ନୂଆଦିଲ୍ଲୀ,୭।୮: ବର୍ତ୍ତମାନ ସମୟରେ ଘରୋଇ ବଜାର ପ୍ରଭାବିତ ହୋଇ ରହିଛି। ବଜାରର ଦାବିକୁ ନଜରରେ ରଖି କର୍ପୋରେଟ ଏବଂ ବ୍ୟକ୍ତିଗତ ଋଣ ଗ୍ରହୀତାଙ୍କ ଲାଗି ରିଜର୍ଭ ବ୍ୟାଙ୍କ ଋଣ ପୁନର୍ଗଠନ ନେଇ ଅନୁମତି ପ୍ରଦାନ କରିଛି। ଏ ନେଇ ବ୍ୟାଙ୍କଗୁଡିକ ବ୍ୟବସ୍ଥା କରିବେ ବୋଲି ଜଣାପଡିଛି। ୨୦୧୯ ଜୁଲାଇ ୭ରେ ଆସିଥିବା ବ୍ୟବସ୍ଥା ମୁତାବକ ଏଭଳି ପଦକ୍ଷେପ ବ୍ୟାଙ୍କଗୁଡିକ ଗ୍ରହଣ କରିବେ ବୋଲି ଗଭର୍ନର ଶକ୍ତିକାନ୍ତ କହିଛନ୍ତି। ଋଣ ପୁନର୍ଗଠନ ସୁବିଧା ଯୋଗାଣ ଦିଗରେ କାର୍ଯ୍ୟକ୍ରମ ଜାରି ରହିଛି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ ପୂର୍ବରୁ ସୂଚନା ଦେଇଥିଲେ। ଏମ୍ଏସ୍ଏମ୍ଇଗୁଡିକର ଆକାଉଣ୍ଟ କ୍ଲାସିଫାଏଡ ଷ୍ଟାଣ୍ଡାର୍ଡର ହୋଇଥିଲେ ଋଣ ପୁନର୍ଗଠନ ସବୁଧାର ଲାଭ ଉଠାଇ ପାରିବେ। ସୁନା ବନ୍ଧକ ରଖି ଋଣ ଗ୍ରହଣ କ୍ଷେତ୍ରରେ ଲୋନ ଟୁ ଭାଲ୍ୟୁ ବା ସୁନା ମୂଲ୍ୟ ତୁଳନାରେ ଋଣ ସୀମାକୁ ୭୫%ରୁ ୯୦% ବଢାଯାଇଛି। ଷ୍ଟାର୍ଟଅପ୍ଗୁଡିକୁ ଅଗ୍ରାଧିକାର ଋଣ ପ୍ରଦାନ ଷ୍ଟାଟସ ପ୍ରଦାନ କରାଯାଇଛି। ବର୍ତ୍ତମାନ ଏହି ୟୁନିଟଗୁଡିକୁ ବ୍ୟାଙ୍କଗୁଡିକ ଋଣ ଯୋଗାଣ ଦିଗରେ ସହାୟକ ହୋଇ ପାରିବ। ଋଣ ମୋରାଟୋରିୟ ଅବଧି ୩୧ରେ ଶେଷ ହେଉଥିବା ବେଳେ ଏହାର ଅବଧି ବଢିବ କି ନାହିଁ ସେ ନେଇ ଗଭର୍ନର କିଛି ସ୍ପଷ୍ଟ କରିନାହାନ୍ତି। କରୋନା ଯୋଗୁ ବର୍ତ୍ତମାନ ଲୋକମାନେ ହଇରାଣ ହେଉଥିବାରୁ ମାର୍ଚ୍ଚରେ ଘୋଷଣା ହୋଇଥିବା ଋଣ ମୋରାଟୋରିୟମକୁ ପୁଣି ୩ ମାସ ବଢାଯାଇଥିଲା। ମୋରାଟୋରିୟମ ଅବଧି ବଢିଲେ ଏହା ଲୋକଙ୍କ ଦ୍ୱାରା ଅପବ୍ୟବହାର ହେବ ବୋଲି ବ୍ୟାଙ୍କଗୁଡିକ ଆଶଙ୍କା କରୁଛନ୍ତି।