ଅନୁଗୋଳ, ୧୫।୭(ଅମିତ ସାମଲ): ଯୋଗ୍ୟ ହିତାଧିକାରୀଙ୍କୁ ଚିହ୍ନଟ କରି ବିଭିନ୍ନ ସରକାରୀ ଯୋଜନାରେ ସାମିଲ କର। ଗଳିପଶି ସରକାରୀ ଯୋଜନାର ଲାଭ ଉଠାଉଥିବା ଅଯୋଗ୍ୟଙ୍କୁ ତୁରନ୍ତ ବିଦା କର ବୋଲି ଶୁକ୍ରବାର ଅନୁଗୋଳ ପୌରପାଳିକା କାଉନ୍ସିଲ ହଲ୍ରେ ଅନୁଷ୍ଠିତ ଭିଜିଲାନ୍ସ କମିଟି ବୈଠକରେ ନିଷ୍ପତ୍ତି ହୋଇଛି। ଏଥିଲାଗି ଏକ କମିଟି ଗଠନ କରାଯିବ ବୋଲି ଜଣାପଡ଼ିଛି। ଏହାପରେ ଖାଦ୍ୟ ସୁରକ୍ଷା ଯୋଜନାରେ ଲାଭ ଉଠାଉଥିବା ସ୍ବଚ୍ଛଳ ବର୍ଗଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ବାଟ ଫିଟିଛି।
ନଗରପାଳ ଅକ୍ଷୟ କୁମାର ସାମନ୍ତଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଉପାଧ୍ୟକ୍ଷା ଅନୁପମା ସାହୁ, ବିଧାୟକଙ୍କ ପ୍ରତିନିଧି ଅଜିତ୍ ପ୍ରସାଦ ଦ୍ୱିବେଦୀ, ଏମ୍ପିଙ୍କ ପ୍ରତିନିଧି ପୂର୍ଣ୍ଣଚନ୍ଦ୍ର ରାଉତ, ଉପଜିଲାପାଳଙ୍କ ପ୍ରତିନିଧି ଡେପୁଟି କଲେକ୍ଟର ଅମ୍ଳାନ ଅପରାଜିତା, ପୌର ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ, ଭିଜିଲାନ୍ସ ମନିଟରିଂ କମିଟି ସଦସ୍ୟ ତଥା କାଉନ୍ସିଲର ବଳରାମ ଜେନା, ସୂର୍ଯ୍ୟାସ୍ନାତା ସାହୁ, ସମନ୍ବିତ ଶିଶୁ ବିକାଶ ବିଭାଗର ରୀତାଞ୍ଜଳି ପ୍ରଧାନ, ଯୋଗାଣ ବିଭାଗର ଇତିଶ୍ରୀ ଜେନା, ପୌରପାଳିକାର ଏମ୍ଆଇ ସ୍ବର୍ଣ୍ଣମଞ୍ଜରୀ ସ୍ବାଇଁ, ଖାଉଟି ପ୍ରତିନିଧି ନାରାୟଣ ସାହୁ, ମିଶନ ଶକ୍ତିର ଜ୍ୟୋତିର୍ମୟୀ ଦଳବେହେରା, ଜିଲା ମୁଖ୍ୟ ଚିକିତ୍ସାଳୟର ଏଡିଏମ୍ଓ (ଜନସ୍ବାସ୍ଥ୍ୟ) ଧନଞ୍ଜୟ ବେହେରା ପ୍ରମୁଖ ଉପସ୍ଥିତ ଥିଲେ।
ଅନୁଗୋଳ ପୌରାଞ୍ଚଳରେ ବିଭିନ୍ନ ଖାଦ୍ୟ ସୁରକ୍ଷା ଯୋଜନାରେ ୪,୯୮୫ ହିତାଧିକାରୀ ରହିଛନ୍ତି। ତନ୍ମଧ୍ୟରେ ପ୍ରାୟୋରିଟି ହାଉସ୍ ହୋଲ୍ଡର (ପିଏଚ୍ଏଚ)ରେ ୪,୫୮୭ ଜଣ, ଅନ୍ତ୍ୟୋଦୟ ଅନ୍ନ ଯୋଜନା (ଏଏୱାଇ)ରେ ୩୪୮, ରାଜ୍ୟ ଖାଦ୍ୟ ସୁରକ୍ଷା ଯୋଜନାରେ ୪୯, ଅନ୍ନପୂର୍ଣ୍ଣା ଯୋଜନାରେ ଜଣେ ଖାଉଟି ଅଛନ୍ତି। ୯ଜଣ ଡିଲରଙ୍କ ସହାୟତାରେ ଏମାନଙ୍କୁ ଯୋଗାଣ ସାମଗ୍ରୀ ବଣ୍ଟନ କରାଯାଉଛି। ଯୋଗାଣ ସାମଗ୍ରୀ ନିର୍ଦ୍ଧାରିତ ହିତାଧିକାରୀଙ୍କ ନିକଟରେ ପହଞ୍ଚାଇବା, ଯୋଗାଣ ବିଭାଗରେ ସ୍ବଚ୍ଛତା ରକ୍ଷା, ଓ୍ବାନ୍ କାର୍ଡ ଓ୍ବାନ୍ ନେଶନର ଠିକ୍ କାର୍ଯ୍ୟକାରିତା ନେଇ ବୈଠକରେ ଆଲୋଚନା ହୋଇଥିଲା। ଏଥିସହ ଯୋଗ୍ୟ ହିତାଧିକାରୀଙ୍କୁ ଯୋଜନାରେ ସାମିଲ କରିବା ଏବଂ ଅଯୋଗ୍ୟଙ୍କୁ ବାଦ୍ ଦେବାକୁ ପରାମର୍ଶ ଦିଆଯାଇଛି। ଖାଉଟିଙ୍କୁ ହଇରାଣ କରୁଥିବା ଡିଲରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି।
ଏ ସଂକ୍ରାନ୍ତରେ ପୌରନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ କହିଛନ୍ତି, ପୌରପାଳିକାରେ ଖାଦ୍ୟ ସୁରକ୍ଷା ଯୋଜନାରେ ଥିବା ସରକାରୀ ଟାର୍ଗେଟ୍ ପୂରଣ ହୋଇଛି। ତଥାପି ଏକ କମିଟି ଗଠନ କରି ଯାଞ୍ଚ କରାଯିବ। ଯେଉଁମାନେ ପ୍ରକୃତରେ ତାଲିକାରେ ରହିବାକୁ ଯୋଗ୍ୟ, ସେମାନେ ରହିବେ। ଯେଉଁମାନେ ଅଯୋଗ୍ୟ ସେମାନଙ୍କୁ ବାଦ୍ ଦିଆଯିବ। ପ୍ରକୃତ ହିତାଧିକାରୀଙ୍କୁ ସମସ୍ତ ସୁବିଧା ଯୋଗାଇ ଦିଆଯିବ।