ଓ୍ବାଶିଂଟନ,୧।୯: ଆଫଗାନିସ୍ତାନରୁ ଆମେରିକା ସୈନ୍ୟବାହିନୀ ପ୍ରତ୍ୟାବର୍ତ୍ତନ କରିବା ନିଷ୍ପତ୍ତି ଠିକ ଥିଲା। ଏହା ବ୍ୟତୀତ ଅନ୍ୟ କୌଣସି ବିକଳ୍ପ ନ ଥିଲା ବୋଲି ଆମେରିକା ରାଷ୍ଟ୍ରପତି ଜୋ ବାଇଡେନ୍ କହିଛନ୍ତି। ଏହି ଯୁଦ୍ଧକୁ ଆଉ ବଢ଼ାଯିବାର ଆବଶ୍ୟକତା ନ ଥିଲା। ଆମେରିକାର ହିତ କୁ ଦୃଷ୍ଟିରେ ରଖି ଏଭଳି ପଦକ୍ଷେପ ଗ୍ରହଣ କରାଯାଇଥିବା ବାଇଡେନ୍ କହିଛନ୍ତି। ତେବେ ଆମେରିକା ମିଶନ ସଫଳ ରହିଥିବା ବାଇଡେନ୍ କହିଛନ୍ତି। ଆଫଗାନିସ୍ତାନରେ ଆମେରିକା ଲକ୍ଷ ଲକ୍ଷ ଡଲାର ଖର୍ଚ୍ଚ କରିଛି। ଏହି ଅଭିଯାନ ଦେଶ ପାଇଁ ମହଙ୍ଗା ସାବ୍ୟସ୍ତ ହୋଇଥିବା ସେ ସୂଚନା ଦେଇଛନ୍ତି।
ଆଫଗାନିସ୍ତାନରେ ଆମେରିକା ସୈନ୍ୟ ବାହିନୀ ଯାହା କରିଛନ୍ତି ତାହା ଅତ୍ୟନ୍ତ ଗୌରବର ବିଷୟ। ସୈନ୍ୟ ବାହିନୀ ସେଠାରେ ଥିବାବେଳେ ଶାନ୍ତି ପ୍ରତିଷ୍ଠା ହୋଇ ପାରିଥିଲା। ମୁଁ ଏହି ନିଷ୍ପତ୍ତି ପାଇଁ ସମ୍ପୂର୍ଣ୍ଣ ଦାୟୀ। କିଛି ଲୋକ ପୂର୍ବରୁ ଏହି ନିଷ୍ପତ୍ତି ନେବା ଉପରେ ଗୁରୁତ୍ୱାରୋପ କରୁଛନ୍ତି। ମୁଁ ଏହା ସହ ସହମତ ନୁହେଁ। ଯଦି ଏହା ପୂର୍ବରୁ ହୋଇଥାନ୍ତା ତେବେ ବିଶୃଙ୍ଖଳା ବ୍ୟାପିଥାନ୍ତା ଏବଂ ସେଠାରେ ଗୃହଯୁଦ୍ଧ ଆରମ୍ଭ ହୋଇଥାନ୍ତା। ଚ୍ୟାଲେଞ୍ଜ୍ ଏବଂ ଧମକ ବିନା ସ୍ଥାନାନ୍ତର ସମ୍ଭବ ହୋଇ ପାରି ନ ଥାନ୍ତା ବୋଲି ବାଇଡେନ୍ ଦେଶବାସୀଙ୍କ ଉଦ୍ଦେଶ୍ୟରେ କହିଛନ୍ତି।
ମୁଁ ଏହା ସ୍ପଷ୍ଟ କରିବାକୁ ଚାହୁଁଛି ଯେ ଯିଏ ଆମେରିକାର କ୍ଷତି କରିବାକୁ ଚେଷ୍ଟା କରିବ ଅବା ଆମ ସହଯୋଗୀଙ୍କ ବିରୋଧରେ ଆତଙ୍କବାଦୀ କାର୍ଯ୍ୟ କଳାପରେ ଲିପ୍ତ ହେବ, ଏହାକୁ ଆମେରିକା ସହ୍ୟ କରିବ ନାହିଁ। ଆମେ ତାଙ୍କୁ କ୍ଷମା କରିବୁ ନାହିଁ କି ଭୁଲି ପାରିବୁ ନାହିଁ। ସେମାନଙ୍କୁ ଏହାର ପରିଣାମ ଭୋଗ କରିବାକୁ ପଡ଼ିବ। ଇତିମଧ୍ୟରେ ୧ ଲକ୍ଷ ୨୫,୦୦୦ ରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି।
ଆମେ ଆଫଗାନିସ୍ତାନ ଅଭିଯାନ ପାଇଁ ୩ ଲକ୍ଷ ସୈନ୍ୟଙ୍କୁ ପ୍ରସ୍ତୁତ କରିଥିଲୁ। ଦୁଇ ଦଶନ୍ଧି ମଧ୍ୟରେ ଆଫଗାନିସ୍ତାନରେ ଅନେକ ଘଟଣା ଘଟିଛି। ଆମେ ସେଠାରେ ଶହ ଶହ କୋଟି ଟଙ୍କା ଖର୍ଚ୍ଚ କରିଛୁ। ମୁଁ ଯୁଦ୍ଧକୁ ବଢ଼ାଇବାକୁ ଚାହୁଁ ନ ଥିଲି। ତେଣୁ ଚୂଡାନ୍ତ ନିଷ୍ପତ୍ତି ଗ୍ରହଣ କରାଯାଇଥିବା ବାଇଡେନ୍ କହିଛନ୍ତି।
ଆଫଗାନିସ୍ତାନ ରାଷ୍ଟ୍ରପତି ଆଶରଫ ଘନି ଦେଶ ଛାଡି ପଳାଇଥିଲେ। ଘନିଙ୍କ ପଳାୟନ ଯୋଗୁ ଆଫଗାନିସ୍ତାନରେ ବିଶୃଙ୍ଖଳା ସୃଷ୍ଟି ହୋଇଥିଲା। ଆମେ ଚୀନ ଠାରୁ କଡ଼ା ଆହ୍ବାନ ସମ୍ମୁଖୀନ ହେଉଛୁ। ସେହିପରି ରୁଷିଆ ମଧ୍ୟ ଚ୍ୟାଲେଞ୍ଜ ପ୍ରଦାନ କରିଛି। ଆଫଗାନିସ୍ତାନରେ ସେମାନଙ୍କ ସହ ପ୍ରତିଦ୍ୱନ୍ଦ୍ୱିତା କରିବାକୁ ଆମେ ଚାହୁଁ ନାହୁଁ ବୋଲି ବାଇଡେନ୍ କହିଛନ୍ତି।
ଆମର ବୈଦେଶିକ ନୀତି ଦେଶର ସ୍ବାର୍ଥରେ ରହିବା ଉଚିତ। ଆଫଗାନିସ୍ତାନ ଲୋକଙ୍କୁ ସାହାଯ୍ୟ କରିବାକୁ, ମହିଳା, ଶିଶୁ ଏବଂ ମାନବିକ ଅଧିକାର ପାଇଁ ଆମେ ସର୍ବଦା ପ୍ରସ୍ତୁତ ରହିବୁ ବୋଲି ସେ କହିଛନ୍ତି।