ବିଶୋଇ, ୭।୧୧(ଡି.ଏନ.ଏ.): ଜମି ବିବାଦକୁ କେନ୍ଦ୍ର କରି ଅନ୍ତିମ ସଂସ୍କାର କରାଇ ନ ଦେବାରୁ ଗ୍ରାମରେ ଜଣେ ବୃଦ୍ଧାଙ୍କ ମୃତଦେହ ୨୪ ଘଣ୍ଟା ପଡ଼ିରହିଲା। ଶେଷରେ ପୋଲିସ ଫୋର୍ସ ଉପସ୍ଥିତିରେ ସାପ୍ତାହିକ ହାଟ ମଝିରେ ଶବସତ୍କାର କରାଯାଇଛି। ମୟୂରଭଞ୍ଜ ଜିଲା ବିଶୋଇ ଥାନା ଅନ୍ତର୍ଗତ ଓଷାଡ଼ଲା ଗ୍ରାମରେ ଶନିବାର ଏଭଳି ଘଟଣା ଦେଖିବାକୁ ମିଳିଛି।
ଓଷାଡ଼ଲା ଗ୍ରାମରେ ରହୁଥିବା ହେଜଲ ନାଏକ ତାଙ୍କ ସ୍ବାମୀଙ୍କ ମୃତ୍ୟୁ ପରେ ଇନ୍ଦିରାଆବାସ ଘରେ ଦୀର୍ଘ ବର୍ଷ ଧରି ଏକାକି ରହି ଆସୁଥିଲେ। ଶୁକ୍ରବାର ବାର୍ଦ୍ଧକ୍ୟ ଜନିତ କାରଣରୁ ତାଙ୍କର ପରଲୋକ ହୋଇଥିଲା। ଗ୍ରାମବାସୀଙ୍କ ସହାୟତାରେ ହେଜଲ ରହୁଥିବା ଏହି ବାସସ୍ଥାନ ପରିସରରେ ଶବ ସତ୍କାର ପାଇଁ ଯୋଜନା ଚାଲିଥିଲା।
ଉକ୍ତ ସ୍ଥାନରେ ଗାତ ଖୋଳା ଚାଲିଥିବା ବେଳେ ଗ୍ରାମର ଜଣେ ବ୍ୟକ୍ତି ଏହାକୁ ବିରୋଧ କରିଥିଲେ। ହେଜଲ ରହୁଥିବା ଘରର ଜମିଟି ଉକ୍ତ ବ୍ୟକ୍ତିଙ୍କ ପୈତୃକ ଜମି ହୋଇଥିବା ଯୋଗୁ ସେ ଏହାକୁ ବାରଣ କରିଥିଲେ। ଫଳରେ ଏହାକୁ ନେଇ ଶୁକ୍ରବାର ରାତିତମାମ ଉତ୍ତେଜନା ଦେଖାଯାଇଥିଲା। ଶନିବାର ସକାଳୁ ମୃତ ହେଜଲଙ୍କ ସମ୍ପର୍କୀୟ ନାତୁଣୀ ଓ ଗ୍ରାମ ଲୋକେ ଏନେଇ ବିଶୋଇ ଥାନାକୁ ଖବର ଦେବାରୁ ପୋଲିସ ଫୋର୍ସ ପହଞ୍ଚି ଉକ୍ତ ବ୍ୟକ୍ତିଙ୍କୁ ବୁଝାଶୁଝା କରିଥିଲେ। ସେ ରାଜି ନ ହେବାରୁ ଅନ୍ୟ କୌଣସି ଉପାୟ ନ ପାଇ ହେଜଲଙ୍କ ପ୍ରଥମ ସ୍ବାମୀଙ୍କ ଜମି ଥିବା ଓଷାଡ଼ଲା ସାପ୍ତାହିକ ହାଟ ହେଉଥିବା ସ୍ଥାନରେ ଅନ୍ତିମ ସଂସ୍କାର ପାଇଁ ନିଷ୍ପତ୍ତି ହୋଇଥିଲା। ତେବେ ସର୍ବସାଧାରଣ ସ୍ଥାନରେ ମୃତଦେହ ପୋତିବାକୁ ନେଇ ବିରୋଧ ସତ୍ତ୍ୱେ ହାଟ ମଝିରେ ପୋତା ଯାଇଥିଲା।
