ନୂଆଦିଲ୍ଲୀ, ୧୦।୧ : ଓମିକ୍ରନ କାରଣରୁ କରୋନାର ତୃତୀୟ ଲହର ସଂକ୍ରମଣ ଦ୍ରୁତ ବ୍ୟାପିବାର ଆଶଙ୍କା ରହିଛି। କିନ୍ତୁ ଏହା ଦ୍ୱାରା ମୃତ୍ୟୁ ହାର, ଦ୍ୱିତୀୟ ଲହର ଅପେକ୍ଷା ପ୍ରାୟ ୬୦୦ ପ୍ରତିଶତ କମ ରେକର୍ଡ କରାଯାଇଛି। ଅପର ପକ୍ଷରେ ପ୍ରଥମ ଲହର ତୁଳନାରେ ମୃତ୍ୟୁ ସଂଖ୍ୟାରେ ୯୦୦ ପ୍ରତିଶତ ହ୍ରାସ ଘଟିବ ବୋଲି ସର୍ଭେ ରିପୋର୍ଟରେ ଉଲ୍ଲେଖ କରାଯାଇଛି।
ତେବେ ଆଗାମୀ ଦିନରେ ମୃତ୍ୟୁ ସଂଖ୍ୟାରେ ସାମାନ୍ୟ ବୃଦ୍ଧି ଘଟିପାରେ ବୋଲି ବିଶେଷଜ୍ଞମାନେ କହିଛନ୍ତି।
ବିଶେଷଜ୍ଞଙ୍କ ଅନୁସାରେ ଓମିକ୍ରନ କମ ମାରାତ୍ମକ। ଏହା ଫୁସଫୁସକୁ କ୍ଷତି ପହଞ୍ଚାଏ ନାହିଁ। ତେଣୁ ଡାକ୍ତରଖାନାରେ ଭର୍ତ୍ତି ହେବାର ହାର କମ, ଯେଉଁଥିପାଇଁ ମୃତ୍ୟୁ ମଧ୍ୟ କମ ହେବାର ଆଶଙ୍କା ରହିଛି। ବର୍ଦ୍ଧମାନ ମହାବୀର ମେଡ଼ିକାଲ କଲେଜର ଯୋଗାଯୋଗ ବିଭାଗର ପ୍ରଫେସର ଯୁଗଳ କିଶୋର କହିଛନ୍ତି ଯେ ଓମିକ୍ରନ ସଂକ୍ରମିତ ପାଞ୍ଚ-ସାତ ଦିନ ମଧ୍ୟରେ ସୁସ୍ଥ ହୋଇଯାଉଛି ଏବଂ ଇତି ମଧ୍ୟରେ ଦେଶରେ ତୃତୀୟ ଲହରର ୧୦ ଦିନରୁ ଅଧିକ ସମୟ ବିତିଯାଇଛି।
ପୂର୍ବ ଲହରରେ ମୃତ୍ୟୁ ସଂଖ୍ୟା ୯ରୁ ୧୦ ଦିନ ପରେ ବଢୁଥିଲା। ତେଣୁ ଆଗାମୀ ଦିନରେ ମୃତ୍ୟୁ ସଂଖ୍ୟାରେ ସାମାନ୍ୟ ବୃଦ୍ଧି ଘଟିପାରେ ବୋଲି ଆଶଙ୍କା କରାଯାଉଛି। କିନ୍ତୁ, ଏହା ଦ୍ୱିତୀୟ ଲହରଠାରୁ ବହୁତ କମ ହେବ।