଣ୍ଟି-ନାର୍କୋଟିକ୍ ଆଇନ ଆସିବା ପରେ ଡ୍ରଗ୍ସ ସମ୍ବନ୍ଧୀୟ ଅପରାଧରେ ଫାଶୀ ଦଣ୍ଡାଦେଶର ମାତ୍ରା କମିଛି। ଗତବର୍ଷ ବିଭିନ୍ନ ଆପରାଧିକ ମାମଲାରେ ଫାଶୀ ପାଇଥିବା ମୋଟ ୫୮୨ ଜଣଙ୍କ ମଧ୍ୟରୁ ୪୪% ଲୋକ ଡ୍ରଗ୍ସ କାରବାରରେ ଲିପ୍ତ ଥିବା ରିପୋର୍ଟରେ ଉଲ୍ଲେଖ କରାଯାଇଛି। ସେହିପରି ଫାଶୀ ଦଣ୍ଡାଦେଶ ମିଳିଥିବା ମୋଟ ଇରାନୀୟଙ୍କ ମଧ୍ୟରୁ ୩୦% ସୁନି ମୁସଲିମ୍ ବାଲୁଚ ସଂଖ୍ୟାଲଘୁ ଥିବାବେଳେ ୨ରୁ ୬% ଇରାନୀୟ ଅଟନ୍ତି। ହତ୍ୟା ମାମଲାରେ ମୋଟ ୨୮୮ ଜଣଙ୍କୁ ଫାଶୀ ଦଣ୍ଡାଦେଶ ମିିଳିଥିବାବେଳେ ୧୫ ବର୍ଷ ମଧ୍ୟରେ ଏହା ସବୁଠାରୁ ସର୍ବାଧିକ। ରିପୋର୍ଟ ଅନୁସାରେ ଦୁଇ ଜଣଙ୍କୁ ସର୍ବସମ୍ମୁଖରେ ଫାଶୀରେ ଝୁଲାଯାଇଥିବାବେଳେ ୩ ନାବାଳକ ଏବଂ ୧୬ ମହିଳାଙ୍କୁ ଗତବର୍ଷ ଇରାନ୍ ସରକାର ଫାଶୀ ଦଣ୍ଡରେ ଦଣ୍ଡିତ କରିଛନ୍ତି।