ଚମ୍ପୁଆ,୧୨ା୭: କେନ୍ଦୁଝର ଜିଲା ଚମ୍ପୁଆ ସେକ୍ସନ ଅଞ୍ଚଳରେ ଏକ ଗୋଠ ଖଣ୍ଡିଆ ଦନ୍ତା ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ଘଟିଛି। ହାତୀଟି ତାଙ୍କୁ ଘର ଆଗରୁ ଟାଣି ଆଣି କଚାଡ଼ି ମାରି ଦେଇଥିବା ସୂଚନା ମିଳିଛି। ମୃତକ ହେଲେ ପାଞ୍ଚପୋଖରିଆ ମୁଣ୍ଡା ସାହିର ରାଜେଶ୍ୱରୀ ମୁଣ୍ଡା ।
ରବିବାର ବିଳମ୍ବିତ ରାତିରେ ରାଜେଶ୍ୱରୀ ଘର ବାହାରକୁ ଆସିଥିବା ବେଳେ ଦନ୍ତା ହାବୁଡ଼ରେ ପଡ଼ିଯାଇଥିଲେ। ହାତୀଟି ବାଡ଼ ଭାଙ୍ଗି ରାଜେଶ୍ୱରୀଙ୍କୁ ଘର ଆଗରୁ ଉଠାଇନେଇ ଅନ୍ୟ ଜଣକ ବାଡ଼ିରେ କଚାଡି ଦଳି ଦେଇଥିଲା। ପରିବାର ଲୋକେ ତାଙ୍କୁ ତୁରନ୍ତ ଚମ୍ପୁଆ ଡାକ୍ତରଖାନା ଓ ପରେ ଜିଲା ଚିକିତ୍ସାଳୟକୁ ନେଇଥିଲେ। ସେଠାରେ ତାଙ୍କର ମୃତ୍ୟୁ ହୋଇଥିଲା। ପରେ ଉକ୍ତ ହାତୀଟି ଗୋଧୂଳି ଆମ୍ବ ବଗିଚାକୁ ଚାଲି ଯାଇଥିଲା। ନଦୀରୁ ଗାଧୋଇ ଘରକୁ ଫେରୁଥିବା କାର୍ତ୍ତିକ ଚନ୍ଦ୍ର ନାଏକଙ୍କୁ ଦନ୍ତାଟି ଶୁଣ୍ଢରେ ଠେଲି ଦେବାରୁ ସେ ଗୁରୁତର ଆହତ ହୋଇଥିଲେ। ଚିକିତ୍ସା ପାଇଁ ତାଙ୍କୁ ଚମ୍ପୁଆ ଡାକ୍ତରଖାନାରେ ଭର୍ତ୍ତି କରାଯାଇଛି।