ନୂଆଦିଲ୍ଲୀ,୬।୧: ଭାରତ ଏବଂ ଶ୍ରୀଲଙ୍କା ମଧ୍ୟରେ ଟି୨୦ ସିରିଜ ଖେଳାଯାଉଛି। ତିନି ମ୍ୟାଚ୍ ବିଶିଷ୍ଟ ଏହି ସିରିଜରେ ଉଭୟ ଟିମ୍ ୧-୧, ବରାବର ସ୍ଥିତିରେ ରହିଛି। ଏଣୁ ଶନିବାର ରାଜକୋଟରେ ଖେଳାଯିବାକୁ ଥିବା ଅନ୍ତିମ ଟି୨୦ ନିର୍ଣ୍ଣାୟକ ହେବ। ପୂର୍ବ ରେକର୍ଡକୁ ଦେଖିଲେ ଟିମ ଇଣ୍ଡିଆ ଏଠାରେ ଭଲ ପ୍ରଦର୍ଶନ କରିଆସିଛି। ଏଣୁ ଦଳ ବିଜେତା ହୋଇ ସିରିଜ ଉପରେ କବ୍ଜା କରିବ ବୋଲି ଆଶା କରାଯାଉଛି।
ଭାରତ ରାଜକୋଟର ସୌରାଷ୍ଟ୍ର କ୍ରିକେଟ ଷ୍ଟାଡିୟମରେ ଏଯାବତ ୪ ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳିଛି। ଏଥିରୁ ୩ଟିରେ ଦଳ ବିଜେତା ହୋଇଛି। ଏହାଛଡ଼ା ମଇଦାନରେ ଭାରତ ପକ୍ଷରୁ ରୋହିତ ଶର୍ମା ସର୍ବାଧିକ ଟି୨୦ ରନ୍ କରିଛନ୍ତି। ସେ ଏଠାରେ ୩ ଅନ୍ତର୍ଜାତୀୟ ମ୍ୟାଚ୍ରେ ୯୮ ରନ୍ କରିଛନ୍ତି। ଏହି ମାମଲାରେ ବିରାଟ କୋହଲି ଦ୍ୱିତୀୟ ସ୍ଥାନରେ ରହିଛନ୍ତି। ସେ ୨ ମ୍ୟାଚ୍ରେ ୯୪ ରନ୍ କରିଛନ୍ତି। ସେହିଭଳି ଯୁବରାଜ ସିଂହ ତୃତୀୟ ସ୍ଥାନରେ ଅଛନ୍ତି।
