ଟୋକିଓ, ୭ା୩ : ଜାପାନରେ ଜନ୍ମହାର ଦ୍ରୁତ ବେଗରେ ହ୍ରାସ ପାଇଚାଲିଛି। ଏହାକୁ ରୋକିବା ଦିଗରେ ସରକାର ପଦକ୍ଷେପ ଗ୍ରହଣ ନ କଲେ ଜାପାନ ସମ୍ପୂର୍ଣ୍ଣ ବିଲୋପ ହୋଇଯିବ ବୋଲି ପ୍ରଧାନମନ୍ତ୍ରୀ ଫୁମିଓ କିଶିଡାଙ୍କ ପରାମର୍ଶଦାତା ମାସାକୋ ମୋରି କହିଛନ୍ତି। ଜନ୍ମହାର କମୁଥିବାରୁ ସାମାଜିକ ନିରାପତ୍ତା ଓ ଅର୍ଥନୀତି ପ୍ରତି ବିପଦ ସୃଷ୍ଟି ହୋଇଛି। ଜନ୍ମହାର ଏହି ଅନୁପାତରେ ଖସିଚାଲିଲେ, ଦିନେ ଦେଶ ଲୋପ ପାଇଯିବ। ଗତବର୍ଷ ଜାପାନରେ ସବୁଠୁ କମ୍ ଶିଶୁ ଜନ୍ମ ହୋଇଥିବା ଗତ ମାସ ୨୮ରେ ସରକାର ଘୋଷଣା କରିଥିଲେ। ଅନ୍ତର୍ଦ୍ଧାନ ପ୍ରକ୍ରିୟା ମଧ୍ୟରେ ଯେଉଁମାନେ ରହିବେ ସେମାନଙ୍କୁ ଅନେକ କ୍ଷତିର ସମ୍ମୁଖୀନ ହେବାକୁ ପଡ଼ିବ। ଭୟଙ୍କର ରୋଗ ପିଲାମାନଙ୍କୁ କଲବଲ କରିବ ବୋଲି ମୋରି କହିଛନ୍ତି। ଗତବର୍ଷ ଜାପାନରେ ଯେତିକି ଶିଶୁ ଜନ୍ମ ହୋଇଥିଲେ, ତା’ର ଦୁଇଗୁଣ ଲୋକଙ୍କ ମୃତ୍ୟୁ ଘଟିଥିଲା। ୨୦୨୨ରେ ୮ ଲକ୍ଷରୁ ଅଧିକ ଶିଶୁ ଜନ୍ମଗ୍ରହଣ କରିଥିବାବେଳେ ମୃତ୍ୟୁସଂଖ୍ୟା ଥିଲା ୧୫.୮ ଲକ୍ଷ। ଜନ୍ମହାର ବଢ଼ାଇବା ପାଇଁ ଶିଶୁ ଓ ପରିବାର ବିଭାଗରେ ବ୍ୟୟ ଦୁଇଗୁଣା କରିବାକୁ ପ୍ରଧାନମନ୍ତ୍ରୀ କିଶିଡ଼ା ନିଷ୍ପତ୍ତି ନେଇଛନ୍ତି।
ଶିଶୁ ଜନ୍ମହାର କମୁଥିବାରୁ ଜାପାନ ଜନସଂଖ୍ୟା ମଧ୍ୟ ଦ୍ରୁତ ହ୍ରାସ ପାଉଛି। ୨୦୦୮ରେ ସେଠାର ଲୋକସଂଖ୍ୟା ୧୨କୋଟି ୮୦ ଲକ୍ଷରୁ ଅଧିକ ଥିବାବେଳେ ଏବେ ତାହା ୧୨ କୋଟି ୪୬ ଲକ୍ଷକୁ ହ୍ରାସ ପାଇଛି। ଅନ୍ୟପକ୍ଷରେ ୬୫ ବର୍ଷ କିମ୍ବା ତଦୂର୍ଦ୍ଧ୍ୱ ବୟସ୍କଙ୍କ ଅନୁପାତ ଗତବର୍ଷ ୨୯ ପ୍ରତିଶତକୁ ବୃଦ୍ଧି ପାଇଛି। ଜାପାନରେ ଶିଶୁ ଜନ୍ମ ଧୀରେ ଧୀରେ କମୁନାହିଁ, ହଠାତ୍ ହ୍ରାସ ପାଇଛି ବୋଲି ପୂର୍ବତନ ମନ୍ତ୍ରୀ ତଥା ଉଚ୍ଚ ସଦନର ସଦସ୍ୟା ମୋରି କହିଛନ୍ତି। ଏ ଦିଗରେ କିଛି କରା ନ ଗଲେ ଦେଶର ସାମାଜିକ ସୁରକ୍ଷା ବ୍ୟବସ୍ଥା ଭୁଶୁଡ଼ି ପଡ଼ିବ, ଶିଳ୍ପ ଓ ଆର୍ଥିକ ସମାର୍ଥ୍ୟ ହ୍ରାସ ପାଇବ। ଦେଶକୁ ସୁରକ୍ଷା ଦେବା ଲାଗି ପ୍ରତିରକ୍ଷା ବାହିନୀରେ ନିଯୁକ୍ତି ପାଇଁ ଯଥେଷ୍ଟ ଲୋକ ମିଳିବେ ନାହିଁ ବୋଲି ପ୍ରଧାନମନ୍ତ୍ରୀଙ୍କ ପରାମର୍ଶଦାତା କହିଛନ୍ତି। ତେବେ ସନ୍ତାନ ଜନ୍ମ ବୟସ ବର୍ଗର ମହିଳାଙ୍କ ସଂଖ୍ୟା କମିଥିବାରୁ ଜନ୍ମହାର ହ୍ରାସ ରୋକିବା ସହଜ କଥା ନୁହେଁ। ଏଥିପାଇଁ ସରକାରଙ୍କୁ ଅନେକ କିଛି କରିବାକୁ ପଡ଼ିବ ବୋଲି ମୋରି ମତ ଦେଇଛନ୍ତି।