ନୂଆଦିଲ୍ଲୀ, ୧୭ା୫: କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନୀତିନ୍ ଗଡ଼କରୀଙ୍କୁ ସୋମବାର ସନ୍ଧ୍ୟାରେ ହତ୍ୟା ଧମକ ମିଳିବା ପରେ ଦିଲ୍ଲୀ ପୋଲିସ ଏହାର ତଦନ୍ତ ଚଳାଇଛି। ଗଡ଼କରୀଙ୍କ ନୂଆଦିଲ୍ଲୀ ବାସଭବନକୁ କେହି ଅଜଣା ବ୍ୟକ୍ତି ଫୋନ୍ କରି ମନ୍ତ୍ରୀଙ୍କ ସହ କଥା ହେବାକୁ ଦାବି କରିବା ସହ ଧମକ ଦେଇଥିଲେ। ବାସଭବନର ଅଧିକାରୀ ତୁରନ୍ତ ପୋଲିସକୁ ଜଣାଇବା ପରେ ତଦନ୍ତ ଆରମ୍ଭ ହୋଇଛି। ଏହା ଗଡ଼କରୀଙ୍କୁ ଦ୍ୱିତୀୟ ହତ୍ୟା ଧମକ। ଗତ ଜାନୁୟାରୀରେ ମହାରାଷ୍ଟ୍ରରେ ଥିବା ତାଙ୍କ ଅଫିସ ଓ ବାସଭବନକୁ ଧମକ ଆସିଥିଲା। କର୍ନାଟକର ବେଲାଗାଭି ଜେଲ୍ରୁ ଜଣେ ଗ୍ୟାଙ୍ଗ୍ଷ୍ଟର ତଥା ହତ୍ୟା ଅପରାଧୀ ଫୋନ୍ କରି ଏଭଳି ଧମକ ଦେଇଥିବା ପୋଲିସ ତଦନ୍ତରୁ ଜାଣିବାକୁ ପାଇଥିଲା।
