ଟୋକିଓ, ୨୪।୫ : ଜାପାନର ଟୋକିଓରେ ବହୁପକ୍ଷୀୟ ସୁରକ୍ଷା ସଂଳାପ (କ୍ୱାଡ) ବୈଠକରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଆମେରିକାର ରାଷ୍ଟ୍ରପତି ଜୋ ବାଇଡେନ, ଜାପାନର ପ୍ରଧାନମନ୍ତ୍ରୀ ଫୁମିଓ କିଶିଦା ଏବଂ ଅଷ୍ଟ୍ରେଲିଆର ନୂତନ ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନେସ ଯୋଗ ଦେଇ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ସ୍ଥିତାବସ୍ଥା ବଜାୟ ଏବଂ ଏହି ଅଞ୍ଚଳର ବିକାଶ ପାଇଁ ନିଷ୍ପତ୍ତି ଗ୍ରହଣ କରିଛନ୍ତି।
ପାରସ୍ପରିକ ମତ ସମ୍ପର୍କରେ ବୈଠକ ବିଷୟରେ ଚାରି ଦେଶର ନେତା ମିଳିତ ବିବୃତ୍ତି ଦେଇଛନ୍ତି। ଭାରତ-ପ୍ରଶାନ୍ତ ମହାସାଗରରେ ଚାଇନାର ବୃଦ୍ଧି ପାଉଥିବା ଏକତରଫା କାର୍ଯ୍ୟାନୁଷ୍ଠାନ ଉପରେ ଆଲୋଚନା କରାଯାଇଥିଲା। ବିବୃତ୍ତି ଅନୁଯାୟୀ, ଭାରତ, ଅଷ୍ଟ୍ରେଲିଆ, ଜାପାନ ଏବଂ ଆମେରିକାର ନେତାମାନେ ମଙ୍ଗଳବାର ଚାଇନାର ଏଭଳି ବାଧ୍ୟତାମୂଳକ, ଉତ୍ତେଜକ ଏକପାଖିଆ କାର୍ଯ୍ୟକୁ ଦୃଢ଼ ବିରୋଧ କରିଛନ୍ତି ।
ଏହା ଦ୍ୱାରା ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳର ସ୍ଥିତିରେ ପରିବର୍ତ୍ତନ ଆଣିବାକୁ ଚାଇନା ଚାହୁଁଛି ବୋଲି କ୍ୱାଡ୍ରେ ମତ ପ୍ରକାଶ ପାଇଛି। ବିବୃତ୍ତି ଅନୁଯାୟୀ, ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରର ଭିତ୍ତିଭୂମି ବିକାଶ ପାଇଁ କ୍ୱାଡ ସଦସ୍ୟ ଦେଶ ୫୦ ବିଲିୟନ ଡଲାର ଆବଣ୍ଟନ କରିବାକୁ ନିଷ୍ପତ୍ତି ନେଇଛନ୍ତି। କ୍ୱାଡର ସଦସ୍ୟ ରାଷ୍ଟ୍ରମାନେ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଚାଇନାର ବୃଦ୍ଧି ପାଉଥିବା ସାମରିକ ପଦକ୍ଷେପ ପୃଷ୍ଠଭୂମିରେ ଏକ ମୁକ୍ତ ତଥା ସମୃଦ୍ଧ ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳକୁ ସୁନିଶ୍ଚିତ କରିବାର ଆବଶ୍ୟକତା ବିଷୟରେ ଆଲୋଚନା କରିଥିଲେ।
ଏକ ମିଳିତ ବିବୃତ୍ତିରେ ସଦସ୍ୟ ଦେଶ କହିଛନ୍ତି ଯେ ଆମେ ସ୍ବାଧୀନତା, ଆଇନର ଶାସନ, ଗଣତାନ୍ତ୍ରିକ ମୂଲ୍ୟବୋଧ, ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତା ନୀତିକୁ ଦୃଢ଼ ସମର୍ଥନ କରୁଛୁ। ଭୟଭୀତ କିମ୍ବା ବଳ ପ୍ରୟୋଗ ନକରି ବିବାଦର ଶାନ୍ତିପୂର୍ଣ୍ଣ ସମାଧାନକୁ ସମର୍ଥନ, ସ୍ଥିତି ପରିବର୍ତ୍ତନ କରିବାକୁ ଯେକୌଣସି ଏକପାଖିଆ ପ୍ରୟାସ, ଏବଂ ନାଭିଗେସନ ଏବଂ ଓଭରଫ୍ଲାଇଟ ସ୍ବାଧୀନତା ଉପରେ ବୈଠକରେ ଗୁରୁତ୍ୱାରୋପ କରାଯାଇଛି। ଭାରତ-ପ୍ରଶାନ୍ତ ମହାସାଗରୀୟ ଦେଶ ତଥା ବିଶ୍ୱର ଶାନ୍ତି, ସ୍ଥିରତା ଏବଂ ସମୃଦ୍ଧତା ପାଇଁ ଏହି ସବୁ ଜରୁରୀ ବୋଲି ସଦସ୍ୟ ରାଷ୍ଟ୍ରମାନେ କହିଛନ୍ତି।